Mateo 6:34—“Ayaw Kabalak-i ang Mosunod nga Adlaw”

“Ayaw gayod kabalaka bahin sa sunod nga adlaw, kay ang matag adlaw dunay kaugalingong mga kabalaka. Ang mga problema karong adlawa mao ray hunahunaa.”—Mateo 6:34, Bag-ong Kalibotang Hubad.

“Ayaw kabalak-i ang mosunod nga adlaw kay may kaugalingon kining suliran. Ayaw na pun-i ang suliran sa matag adlaw.”—Mateo 6:34, Maayong Balita Biblia.

Kahulogan sa Mateo 6:34

Gisulti kini ni Jesus aron pasaligan ang iyang mga mamiminaw nga dili sila kinahanglang mabalaka pag-ayo sa mga problema nga wala pa mahitabo. Hinuon, maayong hunahunaon lang kon unsay problema sa matag adlaw.

Wala ipasabot ni Jesus nga dili na ta maghunahuna bahin sa sunod nga adlaw o magplano para sa umaabot. (Proverbio 21:5) Hinuon gitabangan ta niya nga dili sobrang mabalaka sa kon unsay posibleng mahitabo sa sunod adlaw. Kon mabalaka ta pag-ayo, mawala ang atong kalipay ug dili na ta makapokus sa atong presenteng mga buluhaton. Sa pagkatinuod, dili nato masulbad ang mga problema sa umaabot pinaagi sa pagkabalaka niana karon. Ug sagad, ang mga butang nga atong gikabalak-an dili ra mahitabo o dili ra diay dako nga problema.

Konteksto sa Mateo 6:34

Ang gisulti ni Jesus dinhi apil sa iyang ilado nga Wali sa Bukid, nga mabasa sa Mateo kapitulo 5-7. Sa iyang wali, gipatin-aw ni Jesus nga ang sobrang pagkabalaka dili makaayo o makapataas sa atong kinabuhi. (Mateo 6:27) Miingon sab siya nga kon atong unahon ang Diyos diha sa atong kinabuhi, dili ta angayng mabalaka pag-ayo bahin sa sunod adlaw. Giatiman sa Diyos ang mga tanom ug hayop, busa atimanon sab niya ang iyang mga alagad.—Mateo 6:25, 26, 28-33.