Salmo 23:4​—“Bisan Pag Maglakaw Ako sa Ngitngit nga Walog sa Kamatayon”

“Bisan pag maglakaw ko sa ngiob kaayo nga walog, dili ko mahadlok, kay ikaw nag-uban kanako; ang imong sungkod ug baston nagpasalig kanako.”​—Salmo 23:4, Bag-ong Kalibotang Hubad.

“Bisan pag maglakaw ako sa ngitngit nga walog sa kamatayon, dili ako mahadlok kay nag-uban ka man kanako; gipanalipdan mo ako pinaagi sa imong sungkod ug bunal.”​—Salmo 23:4, Maayong Balita Biblia.

Kahulogan sa Salmo 23:4a

Ginapanalipdan ug ginaatiman sa Diyos kadtong nagasimba kaniya​—bisan pag naa sila sa lisod nga mga situwasyon. Niini nga bersikulo, ang pag-atiman sa Diyos sa iyang mga magsisimba gipakasama nianang sa usa ka magbalantay nga nag-atiman sa iyang mga karnero.b Dili sila mobating nag-inusara dihang mag-atubang ug lisod nga mga situwasyon, nga niini nga bersikulo gipakasamag naa sila sa ngitngit kaayo nga lugar ug posibleng mamatay. Mobati silang luwas, nga samag kauban nila ang Diyos.

Sa panahon sa Bibliya, gamiton sa magbalantay ang iyang sungkod o bunal aron protektahan ang mga karnero gikan sa ihalas nga mga mananap. Gamiton sab niya ang iyang baston, nga sagad taas ug bawog ang tumoy, aron giyahan ang mga karnero o birahon sila gikan sa kapeligrohan. Si Jehova nga Diyos sama pod ug mahigugmaong Magbalantay nga nanalipod ug naggiya sa iyang mga magsisimba. Bisan pag naa sila sa lisod kaayo nga situwasyon, si Jehova nag-atiman kanila sa lainlaing paagi.

• Siya nagatudlo ug nagahupay kanila pinaagi sa iyang pulong, ang Bibliya.​—Roma 15:4.

• Maminaw siya sa ilang mga pag-ampo, nga maghatag kanilag kalinaw sa hunahuna ug kalmadong kasingkasing.​—Filipos 4:6, 7.

• Gamiton niya ang uban niyang mga alagad sa pagdasig kanila.​—Hebreohanon 10:24, 25.

• Naghatag siya kanila ug seguradong paglaom sa usa ka mas maayong kaugmaon, dihang iyang wad-on ang tanang problema o kasakit nga ilang ginaatubang.​—Salmo 37:29; Pinadayag 21:3-5.

Konteksto sa Salmo 23:4

Si David mao ang nagsulat sa Salmo 23, kinsa usa ka magbalantay sa batan-on pa ug sa ulahi nahimong hari sa karaang nasod sa Israel. (1 Samuel 17:34, 35; 2 Samuel 7:8) Sa unang bersikulo niini nga salmo, si Jehova gihubit ingong Magbalantay nga nagagiya, nagapakaon, ug nagapalagsik sa iyang mga magsisimba, sama sa ginahimo sa literal nga magbalantay ngadto sa iyang mga karnero.​—Salmo 23:1-3.

Sa Salmo 23:4, dihang gipasiugda ni David ang pagpanalipod sa Diyos kaniya, iya nang gigamit ang pulong nga “ikaw” sa pagtumong sa Diyos ug dili na ang “niya.” Kining gamay nga kausaban nagpakita kon unsa ka suod si David kang Jehova. Nahibalo si David nga gimahal siya sa Diyos ug nasayod ang Diyos sa mga pagsulay nga iyang giatubang. Tungod niana, wala mahadlok si David.

Sa mosunod nga duha ka bersikulo sa Salmo 23, sa bersikulo 5 ug 6, nausab ang ilustrasyon​—gikan sa magbalantay ug sa iyang karnero ngadto sa usa ka tagbalay ug sa iyang bisita. Samag maabiabihong tagbalay, gitratar ni Jehova si David ingong espesyal nga bisita. Gani ang mga kaaway ni David dili makapugong sa Diyos sa pag-atiman kaniya. Sa kataposan niini nga salmo, gipahayag ni David ang iyang dakong pagsalig nga ang Diyos padayong magpakita kaniyag kaayo ug gugma sa tibuok niyang kinabuhi.

Ang ilustrasyon nga gigamit sa Salmo 23 nagpakita sa mahigugmaong pag-atiman nga padayong gitagana sa Diyos sa iyang mga magsisimba.—1 Pedro 2:25.