Galacia 6:9—“Dili Kita Angayng Pul-an sa Pagbuhat ug Maayo”

“Dili ta mohunong sa pagbuhat ug maayo, kay sa takdang panahon kita moani kon dili ta maluya.”—Galacia 6:9, Bag-ong Kalibotang Hubad.

“Dili kita angayng pul-an sa pagbuhat ug maayo, kay kon magpadayon kita, moabot gayod ang panahon nga madawat nato ang ganti.”—Galacia 6:9, Ang Pulong sa Dios.

Kahulogan sa Galacia 6:9

Gidasig ni apostol Pablo ang mga Kristohanon nga magpadayon sa pagbuhat sa kon unsay maayo sa panglantaw sa Diyos. Kon ila nang buhaton, makasalig sila nga gantihan sila sa Diyos.

“Dili ta mohunong.” Kini nga prase puwedeng hubaron nga “dili kita angayng mapul-an o kapoyon.” Ang termino nga gigamit sa orihinal nga pinulongan puwede sab magpasabot nga dili maluya o mawad-ag kadasig. Pinaagi sa pag-apil ni apostol Pablo sa iyang kaugalingon sa dihang iya ning gisulti, gipakita niya nga dihay mga panahon nga mibati sab siyag kaluya.—Roma 7:21-24.

“Maayo.” Kini naglakip sa tanang butang nga angayng buhaton sa usa ka Kristohanon sa pag-alagad sa Diyos. Apil niini ang mga buhat nga iyang himoon alang sa kaayohan sa iyang mga isigkamagtutuo ug sa uban.—Galacia 6:10.

“Sa takdang panahon kita moani kon dili ta maluya.” Gipahinumdoman ni Pablo ang iyang mga magbabasa nga nagkinahanglan tingalig panahon ayha makita ang mga kaayohan sa pagbuhat ug maayo, sama nga nagkinahanglag panahon ang pagtubo sa tinanom sa usa ka mag-uuma. Pinaagi sa paghisgot sa pag-ani, gipakita ni Pablo ang koneksiyon niini nga bersikulo sa pangunang kamatuoran nga gihisgotan sa bersikulo 7: “Kon unsay gipugas sa usa ka tawo, mao pod ang iyang anihon.” Sa ato pa, dihang buhaton sa usa ka Kristohanon kon unsay maayo sa panglantaw sa Diyos, moani siyag dakong ganti, apil ang kinabuhing walay kataposan.—Roma 2:6, 7; Galacia 6:8.

Konteksto sa Galacia 6:9

Gisulat ni apostol Pablo kini nga sulat ngadto sa mga Kristohanon sa Galacia niadtong mga 50-52 C.E. Iya tong gihimo aron dili sila maimpluwensiyahan sa mga indibiduwal nga nag-angkong mga Kristohanon pero nagtuis sa kamatuoran bahin kang Jesus. (Galacia 1:6, 7) Kining bakak nga mga magtutudlo miinsistir nga kinahanglang mosunod ang mga Kristohanon sa Balaod nga gihatag sa Diyos sa karaang nasod sa Israel pinaagi kang Moises. (Galacia 2:15, 16) Gipatin-aw ni Pablo nga natuman na sa Balaod ang katuyoan niini ug dili na ni kinahanglang sundon sa mga magsisimba sa Diyos.—Roma 10:4; Galacia 3:23-25.

Dihang gidasig ni Pablo ang iyang mga isigka-Kristohanon nga magpadayon sa “pagbuhat ug maayo,” wala siya magtumong sa pagsunod sa Moisesnong Balaod. Hinuon, iyang gidasig sila sa ‘pagtuman sa balaod sa Kristo,’ nga naglakip sa tanan nga gitudlo ni Jesus bahin sa pagbuhat ug maayo ngadto sa uban.—Galacia 6:2; Mateo 7:12; Juan 13:34.

Tan-awa kining mubo nga video nga nagsumaryo sa basahon sa Galacia.