Pagdepensa sa Kagawasan sa Relihiyon sa Atong Lumad nga mga Igsoon

Sa ginatos ka milyong tawo nga nagpuyo sa Latin America, minilyon ang dunay kaugalingong lumad nga pinulongan ug kostumbre. Daghan niini nga mga lumad maoy mga igsoon nato sa pagtuo, nga nagpabili sa ilang kultura. Aron matudloan ang mga tawo bahin sa kamatuoran, sila naghubad ug nag-apod-apod ug mga publikasyon sa mga Saksi ni Jehova sa kapig 130 ka lumad nga pinulongan sa Latin America.a Bisan pa niini, pipila kanila ang gisupak kay gipili nila nga alagaran si Jehova ug wala sila mag-apil-apil sa dili Kasulatanhong mga kostumbre nga komon sa ilang komunidad. Sa unsang paagi ang inyong mga donasyon nakatabang nila?

Natabangan nga Makabalik sa Ilang Lugar

Sa Mexico, ang atong mga igsoon sa Huichol nga komunidad diha sa kabukiran sa Jalisco State wala moapil sa relihiyosong mga kalihokan nga supak sa ilang konsensiya.b Tungod niini, nasuko ang pipila sa ilang komunidad. Niadtong Disyembre 4, 2017, dihay panon sa bayolenteng mga tawo nga miatake sa grupo sa mga Saksi ug sa ilang mga kauban. Ila silang gipugos nga mohawa sa komunidad, gidaot ang ilang propidad, ug gihulga nga patyon si bisan kinsa nga mobalik.

Giatiman sa mga Saksi sa silingang mga lungsod ang atong mga igsoon ug gitagan-an sa ilang mga panginahanglan. Pero unsay angayng himoon aron makabalik sila sa ilang lugar? Ang brader nga si Agustín miingon, “Wala mi igong kuwarta sa pagkuhag abogado, ug wala mi mahibalo kon asa mi mangayog legal advice.”

Kay giatake ang katungod sa pagsimba sa atong mga igsoon, milihok dayon ang sangang buhatan sa Central America. Una, gihangyo nila ang lokal nga mga opisyales nga imbestigahan ang maong mga krimen. Dayon, nakadawat silag approval gikan sa Komite sa mga Koordinetor sa Nagamandong Lawas sa mga Saksi ni Jehova nga mo-coordinate sila sa Legal Department sa hedkuwarter ug mopasakag kaso para sa atong Huichol nga mga igsoon. Ang kaso nakaabot sa Supreme Court of Justice of the Nation—ang kinatas-ang korte sa Mexico.

Usa ka grupo sa mga abogado gikan sa lainlaing nasod ang nangandam ug tin-awng argumento. Sila miingon nga sama nga ang uban angayng motahod sa kultura sa mga lumad, ang lumad nga mga komunidad mismo angayng motahod ug manalipod sa katungod sa tanang membro niini. Ang tanang tawo dunay mga katungod bisag asa man sila nagpuyo.

Niadtong Hulyo 8, 2020, ang Supreme Court of Justice nagkahiusa sa pagpakanaog ug desisyon pabor sa mga Saksi ni Jehova. Sila mimando nga kadtong tanan nga gipapahawa tugotan nga makabalik sa ilang komunidad. Si Agustín, nga gihisgotan ganina, nagpaabot sa ilang apresasyon: “Mapasalamaton ug malipayon kaayo mi sa gihimo sa mga igsoon para namo. Mag-unsa na lang kaha mi kon wala mi nila tabangi?”

“Dakong Butang Para sa usa ka Gamayng Grupo”

Nakasinati pod ug samang pagsupak ang atong mga igsoon sa San Juan de Ilumán, usa ka baryo sa Ecuador nga gipuy-an ug daghang lumad sa Otavalo Valley. Niadtong 2014, human makuha ang tanang gikinahanglang permit, sila nagsugod pagtukod ug Kingdom Hall. Pero gipugos sila sa kapig 100 ka tawo, nga gipangunahan sa usa ka pari, nga hunongon ang pagtukod. Unya gimandoan sa komunidad ang mga Saksi ni Jehova nga hunongon ang ilang mga panagkatigom.

Ang legal department sa sangang buhatan sa Ecuador ug sa tibuok kalibotang hedkuwarter nagtinabangay sa pagdepensa sa kagawasan sa pagsimba sa atong mga igsoon. Gisang-at nila kini sa korte. Tungod niini, gihunong sa komunidad ang ilang pagsupak sa atong mga igsoon. Gitugotan pod ang kongregasyon nga ibalik ang ilang mga tigom ug humanon ang pagtukod sa ilang Kingdom Hall. Pero aron mapanalipdan sa umaabot ang katungod sa atong mga igsoon, ang atong mga representante mihangyo sa mas taas nga mga korte sa pagpakanaog ug desisyon bahin sa usa ka importanteng isyu: Angay bang tahoron sa lumad nga mga komunidad ang international human rights (mga tawhanong katungod nga giila sa tibuok kalibotan)?

Niadtong Hulyo 16, 2020, gihimo ang husay sa Constitutional Court of Ecuador, ang kinatas-ang korte sa nasod. Girepresentahan sa mga igsoong abogado sa Ecuador ang kongregasyon. Dugang pa, upat nato ka igsoon, nga eksperyensiyadong mga abogado gikan sa lainlaing nasod, ang miatubang sa korte. Tungod sa mga restriksiyon sa COVID-19, gihimo ang husay pinaagig videoconference. Kini ang unang higayon nga gitugotan sa usa ka korte ang legal team sa mga Saksi ni Jehova sa tibuok kalibotan sa pagpresentar ug mga argumento niining paagiha.c Gihisgotan nila nga sumala sa internasyonal nga mga balaod, dili mawala ang tawhanong mga katungod sa usa ka indibiduwal tungod lang kay siya bahin sa lumad nga komunidad.

Ang atong mga igsoon sa Otavalo Valley naghinamhinam sa desisyon sa Constitutional Court. Ug samtang naghulat, mapasalamaton kaayo sila sa tabang nga ilang nadawat. Si César, nga nag-alagad ingong ansiyano sa Ilumán Quichua Congregation, miingon: “Si Jehova lang, pinaagi sa iyang organisasyon, ang mohimog ingon niini ka dakong butang para sa usa ka gamayng grupo.”

Ang tanang abogado nga midepensa sa atong mga igsoon maoy mga Saksi ni Jehova, ug nalipay sila sa pagtabang nga walay bayad. Pero ang pagsang-at niini nga mga kaso, pagpangandam, ug pagdepensa niini sa korte nagkinahanglag panahon ug kuwarta. Ang atong mga abogado ug ubang igsoon naggugol ug kapig 380 ka oras sa pagpangandam sa mga argumento ug 240 ka oras sa paghubad sa mga dokumento para sa husay didto sa Mexico. Halos 40 ka abogado gikan sa lainlaing nasod ang naggugol ug gatosan ka oras para sa kaso sa Ecuador. Asa gikuha ang gasto nga gigamit sa pagdepensa sa atong mga igsoon? Gikan sa inyong mga donasyon nga gihatag gamit ang mga paagi nga makita sa donate.jw.org. Daghang salamat sa inyong pagkamahinatagon.