KON hatagag asaynment sa pakigpulong, ang daghan maghago sa pagsulat niana sa katibuk-an, sugod sa introduksiyon ug hangtod sa konklusyon. Sa dili pa makompleto ang pakigpulong, mahimong daghang laraw na ang nahimo. Mahimong dangtag mga oras ang maong proseso.

Mao ba kanay paagi sa imong pag-andam ug mga pakigpulong? Buot mo bang makat-onan ang mas sayon nga paagi? Kon makat-onan mo ang paagi sa paghimog usa ka laraw sa pakigpulong, dili kinahanglan nga isulat mo ang katibuk-ang pakigpulong. Kini makahatag kanimog mas dakong panahon sa pagbansay sa pagpahayag sa pakigpulong. Unya ang imong mga pakigpulong dili lang mas sayon nga ipahayag kondili mas makaiikag nga pamation ug mas makapalihok sa imong mamiminaw.

Hinuon, alang sa mga pakigpulong publiko nga ipahayag diha sa kongregasyon, gitagana ang paninugdang laraw. Ugaling, dili kini tinuod sa kadaghanang laing mga pakigpulong. Mahimong iasayn lamang kanimo ang usa ka ulohan o usa ka tema. O basin hangyoon ka nga hisgotan ang espesipikong pinatik nga materyal. Basin may panahong hatagan ka lang ug pipila ka instruksiyon. Nianang tanang asaynment, kinahanglan nga ikaw mag-andam ug imong kaugalingong laraw sa pakigpulong.

Ang sampol sa panid 41 maghatag kanimog ideya kon unsaon paghan-ay ang usa ka mubong laraw. Matikding ang matag usa sa pangunang mga punto nagsugod diha sa wala nga panaplin ug gisulat sa kapital nga mga letra. Ilalom sa matag pangunang punto ang mga ideya nga mosuportar niini gilista. Ang dugang mga puntong gamiton sa paghan-ay sa maong mga ideya gilista sa ilalom niana ug layolayo diha sa wala nga panaplin. Susihag maayo kining larawa. Matikding ang duha ka pangunang punto direktang nalangkit sa tema. Tan-awa, usab, nga ang mga punto sa ilalom niana dili lamang kay makaiikag nga impormasyon. Hinunoa, ang matag usa nagsuportar sa pangunang puntong makita ibabaw niana.

Sa dihang mag-andam kag usa ka laraw, basin kini dili kaayo pareho sa sampol. Apan kon nakasabot ka sa mga prinsipyong nalangkit, kini makatabang kanimo sa pag-organisar sa imong materyal ug sa pag-andam ug maayong pakigpulong sa hustong panahon. Sa unsang paagi mahimo nimo kini?

Analisaha, Pilia, ug Organisaha

Gikinahanglan mo ang usa ka tema. Ang imong tema dili lang kay usa ka malangkobong ulohan sama pananglitan sa girepresentahan ug usa lang ka pulong. Ang sentral nga ideya mao ang gusto nimong ipasa, ug kini magpaila sa punto nga mahimong sinugdanan sa giplano nimong paghisgot sa imong ulohan. Kon usa ka tema ang giasayn, analisaha pag-ayo ang matag pangunang pulong. Kon han-ayon mo ang giasayn nga tema pinasukad sa pinatik nga materyal, tun-i ang maong materyal uban nianang temaha sa hunahuna. Kon usa lang ka ulohan ang giasayn kanimo, nan bahala ka na nga mopilig usa ka tema. Bisan pa niana, sa dili pa nimo himoon kana, ang paghimog panukiduki basin makatabang kanimo. Pinaagi sa paghupot ug madinawatong hunahuna, sagad nga makabaton kag dugang mga ideya.

Samtang maghimo ka sa maong mga tikang, ipadayon ang pagsukna sa imong kaugalingon: ‘Nganong kining materyala hinungdanon alang sa akong mamiminaw? Unsa man ang akong tumong?’ Ang imong tumong angay nga dili lang mao ang paghisgot sa materyal o pagpahayag ug makaiikag nga pakigpulong kondili mao ang pagpalampos ug butang nga makaayo sa imong mamiminaw. Sa dihang mahan-ay na ang imong tumong, isulat kana. Kanunayng pahinumdomi ang imong kaugalingon niana samtang mangandam ka.

Human matino ang imong tumong ug makapilig usa ka temang nahiuyon niana (o makaanalisar kon sa unsang paagi ang tema nga naasayn kanimo mohaom sa maong tumong), ikaw makahimo sa panukiduki nga may direksiyon. Pangita ug materyal nga ilabinang bililhon alang sa imong mamiminaw. Ayawg kakontento sa malangkobong mga impormasyon, kondili pangitag espesipikong mga punto nga matulon-anon ug tinuod nga mapuslanon. Mahimong realistiko sa gidak-on sa panukiduki nga imong himoon. Sa kadaghanang hitabo, dali kang makabaton ug mas daghang materyal kay sa imong magamit, busa magmapilion.

Ilha ang pangunang mga punto nga imong pagahisgotan diha sa paghan-ay sa imong tema ug sa pagkab-ot sa imong tumong. Kini maoy mahimong imong bayanan, imong pangunang laraw. Pila ka pangunang mga punto ang gikinahanglan? Ang duha basin igo na alang sa mubong paghisgot, ug sagad ang lima igo na alang sa usa ka oras nga diskurso. Kon diyutay lang ang pangunang mga punto, ang imong mamiminaw lagmit nga mahinumdom niana.

Sa dihang anaa na sa hunahuna ang imong tema ug ang pangunang mga punto, organisaha ang materyal nga imong nadukiduki. Tinoa kon unsa ang may direktang kalangkitan sa imong pangunang mga punto. Pilia ang mga detalye nga makadugang sa pagkabag-o sa estilo sa imong presentasyon. Sa dihang ikaw mopilig mga kasulatan aron isuportar sa pangunang mga punto, matikdi ang mga ideya nga makatabang kanimo sa pagpangatarongan sa makahuloganong paagi pinasukad nianang mga tekstoha. Ibutang ang matag ideya ilalom sa pangunang punto nga angayan niana. Kon ang pipila ka impormasyon dili mohaom sa bisan hain sa imong pangunang mga punto, ihikling kana​—bisan pag makaiikag kaayo​—o ibutang kana sa payl aron magamit sa laing higayon. Tipigi lamang ang kinamaayohang materyal. Kon sulayan nimo ang pagkobreg daghan kaayo, kinahanglang paspasan nimo kaayo ang pagsulti ug ang imong paghisgot dili magmabug-oson. Mas maayong ipasa ang pipila ka puntong tinuod nga bililhon sa mamiminaw ug ayoha ang pagpasa niana. Ayaw pag-obertaym.

Niining tungora kon wala pa nimo kini mahimo, han-aya ang imong materyal sa makataronganong paagi. Kini mao ang gihimo sa magsusulat sa Ebanghelyo nga si Lucas. Kay nakahipos ug daghang kasayoran mahitungod sa iyang ulohan, kana iyang gihikay “sa makataronganong kahan-ayan.” (Luc. 1:3) Mahikay nimo ang imong materyal sumala sa petsa o topiko, mahimong sumala sa hinungdan ug epekto o sa problema ug solusyon, depende kon unsay labing epektibo aron makab-ot ang imong tumong. Dili angay ang kalit nga pagbalhin gikan sa usa ka ideya ngadto sa lain. Ang imong mga tigpatalinghog angay nga agakon sa madali gikan sa usa ka ideya ngadto sa lain, nga walay mga kal-ang nga dili daling masumpay. Ang ebidensiyang gipresentar angayng moagak sa mamiminaw ngadto sa makataronganong mga konklusyon. Samtang imong hikayon ang imong mga punto, palandonga kon unsay hunahuna sa imong mamiminaw bahin niana. Dali ba silang makasunod sa imong hunahuna? Matukmod ba sila sa paglihok pinasukad sa ilang madungog, nga nahiuyon sa tumong nga anaa sa imong hunahuna?

Sunod, andama ang introduksiyong mopukaw sa interes diha sa imong ulohan ug magpakita sa imong mamiminaw nga ang imong hisgotan bililhon gayod kanila. Basin makatabang ang pagsulat sa imong unang pipila ka tudlingpulong. Sa kataposan, planoha ang makapalihok nga konklusyon nga nahiuyon sa imong tumong.

Kon sayo ang imong pag-andam sa imong laraw, may panahon ka sa paghashas niana una nimo ipahayag ang pakigpulong. Basin makita nimong ang pipila ka ideya kinahanglang suportahan ug pila ka estadistika, ilustrasyon, o eksperyensiya. Ang paggamit ug bag-ong panghitabo o balita nga makapaikag sa lokal basin makatabang sa imong mamiminaw sa pagkasabot dayon sa pagkaangayan sa materyal. Samtang imong repasohon ang imong pakigpulong, basin masayran mo ang dugang higayon nga ipasibo ang materyal sa imong mamiminaw. Ang proseso sa pag-analisar ug paghashas gikinahanglan aron mahan-ay ang maayong materyal ingong usa ka epektibong pakigpulong.

Ang pipila ka mamumulong basin nagkinahanglag mas daghang nota kay sa uban. Apan kon organisahon nimo ang imong materyal sa ilalom sa pipila lang ka pangunang punto, ihikling ang dili gayod mosuportar niini, ug ipahimutang ang imong mga ideya sa makataronganong kahan-ayan, madiskobrehan nimong uban sa diyutayng kasinatian, dili kinahanglang isulat nimo ang katibuk-ang pakigpulong. Makadaginot gayod kana ug panahon! Ug ang kalidad sa imong mga pakigpulong mouswag. Unya madayag nga ikaw nakabaton gayod ug kaayohan sa imong edukasyon sa Teokratikanhong Tunghaan sa Ministeryo.

UBAN sa matag asaynment sa tunghaan anaa ang kahigayonan sa pag-uswag. Magmakugihon gayod, ug ang imong pag-uswag inanayng madayag kanimo ug sa uban. (1 Tim. 4:15) Ang tunghaan makatabang kanimo sa pag-ugmad nga bug-os pa sa imong mga katakos.

Kulbaan ka ba samtang nagpaabot nga mosulti sa atubangan sa kongregasyon? Kini maoy normal, bisan pag dugaydugay ka nang nalista sa tunghaan. Hinuon, makatabang ang pipila ka butang sa pagpakunhod sa imong kabalaka. Sa balay, himoang batasan ang kanunay nga pagbasag kusog. Sa mga tigom sa kongregasyon, komento kanunay, ug kon ikaw usa ka magmamantala, makigbahin nga regular sa pagsangyaw sa kanataran. Kini mohatag kanimog eksperyensiya sa pagsulti atubangan sa uban. Dugang pa, pangandam nga abante kaayo sa imong mga asaynment ingong estudyante, ug pagbansay sa pagpahayag nga kusog niana. Hinumdomi nga mosulti ka sa atubangan sa mahigalaong mamiminaw. Sa dili ka pa motindog aron mohatag sa pakigpulong, pag-ampo kang Jehova. Siya malipay sa paghatag sa balaang espiritu sa iyang mga alagad nga mangayo kaniya.​—Luc. 11:13; Filip. 4:​6, 7.

Magmakataronganon sa imong mga pagdahom. Ang panahon gikinahanglan aron mabatonan ang kasinatian ingong mamumulong ug aron mahimong epektibong magtutudlo. (Miq. 6:8) Kon bag-o kang nalista sa tunghaan, ayaw pagdahom nga makahatag dayon ug hinashasang pakigpulong. Hinunoa, pauswaga ang usa ka hiyas sa pakigpulong sa usa ka panahon. Tun-i ang seksiyon niining basahona nga naghisgot niini. Kon posible, tumana ang mga paagi sa pagbansaybansay nga gisugyot dinha. Kini makahatag kanimog eksperyensiya sa mga butang nga nalangkit sa punto sa tambag sa dili ka pa mohatag sa imong asaynment sa kongregasyon. Ang pag-uswag moabot ra.

Kon Unsaon Pagpangandam ang Asaynment sa Pagbasa

Mas dako ang nalangkit sa pagpangandam sa publikong pagbasa kay sa pagkaarang sa paglitok lamang sa mga pulong sa giasayn nga materyal. Paningkamot sa pagsabot nga tin-aw sa kahulogan sa materyal. Inigkadawat nimo sa asaynment, basaha kana nga ang maong tumong anaa sa hunahuna. Paningkamoti nga hisabtan ang punto sa matag tudlingpulong ug ang ideyang nahan-ay sa matag parapo aron ikapasa nimo ang mga ideya sa tukmang paagi ug uban ang angayng pagbati. Kon mahimo, susiha ang diksiyonaryo alang sa hustong paglitok sa dili-sinating mga pulong. Sayra pag-ayo ang materyal. Ang mga ginikanan makatabang sa ilang mga bata sa paghimo niini.

Nahatagan ka na bag asaynment sa pagbasag usa ka bahin sa Bibliya o mga parapo sa usa ka artikulo sa Ang Bantayanang Torre? Kon ang mga audiocassette sa maong materyal anaa sa inyong pinulongan, makatabang kaayo ang pagpamati sa pagbasa ug pagmatikod sa mga butang sama sa paglitok, estilo sa pagpahayag, pagpasiugda, ug pag-usab-usab sa tingog. Unya sulayi nga ipadapat kining mga hiyasa diha sa imong pagbasa.

Sa dihang mosugod ka na sa pagpangandam sa imong asaynment, seguroa nga matun-an pag-ayo ang leksiyon nga naghisgot sa hiyas sa pagpanulti nga giasayn kanimo. Kon mahimo, repasoha kini human nga mabansay nimo sa makadaghan ang pagbasag kusog sa giasayn nga materyal. Paningkamoti nga bug-os nga ikapadapat kutob sa mahimo ang maong sinulat nga tambag.

Kining pagbansaya makatabang kaayo sa imong ministeryo. Samtang makig-ambit ka sa pagsangyaw sa kanataran, ikaw adunay daghang kahigayonan sa pagbasa ngadto sa uban. Sanglit ang Pulong sa Diyos adunay gahom sa pagbag-o sa mga kinabuhi sa mga tawo, hinungdanon nga maayo ang imong pagbasa niini. (Heb. 4:12) Ayawg damha nga mahanas ka sa tanang bahin sa epektibong pagbasa human sa usa o duha ka asaynment. Ngadto sa usa ka Kristohanong ansiyano nga may daghang tuig nga kasinatian, si apostol Pablo misulat: “Magmakugihon diha sa publikong pagbasa.”​—1 Tim. 4:13.

Pagpangandam sa Tema ug Tagboanan

Sa dihang makadawat kag usa ka asaynment sa tunghaan nga naglangkit sa paghimog usa ka tagboanan (setting), unsaon nimo paghimo kana?

Tulo ka pangunang butang ang pagatagdon: (1) ulohang giasayn kanimo, (2) tagboanan ug ang tawo nga imong pakigsultihan, ug (3) ang puntong gitambag nga maoy imong pauswagon.

Angay nga magtigom kag impormasyon bahin sa ulohang giasayn kanimo. Apan sa dili ka pa maokupado kaayo niana, hinuktoki ang imong tagboanan ingon man ang tawo nga imong pakigsultihan, kay kining mga butanga may relasyon sa matang sa materyal nga imong pagahisgotan ug sa paagi sa imong pagpresentar niana. Unsang tagboanan ang imong gamiton? Ipasundayag mo ba ang paagi sa pagpresentar sa maayong balita ngadto sa usang kaila nimo? O ipakita ba nimo kon unsay mahimong mahitabo sa dihang makahibalag ug usa ka tawo sa unang higayon? Kanang tawhana ba mas gulang o mas bata kay kanimo? Unsa ba ang iyang tinamdan bahin sa ulohan nga giplano nimong hisgotan? Unsa ka daghan ang lagmit iya nang nahibaloan bahin niini? Unsang tumong ang gilaoman mong makab-ot ingong resulta sa inyong panaghisgot? Ang mga tubag sa maong mga pangutana motaganag hinungdanong mga latid nga gamiton nimo sa pagpangandam.

Asa ka ba mangitag materyal bahin sa ulohang giasayn? Sa mga panid 33 ngadto sa 38 niining basahona, adunay usa ka paghisgot bahin sa “Kon Unsaon Paghimo ang Panukiduki.” Basaha kini, ug unya gamita ang mga galamiton sa panukiduki nga anaa. Sa daghang kahimtang dali kang makakitag daghang materyal kay sa imong magamit. Pagbasag igo aron mahibaloan mo ang posibleng materyal nga anaa. Hinunoa, samtang ginahimo mo kana, ibutang sa hunahuna ang tagboanan nga imong gamiton alang sa imong presentasyon ingon man ang tawong imong pakigsultihan. Badlisi ang mga punto nga angay nga gamiton.

Sa dili pa nimo organisahon ang imong presentasyon ug himoon ang kataposang pagpili sa mga detalye, gahinig panahon ang pagbasa sa seksiyon bahin sa talambagan nga punto nga giasayn kanimo. Ang pagpadapat sa maong tambag maoy usa sa pangunang mga hinungdan sa imong asaynment.

Pinaagi sa pagkobre sa imong materyal sa panahong gitugot, may kahimuot ka sa paghatag sa imong konklusyon, sanglit ang senyas ihatag inigkahurot na sa panahong gitugot. Hinuon, sa atong pagsangyaw sa kanataran, ang tayming dili bililhon sa kanunay. Busa samtang mangandam ka, tagda ang gidaghanon sa panahong gitugot, apan kanunayng ipasiugda ang epektibong pagtudlo.

Pahimatngon Bahin sa mga Tagboanan. Susiha ang mga sugyot sa panid 82, ug pagpilig usa nga mahimong praktikal diha sa imong ministeryo ug nga motugot kanimo sa paggamit nga realistiko sa naasayn nga materyal. Kon ikaw dugaydugay nang apil sa tunghaan, isipa kini nga usa ka higayon sa pagpauswag ug pag-ugmad sa dugang nga mga kahanas alang sa imong ministeryo.

Kon ang magtatan-aw sa Teokratikanhong Tunghaan sa Ministeryo mohatag sa tagboanan, dawata ang hagit. Ang kadaghanang tagboanan naglangkit sa pagsangyaw. Kon wala ka pa sukad makasangyaw sa mga kahimtang nga gibatbat, panguhag mga ideya pinaagi sa pagpakigsulti sa mga magmamantala nga nakahimo na niana. Kon posible, sulayi ang paghisgot sa naasayn kanimo nga ulohan diha sa usa ka tagboanan nga imong gamiton diha sa tunghaan. Makatabang kini kanimo sa pagkab-ot sa usa ka hinungdanong tumong sa imong pagbansay.

Sa Dihang ang Pagpahayag Maoy sa Dagway nga Pakigpulong

Kon ikaw lalaki, tingali hatagan kag asaynment sa pagpresentar ug mubong pakigpulong ngadto sa kongregasyon. Sa pagpangandam sa maong mga pakigpulong, ang paninugdang mga punto nga pagatagdon maoy susama nianang nalista na alang sa mga asaynment sa estudyante sa paaging mga demonstrasyon. Ang dagkong mga kalahian mao ang mamiminaw ug ang paagi sa presentasyon.

Sagad maayo ang pag-andam sa imong materyal aron ang tanang mamiminaw makabatog kaayohan gikan niana. Ang kadaghanan sa mga tumatambong nahibalo na sa paninugdang mga kamatuoran sa Bibliya. Basin sila nahibalo na kaayo sa ulohan nga giasayn kanimo nga ipakigpulong. Tagda kon unsay nahibaloan na nila bahin sa imong ulohan. Paningkamoting makabaton silag kaayohan sa imong presentasyon. Suknaa ang imong kaugalingon: ‘Sa unsang paagi magamit ko ang akong ulohan aron molalom ang akong apresasyon ug ang iya sa akong mamiminaw alang kang Jehova ingong usa ka persona? Unsa bay anaa sa materyal nga motabang kanamo sa pag-ila sa kabubut-on sa Diyos? Sa unsang paagi ang maong materyal motabang kanamo sa paghimog maayong mga desisyon taliwala sa kalibotang gigamhan sa unodnong mga tinguha?’ (Efe. 2:3) Ang makapatagbawng mga tubag nianang mga pangutanaha nagkinahanglag panukiduki. Sa dihang magagamit sa Bibliya, panlimbasogi nga dili lang kay basahon ra ang mga teksto. Mangatarongan pinasukad sa mga kasulatan nga imong gigamit, ug ipakita kon sa unsang paagi kini mahimong pasikaranan sa mga konklusyon. (Buh. 17:​2, 3) Ayaw hisgoti ang daghan kaayo. Ipresentar ang imong materyal sa paagi nga sayon unya ang paghinumdom.

Ang pagpangandam angayng maglakip usab sa paghatag ug pagtagad sa imong pagpahayag. Ayaw kinig sayonsayona lamang. Pagbansay sa paghatag sa imong pakigpulong nga igong madungog. Ang panlimbasog nga imong himoon diha sa pagtuon ug sa pagpadapat sa tambag bahin sa nagkalainlaing mga hiyas sa pagpanulti makatabang ug dako sa imong pag-uswag. Kon ikaw bag-ohang mamumulong o eksperyensiyado, pangandam pag-ayo aron makasulti ka uban ang kombiksiyon ug pagbating nahiangay sa imong materyal. Samtang pagatumanon mo ang matag asaynment sa tunghaan, hinumdomi nga ang tumong sa paggamit sa imong hinatag-sa-Diyos nga gasa sa pagpanulti maoy aron pasidunggan si Jehova.​—Sal. 150:6.

ANG programa sa Teokratikanhong Tunghaan sa Ministeryo giandam aron makahatag kaayohan sa tibuok kongregasyon. Ang hinungdanong impormasyon gipresentar usab sa ubang mga tigom sa kongregasyon ingon man sa mga asembliya ug mga kombensiyon. Kon ikaw gihatagag bahin sa usa niining mga programaha, ikaw gisang-atan ug bug-at nga kaakohan. Giawhag ni apostol Pablo ang Kristohanong magtatan-aw nga si Timoteo nga tagdon kanunay ang iyang pagpanudlo. (1 Tim. 4:16) Silang presente sa Kristohanong mga tigom nagagahin ug bililhong panahon​—ug ang uban naghimog dakong paningkamot—​nga makatambong alang sa instruksiyon maylabot sa ilang relasyon sa Diyos. Ang paghatag sa maong instruksiyon dako uyamot nga pribilehiyo! Sa unsang paagi maatiman nimo kinig maayo?

Mga Haylayt Gikan sa Pagbasa sa Bibliya

Kining bahina sa tunghaan gipasukad sa pagbasa sa Bibliya nga naasayn sa maong semana. Kinahanglang ipasiugda kon sa unsang paagi ang materyal makaapektar kanato karon. Segun sa gitaho sa Nehemias 8:​8, si Esdras ug ang iyang mga kauban nagbasa sa Pulong sa Diyos diha sa publiko, nga nagpatin-aw niana, ‘naghatag kahulogan niana,’ ug nagpaambit sa pagsabot. Ang imong pagpresentar sa mga dagkong punto sa Bibliya maghatag usab kanimog kahigayonan sa pagbuhat niana.

Sa unsang paagi maandam nimo ang maong asaynment? Kon posible, basaha nga abanteg usa ka semana o labaw pa ang natudlong bahin sa Bibliya. Dayon hunahunaa ang imong kongregasyon ug ang mga panginahanglan niini. Pag-ampo bahin niana. Unsang mga tambag, mga pananglitan, mga prinsipyo niining bahina sa Pulong sa Diyos ang makatagana sa maong mga panginahanglan?

Ang panukiduki hinungdanon. Anaa ba sa imong pinulongan ang tapos-tuig nga indise sa Ang Bantayanang Torre? Kon mao, gamita kinig maayo. Pinaagi sa pagpanukiduki kon unsay napatik bahin sa mga bersikulo nga imong napiling ipasiugda, lagmit makakaplag ka ug makapatin-awng nagsuportar nga materyal, mga pagpasabot sa katumanan sa mga tagna, mga katin-awan kon unsay gibutyag sa tinong mga teksto bahin kang Jehova, o mga paghisgot bahin sa mga prinsipyo. Ayawg sulayi pagkobre ang daghan kaayong punto. Isentro ang atensiyon diha lamang sa pipila ka piniling mga bersikulo. Mas maayong mokobre lamag pipila ka bersikulo ug tagikon kanag maayo.

Ang imong asaynment mahimong nagkinahanglan usab nga dapiton mo ang mamiminaw nga mokomento kon sa unsang paagi sila nakabatog kaayohan sa pagbasa sa Bibliya sa semana. Unsay nakaplagan nila nga makahatag kanilag kaayohan sa ilang personal ug pamilyahanong pagtuon o sa ilang ministeryo o paagi sa kinabuhi? Unsang mga hiyas ni Jehova ang gipadayag sa iyang mga pagpakiglabot sa katawhan ug sa mga nasod? Unsay nakat-onan sa mamiminaw nga nakapalig-on sa ilang pagtuo ug nakatukod sa ilang pagpabili kang Jehova? Ayaw pagdugay diha sa detalyado ug komplikadong mga punto. Ipasiugda ang kahulogan ug praktikal nga bili sa gipiling mga punto.

Nagatudlong Pakigpulong

Kini ipasukad sa gipatik nga materyal, sama sa usa ka artikulo sa Ang Bantayanang Torre o Pagmata! o kaha sa usa ka bahin sa basahon. Kasagaran dunay daghang mabatonang materyal alang sa gitugot nga panahon. Unsaon man nimo pagpangandam ang asaynment? Ingon nga usa ka magtutudlo, dili kay yanong mamumulong nga magkobre lang ug materyal. Ang magtatan-aw kinahanglang “kuwalipikado sa pagpanudlo.”​—1 Tim. 3:2.

Sugdi ang imong pagpangandam pinaagi sa pagtuon sa naasayn nga materyal. Susiha ang mga teksto. Pamalandong. Paningkamoti nga buhaton kana nga abante kaayo sa petsa sa imong pakigpulong. Hinumdomi nga ang mga igsoon gidasig nga abanteng basahon ang gipatik nga materyal nga maoy gipasukaran sa pakigpulong. Ang imong asaynment maoy dili lamang pagrepaso o pagpamubo niana kondili aron ipakita kon unsaon pagpadapat niana. Gamita ang tukmang mga bahin sa materyal sa paaging makahatag gayod ug kaayohan sa kongregasyon.

Sama nga ang kada bata dunay kaugalingong personalidad, ang kada kongregasyon dunay lahi nga mga hiyas. Ang usa ka ginikanan nga epektibong motudlo dili lamang mosulti sa moral nga mga prinsipyo ngadto sa iyang anak. Siya mangatarongan uban sa bata. Iyang hatagag pagtagad ang personalidad ug ang mga suliran nga ginasagubang sa bata. Sa samang paagi, ang mga magtutudlo sa kongregasyon maningkamot sa pagsabot sa mga panginahanglan sa grupo diin sila magpakigpulong. Bisan pa niana, ang masinabotong magtutudlo dili mogamit ug mga pananglitan nga makapaulaw sa usa ka tawo nga mitambong. Iyang ipunting ang mga kaayohan nga ginatagamtam ingong sangpotanan sa pagsubay sa dalan ni Jehova ug ipasiugda ang tambag gikan sa Kasulatan nga makatabang sa kongregasyon sa pagdumala nga malamposon sa mga problema nga ilang ginaatubang.

Ang maayong pagpanudlo makatukbil sa mga kasingkasing niadtong maminaw. Kini nagkinahanglan nga dili lamang isaysay ang mga ebidensiya kondili sa pag-ugmad usab sa pagpabili kon unsay gihawasan niini. Nagkinahanglan kinig tiunay nga kabalaka alang niadtong ginatudloan. Ang espirituwal nga mga magbalantay kinahanglang makaila sa panon. Kon sila mahigugmaong magtagad sa mga problema nga ginaatubang sa nagkalainlaing mga igsoon, sila makasulti sa makapadasig nga paagi, makapakitag pagsabot, pagbati, ug empatiya.

Sumala sa nahibaloan sa epektibong mga magtutudlo, ang pakigpulong kinahanglang dunay tataw nga tumong. Ang materyal kinahanglang ipresentar sa paagi nga ang yawing mga punto molutaw ug mahinumdoman. Ang mamiminaw angayng makahinumdom sa praktikal nga mga ideya nga makaapektar sa ilang kinabuhi.

Tigom sa Pag-alagad

Kon magpakigpulong ka nga ipasukad sa usa ka artikulo sa Atong Ministeryo sa Gingharian, ang hagit daw lahi. Dinhi imong makaplagan nga ikaw sagad maobligar sa pagpasabot sa bug-os ngadto sa mamiminaw kon unsay gitagana, dili sa pagpili kon unsay labing tukma. Tabangi ang mamiminaw nga mangatarongan bahin sa mga kasulatan nga mao ang pasikaranan sa bisan unsang tambag nga ihatag. (Tito 1:9) Ang oras limitado, nga sa kasagaran dili motugot ug dugang materyal.

Sa laing bahin, ikaw basin iasayn nga mopresentar ug materyal nga ang artikulo wala diha sa Atong Ministeryo sa Gingharian. Ang reperensiya mahimong atua sa usa ka artikulo sa Bantayanang Torre, o ang asaynment tingali gisulat lang sa pipila ka pulong. Anaa na kanimo ingong magtutudlo ang pagkonsiderar sa mga panginahanglan sa kongregasyon maylabot sa naasayn nga materyal. Mahimo tingali nga mogamit kag mubo, pintok nga ilustrasyon o moasoy ug haom nga kasinatian. Hinumdomi nga ang imong asaynment maoy dili lamang sa pagpakigpulong bahin sa ulohan kondili sa pagpahayag niana sa paagi nga ang kongregasyon matabangan sa pagpalampos sa buluhaton nga gipakita diha sa Pulong sa Diyos ug sa pagkaplag ug kalipay sa pagbuhat sa ingon.​—Buh. 20:​20, 21.

Samtang mangandam ka sa imong asaynment, hunahunaa ang mga kahimtang sa mga igsoon nga naglangkob sa kongregasyon. Dayega sila sa ilang ginahimo. Sa unsang paagi ang ilang pagpadapat sa mga sugyot nga gihatag diha sa giasayn nga materyal magpauswag sa ilang pagkaepektibo ug kalipay diha sa ministeryo?

Ang imong asaynment duna bay pasundayag o interbiyo? Kon mao, kini angayng planohon nga abante kaayo. Basin madani ka nga mohangyo na lang ni bisan kinsa nga maoy mohimog mga kahikayan alang niini, apan sagad nga kana dili mosangpot sa labing maayong mga resulta. Kon posible gayod, bansaybansaya ang pasundayag o interbiyo sa dili pa ang adlaw sa tigom. Seguroha nga kining bahina sa imong pakigpulong mahimo sa paagi nga makapausbaw gayod sa instruksiyon nga ihatag.

Mga Asembliya ug mga Kombensiyon

Ang mga igsoon nga nakaugmad sa maayong espirituwal nga mga hiyas ug nahimong epektibong mga mamumulong ug mga magtutudlo sa publiko sa ngadtongadto basin hangyoon nga makabahin sa programa sa asembliya o kombensiyon. Kini gayod maoy espesyal nga mga okasyon sa teokratikanhong edukasyon. Kana nga asaynment mahimong ihatag ingong usa ka manuskrito, laraw, mga instruksiyon sa usa ka drama sa Bibliya nga may modernong-adlaw nga kapadapatan, o usa ka parapo sa mga instruksiyon. Kon makapribilehiyo ka sa pagbaton ug bahin sa ingon nga programa, sa maampingong paagi tun-i ang materyal nga gihatag kanimo. Tagika kana hangtod nga mapabilhan nimo ang bili niini.

Kadtong iasayn sa pakigpulong ginamit ang manuskrito kinahanglang mobasa sa materyal nga pulong por pulong. Dili nila usbon ang pamulong o pagkahan-ay sa materyal. Tun-an nila kini aron masabtan pag-ayo ang pangunang mga punto ug kon giunsa kini pagtagik. Magpraktis sila sa pagbasag kusog hangtod nga ilang mahatag ang pakigpulong nga may tukmang pagpasiugda, kadasig, kainit, pagbati, kasibot, ug kombiksiyon, ingon man hustong gikusgon sa tingog ug kapaspas nga haom sa daghang mamiminaw.

Ang mga igsoong lalaki nga maasayn sa pakigpulong ginamit ang laraw maoy responsable sa pagtagik sa ilang materyal sa paagi nga dili molayo sa laraw. Inay basahon ang laraw panahon sa pakigpulong o andamon kana ingon nga manuskrito, ang mamumulong kinahanglang mopakigpulong sa materyal sa ekstemporanyong paagi, nga kinasingkasing. Importante nga sundon ang gitugot nga oras diha sa laraw aron ikapatin-aw ang matag pangunang punto nga gipakita. Ang mamumulong kinahanglang mogamit ug maayo sa mga ideya ug mga kasulatan nga gilista ubos sa mga pangunang punto. Siya kinahanglang dili magdugang ug mga punto nga iya rang gusto nga dili na hinuon maapil ang anaa sa laraw. Siyempre, ang pasukaranan sa instruksiyon mao ang Pulong sa Diyos. Ang responsabilidad sa Kristohanong mga ansiyano mao ang ‘pagwali sa pulong.’ (2 Tim. 4:​1, 2) Busa ang mamumulong angayng maghatag ug linaing atensiyon sa mga teksto diha sa laraw​—nga mangatarongan ug magpadapat niana.

Ayaw Pag-unya-unya

Nag-alagad ka ba sa usa ka kongregasyon nga dunay daghang kahigayonan nga mopakigpulong? Unsaon man nimo paghatag ug igong atensiyon nianang tanan? Likayi ang pagpangandam sa imong mga bahin sa kataposang gutlo.

Ang mga pakigpulong nga makahatag gayod ug kaayohan sa kongregasyon nagkinahanglag igong pagpamalandong. Busa, batasana ang pagbasa sa materyal dihadiha inigkadawat nimo sa matag asaynment. Magpaarang kini kanimo sa pagpalandong niini samtang mopadayon ka sa uban pa nimong mga kalihokan. Sa mga adlaw o mga semana sa dili ka pa mopakigpulong, makadungog ka tingalig mga komento nga motabang nimo sa pagsabot kon unsaon pagpadapat sa impormasyon sa labing maayong paagi. Ang mga kahimtang basin motungha nga magbutyag sa pagkatukma niini sa panahon. Ang pagbasa ug paghunahuna sa imong asaynment human gilayon sa pagdawat mo niana nagkinahanglan ug panahon, apan kini maoy maayong pagkagamit nga panahon. Sa dihang sa kataposan molingkod ka na aron tagikon ang laraw, anihon mo ang mga kaayohan tungod sa pagpalandong niana nga abante kaayo. Ang pag-atiman sa mga asaynment niining paagiha makakunhod ug dako sa kapit-os ug motabang nimo sa pagpresentar sa materyal sa praktikal nga paagi ug makatukbil sa mga kasingkasing sa mga igsoon sa kongregasyon.

Sa gilapdon nga pabilhan mo ang gasa nga gisalig kanimo maylabot sa edukasyonal nga programa ni Jehova alang sa iyang katawhan, ikaw magpasidungog kaniya ug magpamatuod nga usa ka panalangin ngadto kanilang nahigugma kaniya.​—Isa. 54:13; Roma 12:​6-8.

KADA semana, ang kadaghanang kongregasyon sa mga Saksi ni Jehova maghikay ug usa ka pakigpulong publiko bahin sa usa ka Kasulatanhong ulohan. Kon ikaw usa ka ansiyano o ministeryal nga alagad, nagpamatuod ka ba nga usa ka epektibong mamumulong sa publiko, usa ka magtutudlo? Kon mao, mahimong dapiton ka nga mohatag ug pakigpulong publiko. Ang Teokratikanhong Tunghaan sa Ministeryo nakatabang na sa tinagpulo ka libong igsoong lalaki nga mokuwalipikar niining pribilehiyoa sa pag-alagad. Kon maasayn ka nga mohatag ug pakigpulong publiko, asa ka man angayng magsugod?

Tun-i ang Laraw

Sa dili ka pa manukiduki, basaha ang laraw ug palandonga kana hangtod nga imo kanang masabtan. Isilsil sa hunahuna ang tema, nga mao ang ulohan sa pakigpulong. Unsang butanga ang itudlo nimo sa imong mamiminaw? Unsay imong tumong?

Sinatia ang pangunang mga ulohan. Analisaha ang maong mga pangunang punto. Sa unsang paagi ang kada usa nalanggikit sa tema? Ubos sa matag pangunang punto, daghang segundaryong mga punto ang gilista. Ang mga punto nga nagpaluyo sa segundaryong mga punto gilista sa ubos niini. Matikdi kon giunsa pagpalig-on sa kada seksiyon sa laraw ang nag-unang punto, pag-agak ngadto sa sunod nga punto, ug pagtabang nga molampos ang tumong sa pakigpulong. Sa dihang masabtan na nimo ang tema, ang tumong sa pakigpulong, ug kon sa unsang paagi ang mga pangunang punto magpalampos sa maong tumong, nan andam ka nang mosugod sa pagtagik sa materyal.

Sa sinugdanan makaplagan mong makatabang nga isipon ang imong pakigpulong ingong upat o lima ka mugbong pakigpulong, nga ang kada usa dunay pangunang punto. Usa-usaha kini sa pagpangandam.

Ang gitaganang laraw maoy usa ka himan sa pagpangandam. Wala kini himoa aron magsilbing mga nota nga imong gamiton sa pagpahayag sa imong pakigpulong. Kini samag dugokan. Kinahanglang hatagan nimo kinig kaunoran, kasingkasing, ug kinabuhi, pagaingnon pa.

Paggamit sa Kasulatan

Si Jesu-Kristo ug ang iyang mga tinun-an nagpasukad sa ilang pagtulon-an diha sa Kasulatan. (Luc. 4:​16-​21; 24:27; Buh. 17:​2, 3) Makahimo ka usab sa ingon. Ang Kasulatan angay nga mahimong basehanan sa imong pakigpulong. Inay yanong isaysay ug ipadapat ang mga pulong nga gisulat diha sa gitaganang laraw, sabta kon sa unsang paagi kanang mga pulonga gisuportahan sa Kasulatan, ug dayon itudlo kana pinasukad sa Kasulatan.

Samtang mangandam ka sa imong pakigpulong, susiha ang kada bersikulo nga gisitar diha sa laraw. Matikdi ang konteksto. Ang ubang mga teksto mahimong nagtagana lamag mapuslanong nagpaluyong impormasyon. Dili kinahanglang basahon o komentohan ang tanang teksto panahon sa pakigpulong. Pilia ang mga tekstong magpulos gayod sa imong mamiminaw. Kon imong isentro ang atensiyon sa mga kasulatan nga gisitar diha sa gipatik nga laraw, lagmit dili ka na kinahanglang mogamit ug dugang Kasulatanhong mga reperensiya.

Ang kalamposan sa imong pakigpulong mag-agad, dili sa gidaghanon sa kasulatan nga gamiton, kondili sa kalidad sa pagtudlo. Sa dihang ipaila ang kasulatan, ipasabot kon nganong kini gigamit. Gahinig panahon ang pagpadapat niini. Human nimog basa sa usa ka teksto, ayaw itiklop ang imong Bibliya samtang ipatin-aw nimo ang teksto. Lagmit ingon usab niana ang buhaton sa imong mamiminaw. Unsaon nimo pagpukaw ang interes sa imong mamiminaw ug pagtabang nila nga makabatog kaayohan sa bug-os gikan sa Pulong sa Diyos? (Neh. 8:​8, 12) Mahimo nimo kini pinaagi sa pagpatin-aw, pag-ilustrar, ug pagpadapat.

Pagpatin-aw. Sa dihang mangandam nga ipatin-aw ang usa ka yawing teksto, pangutan-a ang kaugalingon: ‘Unsay ipasabot niini? Nganong gamiton ko kini sa akong pakigpulong? Unsay lagmit ipangutana sa mamiminaw sa ilang kaugalingon bahin niining bersikuloha?’ Kinahanglan tingaling analisahon mo ang konteksto, nagpaluyong impormasyon, tagboanan, puwersa sa mga pulong, ug ang katuyoan sa inspiradong magsusulat. Nagkinahanglan kinig panukiduki. Makakaplag kag dagayang hinungdanong impormasyon diha sa mga publikasyon nga gitagana sa “matinumanon ug maalamong ulipon.” (Mat. 24:45-47) Ayaw sulayi pagpatin-aw ang tanang butang bahin sa bersikulo, hinuon isaysay kon nganong ipabasa nimo kini sa imong mamiminaw maylabot sa puntong ginahisgotan.

Pag-ilustrar. Ang katuyoan sa mga ilustrasyon mao ang pag-agak sa imong mamiminaw ngadto sa mas lalom nga pagsabot o sa pagtabang kanila nga mahinumdoman ang usa ka punto o prinsipyo nga imong gihisgotan. Ang mga ilustrasyon moabag sa mga tawo nga masabtan ang imong gisulti kanila ug ilangkit kini sa impormasyon nga daan na nilang nahibaloan. Ingon niini ang gihimo ni Jesus sa dihang nagpakigpulong siya sa iyang bantog nga Wali sa Bukid. Ang “mga langgam sa kalangitan,” “mga lirio sa kapatagan,” usa ka “sigpit nga ganghaan,” usa ka “balay ibabaw sa dakong-bato,” ug daghan sa maong mga ekspresyon ang nagpahimo sa iyang pagpanudlo nga puwersado, tin-aw, ug di-malimtan.​—Mat., mga kapitulo 5–7.

Pagpadapat. Ang pagpatin-aw ug pag-ilustrar ug usa ka teksto mopaambit ug kahibalo, apan ang pagpadapat sa maong kahibalo magdalag mga sangpotanan. Tinuod, kaakohan sa imong mamiminaw ang paglihok sumala sa mensahe sa Bibliya, apan matabangan mo sila sa pagsabot kon unsay angayng buhaton. Sa dihang makasalig ka na nga ang imong mamiminaw nakasabot sa gisaysay nga bersikulo ug nakakita sa kahinungdanon niini maylabot sa gipasiugdang punto, gahinig igong panahon nga ipakita kanila ang epekto niini diha sa atong tinuohan ug pamatasan. Ipasiugda ang mga kaayohan sa pagsalikway sa sayop nga mga ideya o pamatasan nga sukwahi sa kamatuoran nga ginahisgotan.

Samtang maghunahuna ka kon unsaon pagpadapat sa mga kasulatan, hinumdomi nga ang mga tawong naglangkob sa imong mamiminaw may nagkalainlaing mga kagikan ug nag-atubang sa nagkadaiyang mga kahimtang. Mahimong dunay mga interesado, mga batan-on, mga tigulang, ug kadtong nagsagubang sa nagkadaiyang personal nga mga problema. Himoang praktikal ug realistiko ang imong pakigpulong. Ayaw pagtambag nga morag pipila lamang ka tawo ang anaa sa imong hunahuna.

Ang mga Desisyon sa Mamumulong

Ang ubang mga desisyon maylabot sa imong pakigpulong gihimo na para nimo. Ang mga pangunang punto klarong gipakita, ug ang gitas-on sa oras nga angay nimong gugolon sa paghisgot sa kada pangunang ulohan tin-aw nga gipadayag. Ikaw nay mohimo sa ubang mga desisyon. Palabihon tingali nimong mogugol ug dugang panahon sa pipila ka segundaryong mga punto ug menos nga panahon sa ubang punto. Ayaw paghunahuna nga kinahanglang kobrehan mo ang kada segundaryong punto sa samang gidugayon. Basin magdalidali ka sa pagkobre sa materyal ug dili na maato pagsabot sa imong mamiminaw. Unsaon nimo pagtino kon hain niini ang tagikon nimo sa bug-os ug hain ang hisgotan lamag diyutay, o daklitan lamang? Pangutan-a ang kaugalingon: ‘Haing mga puntoha ang motabang nako sa pagpasabot sa kinauyokang ideya sa pakigpulong? Hain niini ang makahatag ug kinadak-ang kaayohan sa akong mamiminaw? Ang pagtangtang sa usa ka tinong kasulatan nga gisitar ug sa nalangkit nga punto makapahuyang ba sa han-ay sa ebidensiya nga ipresentar?’

Tun-i nga dili ka magduso ug pangagpas o personal nga opinyon. Bisan ang Anak sa Diyos, si Jesu-Kristo, naglikay sa pagsulti nga gikan sa ‘iya rang kaugalingon.’ (Juan 14:10) Sabta nga ang rason kon nganong ang mga tawo motambong sa mga tigom sa mga Saksi ni Jehova maoy aron maminaw nga hisgotan ang Bibliya. Kon nailhan ka ingong usa ka maayong mamumulong, lagmit tungod kini kay nabatasan na nimo ang pagdani sa pagtagad, dili sa imong kaugalingon, kondili sa Pulong sa Diyos. Tungod niini, giapresyar ang imong mga pakigpulong.​—Filip. 1:​10, 11.

Kay imo nang nausab ang usa ka yanong laraw ngadto sa usa ka undanong kabatbatan sa Kasulatan, kinahanglang imo na karong bansayon ang imong pakigpulong. Mapuslanon ang pagbuhat niana sa kusog nga tingog. Ang hinungdanong butang mao ang pagseguro nga natisok na pag-ayo sa imong alimpatakan ang tanang punto. Kinahanglang mopakigpulong ka nga may hugot nga pagtuo, himoong buhi ang presentasyon, ug magmainiton sa pagpresentar sa kamatuoran. Sa dili ka pa mopakigpulong, suknaa ang kaugalingon: ‘Unsay akong gilaomang malampos? Molutaw kaha ang mga pangunang punto? Ako ba gayong gihimo ang Kasulatan nga basehanan sa akong pakigpulong? Ang kada pangunang punto motultol ba ngadto sa sunod nga punto sa natural nga paagi? Ang pakigpulong magpalig-on ba sa pagpabili kang Jehova ug sa iyang mga tagana? Ang konklusyon direkta ba nga nalangkit sa tema, magpakita sa mamiminaw kon unsay buhaton, ug magpalihok nila sa pagbuhat niana?’ Kon matubag mo nga oo kining mga pangutanaha, nan ikaw anaa na sa kahimtang sa ‘paghimog maayo tungod sa kahibalo,’ alang sa kaayohan sa kongregasyon ug sa pagdayeg kang Jehova!​—Prov. 15:2.