Ang pipila nalisdan sa paghigugma sa Diyos. Para nila, ang Diyos dili matugkad, dili interesado kanato, o mapintas pa gani. Tagda ang mosunod nga mga pahayag:

• “Nag-ampo ko sa Diyos alang sa tabang, apan sa samang higayon, mibati ko nga siya halayo kaayo, halos dili maabot. Para nako, ang Diyos dili persona ug walay pagbati.”​—Marco, Italy.

• “Gusto gyod nakong moalagad sa Diyos, apan siya daw halayo kaayo. Nagtuo ko nga siya mapintas nga Diyos nga gusto lang mosilot nato. Wala ko magtuo nga malumo siya.”​—Rosa, Guatemala.

• “Sa bata pa ko, nagtuo ko nga ang Diyos pirme lang magbantay sa atong mga sayop, nga mosilot dayon nato kon kita makasala. Sa ulahi, naghunahuna ko nga siya walay pagbati. Sama siyag primer ministro nga nagkontrolar sa kalihokan sa iyang ginsakpan​—apan dili gayod interesado sa ilang kaayohan.”​—Raymonde, Canada.

Unsay imong hunahuna? Ang Diyos ba dili takos higugmaon? Sulod sa kasiglohan, ang mga Kristohanon nagpatungha niana nga pangutana. Gani, sa mga tuig 500-1500 C.E., kadaghanan sa Kakristiyanohan wala gani moampo sa Diyos nga Labing Gamhanan. Ngano? Ang mga tawo nahadlok kaayo niya. Matod pa sa historyanong si Will Durant: “Kinsang makasasala ang mangahas sa pag-ampo sa usa nga makalilisang ug halayo kaayo?”

Nganong giisip man ang Diyos nga “makalilisang ug halayo kaayo”? Unsay tinuod nga gitudlo sa Bibliya bahin sa Diyos? Ang pagkahibalo ba sa kamatuoran bahin sa Diyos motabang kanimo sa paghigugma kaniya?

ANG GITUOHAN SA DAGHAN

“Wala mi magkauyon kon may ngalan ba ang Diyos, ug kon duna man, wala mi mahibalo kon unsa kana.”​—Propesor David Cunningham, Theological Studies.

ANG KAMATUORAN GIKAN SA BIBLIYA

Ang Diyos nag-ingon: “Ako mao si Jehova. Kana ang akong ngalan.” (Isaias 42:8) Ang Jehova maoy Hebreohanong ngalan nga nagkahulogang “Siya Nagpahinabo nga Mamao.”​—Genesis 2:4.

Gusto ni Jehova nga gamiton nato ang iyang ngalan. “Tawga ang iyang ngalan,” ang Bibliya nag-ingon. “Ipahibalo taliwala sa mga katawhan ang iyang mga pakiglabot. Hisgoti nga ang iyang ngalan gibayaw.”​—Isaias 12:4.

Si Jesus naggamit sa ngalan sa Diyos. Sa pag-ampo, siya miingon kang Jehova: “Gipaila ko ang imong ngalan kanila [mga tinun-an ni Jesus] ug igapaila pa kini.” Nganong gipaila man ni Jesus ang ngalan sa Diyos ngadto sa iyang mga tinun-an? Siya mipadayon: “Aron nga ang gugma nga imong [Diyos] gibati kanako maanaa unta kanila ug ako mahiusa kanila.”​—Juan 17:26.

KON NGANONG HINUNGDANON KINI

“Ang tawong wala makaila sa ngalan sa Diyos wala gayod makaila kaniya ingong usa ka persona,” misulat ang usa ka teologo nga si Walter Lowrie, “ug siya dili makahimo sa paghigugma kaniya, kon iya lang giila Siya ingong puwersa nga walay personalidad.”

Si Victor tigsimba kada semana, apan wala siya mobating nakaila na gayod siya sa Diyos. “Dayon, nahibal-an nako nga Jehova ang ngalan sa Diyos, ug mao pa kadtoy akong pagkaila kaniya,” siya miingon. “Mibati ko nga daw nahimamat na gyod nako ang Usa nga dugay na nakong nadunggan. Nailhan nako siya ingong tinuod nga Persona ug nasuod ko niya.”

Sa baylo, si Jehova makigsuod sa mga tawo nga naggamit sa iyang ngalan. Bahin “kanila nga nagapalandong sa iyang ngalan,” ang Diyos nagsaad: “Ako maluoy kanila, ingon sa usa ka tawo nga naluoy sa iyang anak nga nagaalagad kaniya.” (Malaquias 3:16, 17) Ang Diyos usab magaganti niadtong magatawag sa iyang ngalan. Ang Bibliya nag-ingon: “Ang matag usa nga magatawag sa ngalan ni Jehova maluwas.”​—Roma 10:13.

ANG GITUOHAN SA DAGHAN

Ang Kristiyanong relihiyon “sa tulo ka pangunang bahin niini nga mao ang Romano Katoliko, Sidlakang Ortodokso, ug Protestante nag-ila sa usa ka Diyos nga may tulo ka Persona: Diyos nga Amahan, Diyos nga Anak, ug Diyos nga Espiritu Santo. Sumala sa Kristiyanong teolohiya, kini dili pag-ila nga dunay tulo ka diyos kondili kining tulo ka persona usa ra.”​—The New Encyclopædia Britannica.

ANG KAMATUORAN GIKAN SA BIBLIYA

Si Jesus, nga Anak sa Diyos, wala gayod mangangkon nga katumbas sa Diyos o nga mao ra ang Amahan. Hinunoa, siya miingon: “Ako moadto sa Amahan, tungod kay ang Amahan labaw pa kay kanako.” (Juan 14:28) Giingnan usab niya ang usa sa iyang mga sumusunod: “Ako mosaka ngadto sa akong Amahan ug inyong Amahan ug ngadto sa akong Diyos ug inyong Diyos.”​—Juan 20:17.

Ang balaang espiritu dili usa ka persona. Ang unang-siglong mga Kristohanon “napuno sa balaang espiritu,” ug si Jehova nag-ingon: “Ibubo ko ang bahin sa akong espiritu sa tanang matang sa unod.” (Buhat 2:1-4, 17) Ang balaang espiritu dili bahin sa Trinidad. Kini maoy aktibong puwersa sa Diyos.

KON NGANONG HINUNGDANON KINI

Ang Katolikong mga eskolar, si Karl Rahner ug Herbert Vorgrimler, miingon nga ang Trinidad “dili mahibaloan kon walay pinadayag, ug bisan human sa pinadayag kini dili masabtan sa bug-os.” Mahigugma ka ba gayod sa usa nga imposibleng mailhan o masabtan? Busa, ang doktrina sa Trinidad maoy babag sa pagkaila ug paghigugma sa Diyos.

Nakita ni Marco, nga gihisgotan sa nag-unang artikulo, nga ang Trinidad maoy babag. “Nagtuo ko nga dili gusto sa Diyos nga mailhan nako siya,” matod niya, “ug tungod niana, siya nahimong mas layo, misteryoso, ug lisod duolon.” Apan, “ang Diyos dili Diyos sa kalibog.” (1 Corinto 14:33, American Standard Version) Gusto niyang makaila ta kaniya. Si Jesus miingon: “Kami nagasimba sa among nailhan.”​—Juan 4:22.

“Dihang nahibal-an nako nga ang Diyos dili bahin sa Trinidad,” matod ni Marco, “nakabaton kog suod nga relasyon kaniya.” Kon atong isipon si Jehova ingong usa ka Persona inay kay usa ka misteryosong estranyo, mas dali nato siyang higugmaon. “Siya nga wala mahigugma wala makaila sa Diyos,” matod sa Bibliya, “kay ang Diyos gugma.”​—1 Juan 4:8.

ANG GITUOHAN SA DAGHAN

“Sa pagkamatay, ang kalag sa mga nangamatay nga may mortal nga sala maimpiyerno, diin didto mag-antos sila sa mga silot sa impiyerno, ang ‘kalayo nga walay pagkapalong.’” (Catechism of the Catholic Church) Ang ubang lider sa relihiyon nag-ingon nga kadtong anaa sa impiyerno bug-os nga nahimulag sa Diyos.

ANG KAMATUORAN GIKAN SA BIBLIYA

“Ang kalag nga makasala​—kini mismo mamatay.” (Ezequiel 18:4) Ang mga patay “walay nahibaloan nga bisan unsa.” (Ecclesiastes 9:5) Kon ang kalag mamatay ug walay nahibaloan, sa unsang paagi kini mag-antos sa “kalayo nga walay pagkapalong” o sa kasakit sa walay-kataposang pagkanahimulag sa Diyos?

Sa Bibliya, ang Hebreohanon ug Gregong pulong nga sagad gihubad ug “impiyerno” sa pagkatinuod nagtumong sa komon nga lubnganan. Pananglitan, dihang si Job nakaagom ug grabeng sakit, siya miampo: “Tagoan mo unta ako sa akong lubnganan [“sa impiyerno,” Douay-Rheims Version].” (Job 14:13, Holy Bible​—Easy-to-Read Version) Gusto ni Job nga mopahulay, dili sa dapit sa pagsakit o sa pagkanahimulag sa Diyos, kondili sa lubnganan.

KON NGANONG HINUNGDANON KINI

Dili kita mahigugma sa usa ka Diyos nga mapintas; hinuon magpahilayo kita kaniya. “Sukad sa pagkabata, natudloan ko sa doktrina sa impiyernong kalayo,” miingon si Rocío, nga taga-Mexico. “Nahadlok ko pag-ayo nga tungod niana dili nako mahanduraw nga dunay maayong mga hiyas ang Diyos. Nagtuo ko nga siya masuk-anon ug higpit.”

Tungod sa gisulti sa Bibliya bahin sa mga paghukom sa Diyos ug sa kahimtang sa mga patay, nausab ang panglantaw ni Rocío. “Nakaginhawa kog luag​—kay nawala na ang akong kahadlok,” siya miingon. “Nakabaton na kog pagsalig nga gusto sa Diyos ang labing maayo alang nato, nga siya nahigugma nato, ug nga mahimo nako siyang higugmaon. Sama siya sa usa ka amahan nga nagahawid sa kamot sa iyang mga anak ug nagtinguha sa labing maayo alang kanila.”​—Isaias 41:13.

Daghan ang naningkamot sa pagsimba sa Diyos tungod sa kahadlok nga maimpiyerno, apan dili niya gusto nga moalagad ka kaniya tungod sa kahadlok. Hinunoa, si Jesus nag-ingon: “Higugmaon mo si Jehova nga imong Diyos.” (Marcos 12:29, 30) Dugang pa, kon atong masabtan nga ang Diyos wala mobuhat ug kawalay-hustisya karon, makasalig sab kita sa iyang umaabot nga paghukom. Sama sa higala ni Job nga si Elihu, kita masaligong moingon: “Halayo ra sa matuod nga Diyos nga mobuhat sa pagkadaotan, ug sa Labing Gamhanan nga mobuhat sa kawalay-hustisya!”​—Job 34:10.

Usa ka adlaw niana sa Jerusalem, si Jesus naghisgot bahin sa iyang Amahan, si Jehova, ug nagyagyag sa mga lider sa bakak nga relihiyon. (Juan 8:12-30) Ang iyang gisulti nianang higayona nagtudlo kanato kon unsaon pagsusi ang popular nga mga tinuohan bahin sa Diyos. Si Jesus miingon: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.”​—Juan 8:31, 32.

“Magpabilin kamo sa akong pulong.” Si Jesus naghatag dinhi ug sukdanan aron masuta kon ang relihiyosong mga pagtulon-an mao ba “ang kamatuoran.” Kon may madungog kang pahayag bahin sa Diyos, pangutan-a ang imong kaugalingon, ‘Nahiuyon ba kini sa gisulti ni Jesus ug sa ubang bahin sa Balaang Kasulatan?’ Sundoga kadtong namati sa gisulti ni apostol Pablo ug kinsa ‘sa adlaw-adlaw maampingong nagasusi sa Kasulatan kon tinuod ba ang mga butang’ nga ilang nakat-onan.​—Buhat 17:11.

Si Marco, Rosa, ug Raymonde, nga gihisgotan sa unang artikulo, maampingong nagsusi sa ilang tinuohan pinaagi sa pagtuon sa Bibliya uban sa mga Saksi ni Jehova. Unsay ilang nakat-onan?

Marco: “Ang nagtudlo namo sa Bibliya naggamit sa Kasulatan sa pagtubag sa tanan namong pangutana sa akong asawa. Mitubo ang among gugma kang Jehova, ug mas nasuod mi ingong magtiayon!”

Rosa: “Sa una, nagtuo ko nga ang Bibliya usa lang ka basahon nga nagpatin-aw kon unsa ang Diyos sumala sa tawhanong pilosopiya. Apan, anam-anam nakong nakita ang tubag sa akong mga pangutana diha sa Bibliya. Karon, si Jehova tinuod na kanako. Siya ang Usa nga akong masaligan.”

Raymonde: “Nag-ampo ko sa Diyos nga tabangan kong makaila niya. Human niana, kami sa akong bana misugod pagtuon sa Bibliya. Sa kataposan, among nakat-onan ang kamatuoran bahin kang Jehova! Nalipay kaayo mi sa pagkahibalo kon unsa siya nga pagka-Diyos.”

Ang Bibliya wala lang magyagyag sa mga bakak bahin sa Diyos; kini nagbutyag usab sa kamatuoran bahin sa iyang maayong mga hiyas. Kini ang iyang inspiradong Pulong, ug kini motabang nato nga “mahibalo sa mga butang nga malulotong gihatag kanato sa Diyos.” (1 Corinto 2:12) Nganong dili nimo tun-an ang Bibliya aron masayran ang tubag sa komon apan hinungdanong mga pangutana bahin sa Diyos, sa iyang katuyoan, ug sa atong kaugmaon? Basaha ang tubag sa pipila niini nga mga pangutana sa www.pr418.com/ceb, ilalom sa “Mga Doktrina sa Bibliya > Tubag sa mga Pangutana Bahin sa Bibliya.” Makahangyo ka usab ug pagtuon sa Bibliya sa maong Web site o sa usa sa mga Saksi ni Jehova. Segurado mi nga kon imo nang himoon, makita nimo nga ang Diyos mas daling higugmaon kay sa imong gidahom.