“Hatagan Mo Niyag Kusog”—Sa Unsang Paagi?

1. Sa unsang paagi ang mga alagad sa Diyos kaniadto nahimong lig-on o kusgan?

ANG Pulong sa Diyos sagad naghisgot sa matinumanong mga lalaki ingong lig-on o kusgan. Pero dihay mga panahon nga mibati silang huyang. Pananglitan, dihay mga higayon nga si Haring David mibating ‘lig-on samag bukid,’ pero sa ubang higayon, siya “nalisang.” (Sal. 30:7) Bisag kusgan kaayo si Samson dihang gipalihok siya sa espiritu sa Diyos, giila niya nga kon wala ang gahom nga naggikan sa Diyos, siya “maluya . . . ug maparehas sa ubang lalaki.” (Maghu. 14:5, 6; 16:17) Kining matinumanong mga lalaki nahimo lang lig-on ug kusgan tungod sa kusog nga gihatag ni Jehova kanila.

2. Nganong miingon si apostol Pablo nga siya huyang ug sa samang higayon gamhanan? (2 Corinto 12:9, 10)

² Giila ni apostol Pablo nga gikinahanglan pod niya ang kusog nga gikan kang Jehova. (Basaha ang 2 Corinto 12:9, 10.) Sama sa daghan kanato, si Pablo may mga problema sa panglawas. (Gal. 4:13, 14) Usahay, malisdan siya sa paghimo kon unsay husto. (Roma 7:18, 19) Ug diha poy mga higayon nga nabalaka siya ug nahadlok kon unsay posibleng mahitabo niya. (2 Cor. 1:8, 9) Pero dihang huyang si Pablo, siya nahimong gamhanan. Sa unsang paagi? Gihatagan ni Jehova si Pablo sa kusog nga iyang gikinahanglan. Gilig-on niya si Pablo.

3. Unsa nga mga pangutana ang tubagon niining artikuloha?

³ Si Jehova nagsaad nga hatagan pod ta niyag kusog. (1 Ped. 5:10) Pero dili ta makadahom nga madawat nato ang maong kusog kon wala tay himoon. Sa pag-ilustrar, ang makina makapadagan sa sakyanan. Pero kinahanglang tamakan sa drayber ang gasolinador aron modagan ni. Sa susama, si Jehova andam mohatag sa kusog nga atong gikinahanglan, pero naa pod tay angayng himoon. Unsay gihatag ni Jehova aron mahimo tang lig-on? Ug unsay kinahanglan natong himoon aron madawat ang maong kusog? Mahibaloan nato ang tubag niana nga mga pangutana pinaagi sa pagkonsiderar kon giunsa pagpalig-on ni Jehova kining tulo ka karakter sa Bibliya​—si propetang Jonas, si Maria nga inahan ni Jesus, ug si apostol Pablo. Makita pod nato kon sa unsang paagi padayong gipalig-on ni Jehova ang iyang mga alagad karon sa susamang mga paagi.

ANG PAG-AMPO UG PAGTUON MAKAHATAG NIMOG KUSOG

4. Sa unsang paagi madawat nato ang gahom gikan kang Jehova?

⁴ Ang usa ka paagi nga madawat nato ang kusog o gahom gikan kang Jehova mao ang pag-ampo kaniya. Tubagon niya ang atong mga pag-ampo pinaagi sa paghatag natog “gahom nga labaw sa kasarangan.” (2 Cor. 4:7) Mapalig-on pod ta kon atong basahon ug pamalandongon ang iyang Pulong. (Sal. 86:11) Ang mensahe ni Jehova kanato diha sa Bibliya “gamhanan.” (Heb. 4:12) Dihang mag-ampo ka kang Jehova ug basahon nimo ang iyang Pulong, madawat nimo ang kusog nga imong gikinahanglan aron makalahutay, magpabiling malipayon, o mahimo ang lisod nga asaynment. Matikdi kon sa unsang paagi gipalig-on ni Jehova si propetang Jonas.

5. Nganong nagkinahanglag kalig-on si propetang Jonas?

⁵ Si propetang Jonas nagkinahanglag kalig-on. Nahadlok siyang moadto sa lugar nga gisugo ni Jehova nga adtoon niya, maong misakay siyag barko padulong sa laing lugar. Tungod ana, hapit siyang mamatay sa kusog nga bagyo ug hapit pod maangin ang mga kauban niya sa barko. Dihang giitsa siya sa dagat, naadto siya sa lugar nga wala pa niya maadtoi sukad​—ang ngitngit nga tiyan sa dako kaayong isda. Unsa kahay gibati ni Jonas? Naghunahuna kaha siya nga mamatay na siya didto? Gibati kaha niya nga gisalikway na siya ni Jehova? Seguradong nabalaka pag-ayo si Jonas.

6. Base sa Jonas 2:1, 2, 7, unsay nakapalig-on kang Jonas dihang naa siya sa tiyan sa isda?

⁶ Unsay gihimo ni Jonas aron mapalig-on siya samtang nag-inusara didto sa tiyan sa dakong isda? Nag-ampo siya. (Basaha ang Jonas 2:1, 2, 7.) Bisag gisupak ni Jonas si Jehova, segurado siya nga paminawon ni Jehova ang iyang mapainubsanon ug mahinulsolong pag-ampo. Gipamalandong pod ni Jonas ang Kasulatan. Nganong makaingon ta ana? Sa iyang pag-ampo nga narekord sa Jonas kapitulo 2, daghan sa mga pulong nga iyang gigamit makita pod sa Salmo. (Pananglitan, itandi ang Jonas 2:2, 5 ug Salmo 69:1; 86:7.) Klaro nga pamilyar kaayo si Jonas sa maong mga teksto. Ug ang pagpamalandong niana samtang naa siya sa maong lisod nga kahimtang nagpalig-on sa iyang pagtuo nga tabangan siya ni Jehova. Sa ulahi, si Jonas nakabalik sa mala nga yuta, ug andam na siyang modawat ug motuman sa iyang sunod nga asaynment.​—Jon. 2:10–3:4.

7-8. Sa unsang paagi napalig-on ang usa ka brader sa Taiwan dihang nag-atubang siyag mga pagsulay?

⁷ Ang ehemplo ni Jonas makatabang nato dihang mag-atubang tag lainlaing pagsulay. Pananglitan, si Zhiming,b brader nga taga-Taiwan, naay grabeng mga sakit. Gawas ana, gisupak pod siya pag-ayo sa iyang pamilya tungod sa iyang pagtuo kang Jehova. Nadawat niya ang kusog gikan kang Jehova pinaagi sa pag-ampo ug pagtuon. “Usahay, dihang motungha ang mga problema, mabalaka kaayo ko ug nerbiyoson pag-ayo, maong dili ko makasugod sa personal nga pagtuon,” siya miangkon. Pero wala siya mosurender. “Una, mag-ampo ko kang Jehova,” siya miingon. “Dayon, mag-earphones ko ug maminaw sa atong mga Kingdom song. Usahay, ako pa gani ning kantahon sa hinay nga tingog hangtod nga mokalma ko. Dayon, magsugod na kog tuon.”

⁸ Ang personal nga pagtuon nakapalig-on kang Zhiming sa wala damhang mga paagi. Pananglitan, samtang ga-recover siya sa usa ka major nga operasyon, giingnan siya sa nurse nga kinahanglan siyang abonohag dugo kay ubos ang iyang red blood cell. Pero sa wala pa siya maoperahi, nakabasa na daan si Zhiming bahin sa usa ka sister nga parehas niyag operasyon. Ang red blood cell sa sister mas ubos pa gani kay sa iyaha, pero wala magpaabonog dugo ang sister ug naka-recover ra. Ang maong eksperyensiya nagpalig-on kang Zhiming nga magpabiling matinumanon.

9. Kon naluya ka tungod sa usa ka pagsulay, unsay imong mahimo? (Tan-awa sab ang mga hulagway.)

⁹ Dihang mag-atubang kag pagsulay, grabe ba kaayo ang imong kabalaka maong maglisod kag sulti sa imong gibati dihang mag-ampo? O gibati ba nimo nga kapoy na kaayo ka para magtuon? Hinumdomi nga nakasabot pag-ayo si Jehova sa imong kahimtang. Busa, bisag simple lang ang imong pag-ampo, makaseguro ka nga ihatag niya kon unsa gyoy imong gikinahanglan. (Efe. 3:20) Kon malisdan ka sa pagbasa ug pagtuon tungod sa pisikal o emosyonal nga kasakit nga imong gibati, sulayig paminaw ang mga audio recording sa Bibliya o sa binase sa Bibliya nga mga publikasyon. Basin makatabang pod nimo ang pagpaminaw sa usa sa atong mga kanta o ang pagtan-awg video sa jw.org. Pinaagi sa pag-ampo kang Jehova ug sa pagpangitag tubag gikan sa iyang espirituwal nga mga tagana, gidapit nimo siya nga palig-onon ka.

ANG MGA IGSOON MAKAPALIG-ON NIMO

10. Sa unsang paagi mapalig-on ta sa mga igsoon?

¹⁰ Puwedeng gamiton ni Jehova ang mga igsoon sa pagpalig-on kanato. Sila ‘makahupay pag-ayo’ nato dihang mag-atubang tag pagsulay o malisdan sa pagtuman sa lisod nga asaynment. (Col. 4:10, 11) Kinahanglan gyod nato ang mga higala ilabina “panahon sa kalisdanan.” (Prov. 17:17) Dihang maluya ta, ang atong mga igsoon makatabang nato sa pisikal, emosyonal, ug espirituwal. Konsideraha kon sa unsang paagi si Maria, nga inahan ni Jesus, napalig-on sa uban.

11. Nganong nagkinahanglag kalig-on si Maria?

¹¹ Si Maria nagkinahanglag kalig-on. Hunahunaa ang iyang gibati dihang nakadawat siyag bug-at nga asaynment gikan sa anghel nga si Gabriel. Dili pa siya minyo, pero magmabdos siya. Wala pa siyay eksperyensiya sa pagpadakog anak, pero atimanon niya ang bata nga mahimong Mesiyas. Ug kay wala pa siya makaagig seksuwal nga relasyon, unsaon man niya pagsulti kining tanan ngadto sa iyang pamanhonon nga si Jose?​—Luc. 1:26-33.

12. Base sa Lucas 1:39-45, sa unsang paagi napalig-on si Maria?

¹² Sa unsang paagi napalig-on si Maria sa pagtuman niining talagsaon ug bug-at nga asaynment? Nangayo siyag tabang sa uban. Pananglitan, gihangyo niya si Gabriel nga hatagan siyag dugang impormasyon bahin sa iyang asaynment. (Luc. 1:34) Wala madugay human niana, miadto siya “sa kabukiran, sa usa ka siyudad sa Juda,” aron bisitahon ang iyang paryente nga si Elisabet. Wa gyod masayang ang iyang pag-adto didto. Gikomendahan siya ni Elisabet, ug gigiyahan pod ni Jehova si Elisabet sa pagsultig makapadasig nga tagna bahin sa wala pa matawo nga anak ni Maria. (Basaha ang Lucas 1:39-45.) Miingon si Maria nga si Jehova “naghimog gamhanang mga buhat pinaagi sa iyang gahom.” (Luc. 1:46-51) Pinaagi kang Gabriel ug Elisabet, gipalig-on ni Jehova si Maria.

13. Unsang kaayohan ang nadawat sa usa ka sister sa Bolivia dihang nangayo siyag tabang sa mga igsoon?

¹³ Sama kang Maria, mapalig-on pod ka sa mga igsoon. Si Dasuri, sister nga taga-Bolivia, nagkinahanglan niana nga paglig-on. Dihang ang iyang papa nadayagnos nga naay makamatayng sakit ug naospital, si Dasuri maoy miatiman niya. (1 Tim. 5:4) Dili gyod to sayon. Siya miingon, “Kadaghan ko mibati nga dili na nako kaya.” Nangayo ba siyag tabang? Sa primero, wala. “Dili nako gustong hasolon ang mga igsoon,” siya miingon. “Naghunahuna ko, ‘Si Jehova ang mohatag sa tabang nga akong gikinahanglan.’ Pero nakaamgo ko nga kay gilain man nako ang akong kaugalingon, gisolo ra nakog sulbad ang akong mga problema.” (Prov. 18:1) Si Dasuri nakadesisyon nga sulatan ang pipila niya ka higala ug isulti ang iyang situwasyon. “Napalig-on kaayo ko sa akong minahal nga mga igsoon,” siya miingon. “Nagdala silag pagkaon sa ospital ug gibasahan ko nilag makapahupay nga mga teksto sa Bibliya. Nindot kaayo sa pamati kon nahibalo ta nga wala ta mag-inusara. Bahin ta sa dakong pamilya ni Jehova​—pamilya nga andam motabang, mohupay, ug mounong nimo.”

14. Nganong angay natong dawaton ang tabang sa mga ansiyano?

¹⁴ Ang usa ka paagi nga gigamit ni Jehova aron hatagan tag kusog mao ang mga ansiyano. Mga gasa sila nga gihatag ni Jehova aron palig-onon ug dasigon ta. (Isa. 32:1, 2) Busa dihang mabalaka ka, isulti kana sa mga ansiyano. Dihang motanyag silag tabang, ayaw pagduhaduha sa pagdawat niana. Pinaagi nila, si Jehova magpalig-on nimo.

ANG IMONG PAGLAOM SA UMAABOT MAKAHATAG NIMOG KUSOG NGA MOLAHUTAY

15. Unsang paglaom ang gipabilhan sa tanang Kristohanon?

¹⁵ Ang atong binase sa Bibliya nga paglaom makahatag natog kusog nga molahutay. (Roma 4:3, 18-20) Ingong mga Kristohanon, naa tay bililhon kaayong paglaom nga mabuhi sa walay kataposan​—diha man sa napasig-uli nga paraisong yuta o sa langitnong Gingharian. Ang atong paglaom makahatag natog kusog sa paglahutay sa mga pagsulay, sa pagsangyaw sa maayong balita, ug paghimo sa atong lainlaing asaynment diha sa kongregasyon. (1 Tes. 1:3) Kana pod nga paglaom ang nakapalig-on kang apostol Pablo.

16. Nganong nagkinahanglag kusog si apostol Pablo?

¹⁶ Si apostol Pablo nagkinahanglag kusog. Sa iyang sulat sa mga taga-Corinto, gipakasama niya ang iyang kaugalingon sa huyang nga sudlanang kulonon. Siya ‘gipiit pag-ayo,’ ‘naglibog,’ ‘gilutos,’ ug ‘natumba.’ Nameligro pa gani ang iyang kinabuhi. (2 Cor. 4:8-10) Gisulat kini ni Pablo panahon sa iyang ikatulong misyonaryong panaw. Niadtong higayona, wala tingali siya mahibalo nga makaatubang pa siyag dugang pagsulay. Siya atakehon sa bayolenteng mga tawo, dakpon, malunod ang barko nga iyang sakyan, ug prisohon siya.

17. Base sa 2 Corinto 4:16-18, unsay nagpalig-on kang Pablo nga molahutay sa mga pagsulay?

¹⁷ Si Pablo nakabatog kusog nga molahutay kay nagpokus siya sa iyang paglaom. (Basaha ang 2 Corinto 4:16-18.) Giingnan niya ang mga taga-Corinto nga bisan pag “nagkahugo” ang iyang lawas, dili niya ni tugotan nga makapaluya sa iyang pag-alagad. Nagpokus si Pablo sa iyang madawat sa umaabot. Ang iyang paglaom nga mabuhi sa langit sa walay kataposan maoy “hilabihan gayod ka dako,” maong andam siyang molahutay sa bisan unsang kalisdanan. Gipamalandong ni Pablo ang maong paglaom, ug tungod ana, gibati niya nga siya “ginabag-o sa adlaw-adlaw.”

18. Sa unsang paagi ang paglaom sa umaabot nakapalig-on kang Tihomir ug sa iyang pamilya?

¹⁸ Si Tihomir, brader sa Bulgaria, napalig-on sa iyang paglaom sa umaabot. Pipila ka tuig kaniadto, ang iyang manghod nga lalaki nga si Zdravko namatay sa aksidente. Taudtaod pod nga naguol pag-ayo si Tihomir. Aron makaya ang kasakit nga ilang gibati, siya ug ang iyang pamilya mag-imagine kon unsa unyay mahitabo panahon sa pagkabanhaw. Siya miingon: “Pananglitan, among hisgotan kon asa namo sugaton si Zdravko, unsa nga pagkaon ang among andamon para niya, kon kinsay among imbitahon sa unang tapoktapok inigkabanhaw niya, ug kon unsay among isulti niya bahin sa kataposang mga adlaw.” Si Tihomir miingon nga ang pagpokus sa ilang paglaom nakapalig-on sa ilang pamilya nga padayong molahutay ug padayong magpaabot sa panahon nga banhawon ni Jehova ang iyang igsoon.

19. Sa unsang paagi nimo mapalig-on ang imong paglaom? (Tan-awa sab ang hulagway.)

¹⁹ Sa unsang paagi nimo mapalig-on ang imong paglaom? Kon ang imong paglaom mao ang kinabuhing walay kataposan dinhi sa yuta, basaha ang giingon sa Bibliya bahin sa Paraiso ug pamalandonga kana. (Isa. 25:8; 32:16-18) Hunahunaa kon unsa unya ang kinabuhi sa bag-ong kalibotan. Imadyina nga tua na ka didto. Kinsay imong nakita? Unsay imong nadungog sa palibot? Unsay imong gibati? Aron mas ma-imagine nimo ang Paraiso, tan-awa ang mga hulagway sa atong mga publikasyon bahin niini o tan-awa ang mga music video sama Sa Bag-ong Kalibotan, Duol Na Gyod Kaayo, o Handurawa—Paraiso Na! Kon kanunay tang maghunahuna sa atong paglaom sa bag-ong kalibotan, makita nato nga ang atong mga problema “kadiyot lang ug gaan.” (2 Cor. 4:17) Pinaagi sa paglaom nga gihatag ni Jehova kanimo, makabaton kag kusog sa paglahutay sa mga pagsulay.  

20. Bisan sa mga panahon nga luya ta, sa unsang paagi makabaton tag gahom?

²⁰ Bisan sa mga panahon nga mobati tag kaluya, “pinaagi sa Diyos makabaton [ta] ug gahom.” (Sal. 108:13) Gihatag na ni Jehova ang imong gikinahanglan aron makadawat kag kusog gikan kaniya. Busa kon magkinahanglan kag tabang aron mahimo ang usa ka asaynment, malahutay ang usa ka pagsulay, o makapabiling malipayon, pag-ampo nga kinasingkasing kang Jehova ug pangayog giya niya pinaagi sa personal nga pagtuon. Dawata ang pagdasig gikan sa mga igsoon. Hunahunaa kanunay ang imong paglaom sa umaabot. Dayon, ‘ang dakong gahom sa Diyos maglig-on kanimo aron makalahutay ka sa tanang butang uban ang pailob ug kalipay.’​—Col. 1:11.