SAGRADONG POSTE

Ang Hebreohanong pulong nga ʼashe·rahʹ (plural, ʼashe·rimʹ) gituohan nga nagtumong sa (1) usa ka sagradong poste nga naghawas kang Asera, usa ka Canaanhong diyosa sa pertilidad (Huk 6:​25, 26), ug sa (2) diyosa nga si Asera mismo. (2Ha 13:​6, ftn sa Rbi8) Apan dili kanunay posibleng matino kon ang usa ka teksto sabton ba nga nagtumong sa idolatrosong butang o sa diyosa mismo.

Asera. Ang mga sinulat sa Ras Shamra nagpaila niini nga diyosa ingong ang asawa sa diyos nga si El, ang “Maglalalang sa mga Linalang,” ug nagtawag kaniya ingong “Mahal nga Ginang Asera sa Dagat” ug “Babayeng Katigulangan sa mga Diyos,” ug kini naghimo usab kaniya nga inahan ni Baal. Apan lagmit nga susama ra ang mga katungdanan niining tulo ka prominenteng mga diyosa sa Baalismo (si Anat, Asera, ug Astoret), sumala sa makita sa sekular nga mga sinulat ingon man sa rekord sa Kasulatan. Samtang si Astoret mopatim-awng giisip nga asawa ni Baal, si Asera lagmit gilantaw usab nga ingon.

Sa yugto sa mga Maghuhukom, ang apostatang mga Israelinhon “nag-alagad sa mga Baal ug sa sagradong mga poste [ang Aserim].” (Huk 3:​7, ftn sa Rbi8; itandi ang 2:13.) Ang paghisgot niini nga mga bathala diha sa plural nga porma lagmit nagpaila nga ang matag lugar may kaugalingong Baal ug Asera. (Huk 6:25) Si Jezebel, ang taga-Sidon nga asawa ni Ahab nga hari sa Israel, nagpakaon ug 450 ka manalagna ni Baal ug 400 ka manalagna sa sagradong poste, o Asera.​—1Ha 18:19.

Ang imoral nga pagsimba kang Asera sa ulahi gibuhat mismo didto sa templo ni Jehova. Gibutang pa gani didto ni Haring Manases ang usa ka linilok nga larawan sa sagradong poste, lagmit nga usa ka larawan sa diyosa nga si Asera. (2Ha 21:7) Si Manases gidisiplina pinaagi sa pagdala kaniya ingong binihag ngadto sa Babilonya ug, sa iyang pagbalik didto sa Jerusalem, iyang gipakita nga siya nakabenepisyo sa maong disiplina ug gihinloan ang balay ni Jehova gikan sa mga butang nga nalangkit sa idolatriya. Apan gibuhat pag-usab sa iyang anak nga lalaking si Amon ang imoral nga pagsimba kang Baal ug Asera, lakip ang nalangkit niining seremonyal nga pagpamampam. (2Cr 33:11-13, 15, 21-23) Tungod niana gikinahanglan sa matarong nga si Haring Josias, kinsa mipuli kang Amon sa trono, nga tumpagon “ang mga balay sa mga lalaking pampam sa templo nga didto sa balay ni Jehova, diin ang mga babaye naghablon ug mga toldang ampoanan alang sa sagradong poste.”​—2Ha 23:4-7.