Ang Ehipto maoy usa ka yuta diin gisimba ang daghang diyos. Ang pipila ka hayop giisip nga mga diyos; ang uban giisip nga sagrado alang sa espesipikong mga diyos sa mga Ehiptohanon. Dili ikahibulong nga si Moises miingon nga kon ang Israel magtanyag ug mga halad nga hayop kang Jehova didto sa Ehipto, kini magpahinabo sa katawhan nga mohimog kapintasan batok kanila. (Ex 8:26) Atong masabtan usab kon nganong ang Israel, samtang didto sa kamingawan nga nangandoy nga mobalik sa Ehipto, migamit ug usa ka inumol nga estatwa sa nating baka diha sa ilang gitawag nga “usa ka pista alang kang Jehova.”​—⁠Ex 32:1-5.