Puwersa sa kinabuhi ug gininhawa. Sa yutan-ong mga linalang, o “mga kalag,” anaa ang aktibong puwersa sa kinabuhi, o “espiritu” nga nagpabuhi kanila, ug ang gininhawa nga nagpatunhay niana nga puwersa sa kinabuhi. Ang espiritu (puwersa sa kinabuhi) ug ang gininhawa maoy mga tagana nga gikan sa Diyos, ug siya makalaglag sa kinabuhi pinaagi sa pagkuha sa bisan hain niini. (Sal 104:29; Isa 42:5) Sa panahon sa Lunop, ang mga hayop ug ang mga tawo nangalumos; naputol ang ilang gininhawa ug nahanaw ang puwersa sa kinabuhi. Kini namatay. “Ang tanan nga niana ang gininhawa sa puwersa sa kinabuhi aktibo [sa literal, “nga niana ang gininhawa sa aktibong puwersa (espiritu) sa kinabuhi [anaa]”] diha sa mga buho sa ilong niini, nga mao, ang tanan nga diha sa mamalang yuta, nangamatay.”​—Gen 7:22; itandi ang hubad ni Robert Young; tan-awa ang ESPIRITU.

Pagpasa sa Puwersa sa Kinabuhi. Ang puwersa sa kinabuhi sa mga linalang, nga unang gipaobra ni Jehova diha sa matag matang (pananglitan, sa unang tawhanong paris), mahimong ipasa ngadto sa mga anak pinaagi sa proseso sa pagsanay. Sa mga hayop nga sus-an, human sa pagmabdos ang inahan motaganag oksiheno ug ubang sustansiya hangtod sa pagpanganak, sa dihang ang anak mosugod na sa pagginhawa pinaagi sa mga buho sa ilong niini, sa pagsuso, ug sa ulahi sa pagkaon.

Sa dihang gilalang si Adan, giumol sa Diyos ang lawas sa tawo. Aron ang maong bag-ong giumol nga lawas mabuhi ug magpadayong buhi, gikinahanglan ang espiritu (puwersa sa kinabuhi) ug ang pagginhawa. Ang Genesis 2:7 nag-ingon nga ang Diyos ‘naghuyop sa mga buho sa iyang ilong sa gininhawa [porma sa nesha·mahʹ] sa kinabuhi, ug ang tawo nahimong buhing kalag.’ Ang “gininhawa sa kinabuhi” nagtumong gayod dili lang kay sa gininhawa o hangin nga mosulod ngadto sa mga baga. Dayag nga gibutang sa Diyos kang Adan ang espiritu o kidlap sa kinabuhi ug ang gininhawa nga gikinahanglan aron siya magpabiling buhi. Karon si Adan nakabaton na ug kinabuhi ingong persona, sa pagpasundayag ug mga hiyas ingong usa ka tawo, ug pinaagi sa iyang sinultihan ug mga lihok iyang ikapadayag nga siya mas labaw kay sa mga hayop, nga siya maoy “anak sa Diyos,” nga gilalang sumala sa Iyang dagway ug larawan.​—Gen 1:27; Luc 3:38.

Ang kinabuhi sa tawo ug sa mga hayop nagdepende sa puwersa sa kinabuhi nga gipalihok sa sinugdan diha sa matag matang ug sa gininhawa aron sa pagpatunhay niana nga puwersa sa kinabuhi. Ang biolohikanhong siyensiya nagpamatuod niini nga kamatuoran. Kini dayag diha sa paagi sa pagklasipikar sa pipila ka awtoridad sa nagkalainlaing mga aspekto sa proseso sa kamatayon: Ang clinical death, ang paghunong sa mga pag-obra sa mga sangkap sa pagginhawa ug sa sirkulasyon; ang brain death, ang bug-os ug permanenteng paghunong sa pag-obra sa utok; ang somatic death, ang inanay ug sa kapulihay ang bug-os nga paghunong sa hinungdanong mga pag-obra sa tanang sangkap ug mga tisyu sa lawas. Busa bisan mohunong na ang pagginhawa, pagpitik sa kasingkasing, ug ang pag-obra sa utok, ang puwersa sa kinabuhi magpabilin sa usa ka panahon diha sa mga tisyu sa lawas.