Ang Mesiyanikong Gingharian. Sa mga sulat ni Pablo iyang gihatag ang usa ka bug-os nga larawan sa pagpadayag bahin sa sagradong tinago ni Kristo. Sa Efeso 1:9-11 siya naghisgot sa pagpahibalo sa Diyos bahin sa “sagradong tinago” sa iyang kabubut-on, ug nag-ingon: “Sumala sa iyang gikahimut-an nga gilaraw niya sa iyang kaugalingon ang usa ka pagdumala inig-abot sa kinutoban sa tinudlong kapanahonan, nga mao, aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta. Oo, diha kaniya, nga nahiusa kaniya kita usab natudlo ingong mga manununod, sa pagkaagi nga kita gimbut-an daan sumala sa katuyoan niya nga nagapalihok sa tanang butang sumala sa gilaraw sa iyang kabubut-on.” Nalangkit niining “sagradong tinago” ang usa ka kagamhanan, ang Mesiyanikong Gingharian sa Diyos. “Ang mga butang sa mga langit,” nga gihisgotan ni Pablo, mao ang umaabot nga mga manununod niana nga langitnong Gingharian uban ni Kristo. “Ang mga butang sa yuta” mao ang yutan-ong mga sakop niini. Gihisgotan ni Jesus ngadto sa iyang mga tinun-an nga ang sagradong tinago maoy maylabot sa Gingharian sa dihang siya miingon kanila: “Kaninyo gihatag ang sagradong tinago mahitungod sa gingharian sa Diyos.”​—Mar 4:11.

Naglakip sa Kongregasyon. Adunay daghang bahin ang kahibalo labot sa sagradong tinago. Ang apostol naghatag ug dugang mga detalye sa dihang siya miingon nga ang sagradong tinago naglakip sa kongregasyon, diin ang Ulo niini mao si Kristo. (Efe 5:32; Col 1:18; Pin 1:20) Kini sila mao ang iyang kaubang mga manununod, nga kanila siya magpaambit sa Gingharian. (Luc 22:​29, 30) Sila gikuha taliwala sa mga Hudiyo ug mga Hentil. (Rom 11:25; Efe 3:3-6; Col 1:​26, 27) Kini nga bahin sa “sagradong tinago” tin-aw lamang nga nahibaloan sa dihang si Pedro gisugo sa pagduaw sa Hentil nga si Cornelio ug nakakita niining Hentil nga panimalay nga nakadawat sa mga gasa sa balaang espiritu, niadtong 36 K.P. (Buh 10:​34, 44-48) Sa pagsulat ngadto sa Hentil nga mga Kristohanon, si Pablo miingon kanila: “Kamo sa maong panahon walay Kristo, . . . estranyo sa mga pakigsaad labot sa saad, ug kamo walay paglaom ug mga walay Diyos dinhi sa kalibotan. Apan karon nga nahiusa kang Kristo Jesus kamong kanhi nahilayo nahiduol na pinaagi sa dugo ni Kristo.” (Efe 2:11-13) Pinaagi sa mga pakiglabot sa Diyos uban sa kongregasyon, ‘ang mga kagamhanan ug ang mga awtoridad diha sa langitnong mga dapit’ makahibalo sa “nagkadaiya uyamot nga kaalam sa Diyos.”​—Efe 3:10.

Kini nga kongregasyon gipakita diha sa panan-awon sa Pinadayag ngadto kang Juan ingong gilangkoban sa 144,000 ka tawo nga “gipalit gikan sa katawhan ingong mga unang bunga ngadto sa Diyos ug sa Kordero.” Sila nagbarog uban sa Kordero, si Jesu-Kristo, diha sa Bukid sa Zion, ang dapit diin nahimutang ang “siyudad sa buhing Diyos, ang langitnong Jerusalem.” Didto sa karaang yutan-ong Jerusalem nahimutang ang “trono ni Jehova,” diin naglingkod diha niana ang mga hari sa linya ni David; diha usab niana nahimutang ang templo ni Jehova. Sa langitnong Jerusalem si Jesu-Kristo naentrono, ug ang iyang maunongong dinihogan sa espiritu nga mga sumusunod nakig-ambit sa pagmando sa iyang Gingharian. (Pin 14:​1, 4; Heb 12:22; 1Cr 29:23; 1Pe 2:4-6) Ang pagkabanhaw nila ngadto sa pagkawalay-kamatayon ug pagkadili-madunoton panahon sa presensiya ni Kristo maoy usa sa mga bahin sa mga pagpakiglabot sa Diyos sa kongregasyon, “usa ka sagradong tinago” mismo.​—1Co 15:51-54.

Natapos Na. Diha sa panan-awon ni apostol Juan, siya gisultihan: “Sa mga adlaw nga magpatingog ang ikapitong manulonda, sa dihang mohuyop na siya sa iyang trompeta, ang sagradong tinago sa Diyos sumala sa maayong balita nga iyang gipahayag sa iyang mga ulipon nga mga manalagna sa pagkatinuod matapos na.” (Pin 10:7) Ang pagkatapos niini nga sagradong tinago suod nga nalangkit sa paghuyop sa ikapitong manulonda sa iyang trompeta, nga sa paghuyop niini ang pahibalo gihimo didto sa langit: “Ang gingharian sa kalibotan nahimo nang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.” (Pin 11:15) Busa, ang sagradong tinago sa Diyos natapos sa dihang si Jehova nagsugod sa pagpalihok sa iyang Gingharian pinaagi sa iyang Mesiyas, o Kristo. Daghan ang gipamulong ni Jesu-Kristo ngadto sa iyang mga tinun-an, ang “mga ulipon” sa Diyos, bahin sa Gingharian sa Diyos ug miingon nga ang “maayong balita sa gingharian” kinahanglang padayong iwali hangtod sa kataposan (Gr., teʹlos) sa “sistema sa mga butang.” Human nga ‘ang sagradong tinago sa Diyos matapos na,’ ang “maayong balita” nga igawali maglakip sa kon unsay gipahibalo sa mga tingog didto sa langit: “Ang gingharian sa kalibotan nahimo nang gingharian sa atong Ginoo ug sa iyang Kristo.”​—Mat 24:​3, 14.