Bisan pa sa kalisod sa panalapi nga gipas-an na sa katawhan, si Jehoiakim naghimog mga plano alang sa pagtukod ug usa ka bag-o, mahalon nga palasyo. Lagmit aron gamay ra ang gasto, sa malupigong paagi wala niya ihatag ang mga suhol sa mga mamumuo. Busa si Jehova, pinaagi kang Jeremias, nagpahayag ug kaalaotan niining daotang magmamando, nga nagbutyag nga siya ilubong ingon sa paglubong sa usa ka laking asno.​—Jer 22:13-19.

Sayo sa paghari ni Jehoiakim nagpasidaan si Jeremias nga kon dili maghinulsol ang katawhan, ang Jerusalem ug ang templo niini pagalaglagon. Human niadto ang manalagna gihulga nga patyon. Apan, ang inilang tawo nga si Ahikam mitabang kang Jeremias ug nagluwas sa manalagna gikan sa kadaot. Una pa niana, ang susamang tagna ni Uriyas nakapapungot pag-ayo kang Jehoiakim nga tungod niadto siya determinado sa pagpatay kaniya. Bisan pag ang nahadlok nga si Uriyas mikalagiw ngadto sa Ehipto, siya wala makaikyas sa kapungot sa hari. Gipakuhag balik ni Jehoiakim si Uriyas ug unya gipapatay siya pinaagi sa espada.​—Jer 26:1-24.

Sa ikaupat nga tuig sa paghari ni Jehoiakim (625 W.K.P.) gipildi ni Nabucodonosor si Paraon Neko sa usa ka panaggubat labot sa paggahom sa Sirya-Palestina. Nahitabo ang panaggubat didto sa Carkemis duol sa Euprates, kapin sa 600 km (370 mi) sa A sa Jerusalem. (Jer 46:​1, 2) Nianang maong tuig si Jeremias nagdiktar sa iyang sekretaryong si Baruk sa mga pulong ni Jehova nga gipunting batok sa Israel, Juda, ug sa tanang kanasoran, nga nagrekord sa mga mensahe nga gisugdan na sa pagpahayag sukad sa ika-13 nga tuig sa paghari ni Josias (nianang panahona si Jehoiakim mga sayis anyos na). Duolan sa usa ka tuig sa ulahi, sa ikasiyam nga lunar nga bulan (Kislev, Nobyembre/Disyembre), ang linukot nga basahon nga naundan sa maong mensahe gibasa sa atubangan ni Haring Jehoiakim. Sa pagkabasa ni Jehudi sa tulo o upat ka lindog, ang maong bahin sa basahon giputol ug giitsa sa nagdilaab nga kalayo nga diha sa bagahan sa balay sa hari alang sa tingtugnaw. Busa ang tibuok linukot nga basahon, ang matag bahin niini, naugdaw sa kalayo. Wala mamati si Jehoiakim sa pangamuyo sa tulo niya ka prinsipe nga dili sunogon ang linukot. Siya ilabinang misupak sa mga pulong sa tagna nga nagpunting sa kalaglagan sa Juda pinaagi sa mga kamot sa hari sa Babilonya. Kini nagpasabot nga si Nabucodonosor wala pa moabot batok sa Jerusalem ug wala pa maghimo kang Jehoiakim nga iyang basalyo o sakop nga hari.​—Jer 36:1-4, 21-29.

Ang tagna ni Jehova pinaagi ni Jeremias (22:​18, 19; 36:30) nagpakita nga si Jehoiakim dili makadawat ug desenteng paglubong; ang iyang patayng lawas pasagdan lang sa mga ganghaan sa Jerusalem, nga iladlad sa init sa maadlaw ug sa tun-og sa magabii. Kon giunsa ‘pagtugyan si Jehoiakim ngadto sa kamot ni Nabucodonosor’ (Dan 1:2) wala ibutyag. Lagmit tungod sa iyang pagkamatay panahon sa paglikos ug sa pagkabihag sa iyang anak human niana nga ang linya sa kaliwat ni Jehoiakim nawad-an sa pagkahari diha sa mga kamot ni Nabucodonosor. Dili makompirmar kon tinuod ang giingon sa Hudiyohanong tradisyon (girekord ni Josephus) nga si Nabucodonosor nagpatay kang Jehoiakim ug nagsugo nga ang iyang patayng lawas ilabay sa gawas sa mga paril sa Jerusalem. (Jewish Antiquities, X, 97 [vi, 3])

Human mosurender ang anak nga lalaki ni Jehoiakim nga si Jehoiakin, gipalingkod ni Nabucodonosor ang uyoan ni Jehoiakin nga si Zedekias sa trono sa Juda. (2Cr 36:​9, 10) Kini nagtuman sa tagna ni Jeremias nga walay usa nga iyaha ni Jehoiakim ang molingkod sa trono ni David. (Jer 36:30) Ang anak nga lalaki ni Jehoiakim nga si Jehoiakin nagmando lamang sa tulo ka bulan ug napulo ka adlaw.