Hustong Paggamit sa Dugo. Adunay usa lamang ka paggamit sa dugo nga gitugotan sa Diyos, kini mao ang paggamit sa dugo alang sa paghalad. Iyang gisugo nga kadtong nailalom sa Moisesnong Balaod maghalad ug mga hayop alang sa pagtabon-sa-sala. (Lev 17:​10, 11) Nahiuyon usab sa Iyang kabubut-on nga itanyag sa Iyang Anak, si Jesu-Kristo, ang iyang hingpit nga tawhanong kinabuhi ingong usa ka halad alang sa mga sala.​—Heb 10:​5, 10.

Ang nagaluwas-kinabuhi nga kapadapatan sa dugo ni Kristo gihulagway sa nagkalainlaing paagi diha sa Hebreohanong Kasulatan. Panahon sa unang Paskuwa didto sa Ehipto, ang dugo nga gisablig diha sa ibabaw nga bahin sa pultahan ug diha sa mga poste sa pultahan sa Israelinhong mga balay nagpanalipod sa panganay diha sa sulod sa balay aron dili siya mamatay pinaagi sa kamot sa manulonda sa Diyos. (Ex 12:​7, 22, 23; 1Co 5:7) Ang pakigsaad sa Balaod, nga may tipikal nga kinaiyahan sa pagkuha sa sala, gibalido pinaagi sa dugo sa mga hayop. (Ex 24:5-8) Ang nagkalainlaing halad nga dugo, ilabina kadtong gitanyag sa Adlaw sa Pagtabon-sa-Sala, maoy alang sa pagtabon-sa-sala, nga naglandong sa tinuod nga pagwagtang sa sala pinaagi sa halad ni Kristo.​—Lev 16:​11, 15-18.

Ubos sa Kristohanong kahikayan, ang pagkasagrado sa dugo mas labaw pa gayod nga gipasiugda. Wala nay dugo sa mga hayop nga ihalad, kay kadto nga mga halad maoy landong lamang sa katinuoran, si Jesu-Kristo. (Col 2:17; Heb 10:1-4, 8-10) Ang hataas nga saserdote sa Israel magkuhag bahin sa dugo ug dad-on kini sulod sa Labing Balaan sa yutan-ong sangtuwaryo. (Lev 16:14) Apan si Jesu-Kristo ingong tinuod nga Hataas nga Saserdote misulod sa langit, dili uban sa iyang dugo nga gibubo na sa yuta (Ju 19:34), kondili uban sa bili sa iyang hingpit nga tawhanong kinabuhi nga gihawasan sa dugo. Wala mawagtang kaniya kini nga katungod sa kinabuhi tungod sa sala, apan nagpabilin kini kaniya ug iyang magamit alang sa pagtabon-sa-sala. (Heb 7:26; 8:3; 9:​11, 12) Tungod niini nga mga katarongan, ang dugo ni Kristo mituaw alang sa mas maayong mga butang kay sa dugo sa matarong nga si Abel. Ang dugo sa hingpit nga halad sa Anak sa Diyos mao lamang ang makatuaw alang sa kaluoy, samtang ang dugo ni Abel ingon man ang dugo sa gimartir nga mga sumusunod ni Kristo mituaw alang sa panimalos.​—Heb 12:24; Pin 6:9-11.

Nalangkit ang Integridad. Sukad sa panahon nga ang bag-ong pakigsaad giinagurahan pinaagi sa dugo ni Jesu-Kristo, ang mga Kristohanon miila sa nagahatag-kinabuhing bili niini nga dugo pinaagi sa kahikayan ni Jehova ug pinaagi ni Jesus ingong ang dakong Hataas nga Saserdote kinsa “misulod, dili, dili pinaagi sa dugo sa mga kanding ug sa toreyong mga baka, kondili pinaagi sa iyang kaugalingong dugo, makausa alang sa tanang panahon ngadto sa balaang dapit ug nakabaton sa walay kataposang kaluwasan alang kanato.” Pinaagi sa pagtuo sa dugo ni Kristo, nahinloan sa mga Kristohanon ang ilang mga tanlag gikan sa patayng mga buhat aron sila makahatag ug sagradong pag-alagad ngadto sa buhing Diyos. Sila mabalak-on sa ilang pisikal nga kahimsog, apan sila mas labaw pa gayod nga mabalak-on sa ilang espirituwal nga kahimsog ug sa ilang baroganan atubangan sa ilang Maglalalang. Buot nilang mahuptan ang ilang integridad ngadto sa buhing Diyos, nga dili magalimod sa halad ni Jesus, nga dili mag-isip niini nga walay-bili, ug dili magyatak niini. Kay sila nagapangita, dili sa kinabuhi nga lumalabay, kondili sa kinabuhing walay kataposan.​—Heb 9:​12, 14, 15; 10:​28, 29.