Ang Dalan sa Kinabuhi. Si Jehova, ang Tuboran sa kinabuhi, nagbutyag sa dalan sa kinabuhi pinaagi sa iyang Pulong sa kamatuoran. Ang Ginoong Jesu-Kristo “naghatag ug kahayag nganha sa kinabuhi ug pagkadili-madunoton pinaagi sa maayong balita.” (2Ti 1:10) Iyang gisultihan ang iyang mga tinun-an: “Ang espiritu mao ang naghatag-kinabuhi; ang unod wala gayoy kapuslanan. Ang mga pulong nga gisulti ko kaninyo maoy espiritu ug kinabuhi.” Wala madugay human niadto si Jesus nangutana sa iyang mga apostoles kon buot ba usab nila nga mobiya kaniya, sama sa gibuhat sa uban. Si Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.” (Ju 6:​63, 66-68) Si apostol Juan nagtawag kang Jesus ang “pulong sa kinabuhi,” ug miingon: “Pinaagi kaniya maoy kinabuhi.”​—1Ju 1:​1, 2; Ju 1:4.

Pinasukad sa mga pulong ni Jesus dayag nga kawang ang tawhanong mga paningkamot sa pagpalugway sa kinabuhi hangtod sa hangtod o ang mga teoriya nga ang pipila ka pagkaon o sistematikong mga diyeta mohatag ug kinabuhi sa katawhan. Ubos sa labing maayong mga kahimtang, sila makapauswag sa panglawas nga temporaryo lamang. Ang bugtong dalan sa kinabuhi mao ang pagkamasinugtanon sa maayong balita, ang “pulong sa kinabuhi.” (Flp 2:16) Aron makabaton ug kinabuhi, ang indibiduwal kinahanglang magpunting sa iyang kaisipan “sa mga butang sa itaas, dili sa mga butang sa yuta.” (Col 3:​1, 2) Ngadto sa iyang mga mamiminaw si Jesus miingon: “Siya nga magapatalinghog sa akong pulong ug magatuo kaniya nga nagpadala kanako adunay kinabuhing walay kataposan, ug siya dili mahiagom sa paghukom apan nakalabang na gikan sa kamatayon ngadto sa kinabuhi.” (Ju 5:24; 6:40) Dili na sila hinukman nga mga makasasala, nga takos sa kamatayon. Si apostol Pablo misulat: “Busa kadtong nahiusa kang Kristo Jesus dili mahinukman. Kay ang balaod nianang espiritu nga naghatag ug kinabuhi nga nahiusa kang Kristo Jesus nagpagawas na kaninyo gikan sa balaod sa sala ug sa kamatayon.” (Rom 8:​1, 2) Si Juan nag-ingon nga ang usa ka Kristohanon nahibalo nga siya “nakalabang na gikan sa kamatayon ngadto sa kinabuhi” kon siya nahigugma sa iyang mga igsoon.​—1Ju 3:14.

Sanglit “walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas,” ang nagapangita sa kinabuhi kinahanglang mosunod kang Kristo. (Buh 4:12) Gipakita ni Jesus nga ang usa ka tawo kinahanglang magmahunahunaon sa iyang espirituwal nga mga panginahanglan; siya kinahanglang mobatig pagkagutom ug pagkauhaw sa pagkamatarong. (Mat 5:​3, 6) Dili lamang nga siya kinahanglang makadungog sa maayong balita kondili siya kinahanglang magpasundayag ug pagtuo kang Jesu-Kristo ug pinaagi kaniya motawag sa ngalan ni Jehova. (Rom 10:13-15) Sa pagsunod sa panig-ingnan ni Jesus, siya pagabawtismohan diha sa tubig. (Mat 3:13-15; Efe 4:5) Dayon pangitaon niya pag-una ang Gingharian ug ang pagkamatarong ni Jehova.​—Mat 6:33.

Ang hinimayang si Jesu-Kristo nagsaad sa nagmadaogong Kristohanon nga Siya magtugot kaniya sa pagkaon sa “kahoy sa kinabuhi, nga anaa sa paraiso sa Diyos.” (Pin 2:7) Lain pa, sa kataposang mga bersikulo sa basahon sa Pinadayag, atong mabasa: “Ug kon kuhaan ni bisan kinsa ug bisan unsa ang mga pulong sa linukot nga basahon niini nga tagna, kuhaon sa Diyos ang iyang bahin gikan sa mga kahoy sa kinabuhi ug gikan sa balaan nga siyudad, mga butang nga nahisulat niining linukot nga basahon.” (Pin 22:19) Sa konteksto niining duha ka teksto sa Kasulatan, si Kristo Jesus naghisgot niadtong mga magmadaogon, nga kanila “ang ikaduhang kamatayon dili gayod makahimo sa pagdaot” (Pin 2:11), nga kanila ihatag ang “awtoridad ibabaw sa kanasoran” (Pin 2:26), nga mahimong “haligi diha sa templo sa akong Diyos” (Pin 3:12), ug molingkod uban ni Kristo sa iyang langitnong trono. (Pin 3:21) Busa ang kahoy o mga kahoy dili mahimong literal, kay ang mga magmadaogon nga mokaon mao kadtong mga mag-aambit sa langitnong pagkatinawag (Heb 3:1), nga may mga dapit sa langit nga giandam alang kanila. (Ju 14:​2, 3; 2Pe 1:​3, 4) Busa ang (mga) kahoy maoy simbolo sa tagana sa Diyos alang sa pagpatunhay sa kinabuhi, niining bahina, ang langitnon, walay kamatayon nga kinabuhi nga gihatag ngadto sa mga matinumanon ingong mga mananaog uban ni Kristo.

Sa Pinadayag 22:​1, 2, adunay laing gihisgotan nga “mga kahoy sa kinabuhi.” Dinhi ang mga nasod gipakita nga nakig-ambit sa mga dahon sa mga kahoy ingong mga tambal. Kini anaa sa masigkadaplin sa suba nga nagaagos gikan sa templo-palasyo sa Diyos, nga mao ang iyang trono. Ang maong hulagway mitungha human sa pagtukod sa bag-ong langit ug sa bag-ong yuta ug sa pagpahayag sa mga pulong nga “ang tolda sa Diyos anaa uban sa mga tawo.” (Pin 21:1-3, 22, 24) Nan, sa simbolikong paagi kini maoy tambal, mga tagana nga nagsustento sa kinabuhi sa katawhan, alang sa ilang umaabot nga kinabuhing walay kataposan. Ang tuboran sa maong mga tagana mao ang harianong trono sa Diyos ug sa Kordero nga si Jesu-Kristo.

‘Linukot nga basahon nga iya sa Kordero.’ Ang “linukot nga basahon sa kinabuhi nga iya sa Kordero” maoy usa ka lahing linukot nga basahon, nga dayag nga naundan lamang sa mga ngalan niadtong makig-ambit kauban sa Kordero, si Jesu-Kristo, sa pagmando sa iyang Gingharian, lakip niadtong ania pa sa yuta nga nahalinya nga makadawat sa langitnong kinabuhi. (Pin 13:8; itandi ang Pin 14:​1, 4.) Kadtong natala diha sa ‘linukot nga basahon nga iya sa Kordero’ gihisgotan nga makasulod sa balaang siyudad, ang Bag-ong Jerusalem, sa ingon mahimong bahin sa Mesiyanikong Gingharian sa langit. (Pin 21:​2, 22-27) Ang ilang mga ngalan nahisulat diha sa ‘linukot nga basahon nga iya sa Kordero’ ug diha sa laing linukot nga basahon, ang “basahon sa kinabuhi” nga iya sa Diyos.​—Flp 4:3; Pin 3:5.

Suba sa Tubig sa Kinabuhi. Sa panan-awon ni Juan diha sa basahon sa Pinadayag, iyang nakita ang “usa ka suba sa tubig sa kinabuhi, ingon ka tin-aw sa kristal, nga nagaagos gikan sa trono sa Diyos ug sa Kordero” latas sa taliwala sa halapad nga dalan sa balaang siyudad, ang Bag-ong Jerusalem. (Pin 22:​1, 2; 21:2) Ang tubig maoy hinungdanon alang sa kinabuhi. Ang panan-awon nagsugod sa pagkatuman panahon sa “adlaw sa Ginoo,” human gilayon sa pagkatukod sa Gingharian sa Diyos. (Pin 1:10) Mao kanang panahona nga ang mga membro sa “pangasaw-onon” nga matang ania pa sa yuta aron personal nga ipaabot ang pagdapit kang “bisan kinsa nga giuhaw” sa pag-inom sa tubig sa kinabuhi nga walay bayad. (Pin 22:17) Human malaglag ang presenteng sistema sa mga butang, ang suba magpadayon sa pag-agos ug magkadako pa gayod sa bag-ong kalibotan. Ang panan-awon naghisgot sa mga kahoy nga nagapamunga sa isigkakilid niana nga suba, ug nga ang mga dahon maoy tambal alang sa kanasoran. Nan, ang mga tubig nga nagahatag ug kinabuhi mao ang mga tagana alang sa kinabuhi nga gitagana ni Jehova pinaagi sa Kordero, si Jesu-Kristo, alang sa tanang tawo sa yuta nga makadawat ug kinabuhi.