Ministeryo ni Jesus sa Galilea. Ang Galilea mao ang dapit sa daghang talagsaong mga hitabo sa kinabuhi ni Jesus sa yuta. Ang mga siyudad sa Galilea, ang Betsaida, Cana, Capernaum, Corasin, Nain, ug Nasaret, ingon man ang mga rehiyon sa Magadan, espesipikong gihisgotan maylabot sa iyang buluhaton. (Mat 11:20-23; 15:39; Luc 4:16; 7:11; Ju 2:11; tan-awa ang BETSAIDA.) Ang dakong bahin sa iyang yutan-ong kinabuhi gigugol ni Jesus sa siyudad sa Nasaret sa Galilea. (Mat 2:21-23; Luc 2:​51, 52) Sa usa ka kombira sa kasal sa Cana, iyang gihimo ang iyang unang milagro pinaagi sa paghimo sa tubig nga labing maayong bino. (Ju 2:1-11) Human dakpa si Juan nga Tigbawtismo, si Jesus mibiya sa Judea paingon sa Galilea ug misugod sa pagmantala: “Paghinulsol kamo, kay ang gingharian sa mga langit haduol na.” (Mat 4:12-17) Samtang mipanaw si Jesus sa tibuok Galilea, siya nagtudlo diha sa lainlaing mga sinagoga. Sa paglabay sa panahon siya nakaabot sa iyang pinuy-anang lungsod, ang Nasaret, diin sa adlaw nga Igpapahulay, iyang gibasa ang iyang buluhaton diha sa Isaias kapitulo 61. Bisan tuod kadtong didto sa sinagoga nakadayeg sa sinugdan, apan sa dihang gitandi sila ni Jesus sa mga Israelinhon sa mga adlaw ni manalagnang Elias ug Eliseo, kini nga mga tawo sa sinagoga nangasuko, ug andam sila sa pagpatay kaniya.​—Luc 4:14-30.

Human niadto si Jesus miadto sa Capernaum, “usa ka siyudad sa Galilea,” ug naghimo niini nga iyang pinuy-anan. Lagmit duol sa Capernaum iyang gitawag si Andres, Pedro, Santiago, ug Juan nga mahimong mga mangingisda ug mga tawo. (Luc 4:31; Mat 4:13-22) Inubanan niining upat ka tinun-an, gisugdan ni Jesus ang dakong panaw sa pagsangyaw sa Galilea. Samtang gihimo niya ang iyang mga buluhaton sa pagpanudlo ug paghimog gamhanang mga buhat, gitawag ni Jesus si Mateo gikan sa buhatan sa buhis didto sa Capernaum aron mahimong iyang sumusunod. (Mat 4:23-25; 9:1-9) Sa ulahi, sa usa ka bukid duol sa Capernaum, iyang gipili ang 12 ka apostoles. Gawas kang Judas Iskariote, silang tanan pulos mga Galileanhon. Duol usab sa Capernaum, gipahayag ni Jesus ang Wali sa Bukid. (Luc 6:12-49; 7:1) Sa siyudad sa Nain sa Galilea, iyang gibanhaw ang bugtong anak nga lalaki sa usa ka babayeng balo. (Luc 7:11-17) Sa ulahing panaw sa pagsangyaw, giduaw pag-usab ni Jesus ang Nasaret apan siya gisalikway gihapon. (Mat 13:54-58) Sa Capernaum, sa hapit na ang Paskuwa niadtong 32 K.P., lagmit sa panahon sa iyang kataposang malukpanon nga pagkobre sa teritoryo sa Galilea, daghan sa mga tinun-an nga nangapandol sa mga pulong ni Jesus bahin sa ‘pagkaon sa iyang unod ug sa pag-inom sa iyang dugo’ ang mitalikod sa Anak sa Diyos.​—Ju 6:22-71.

Bisan tuod ang sinoptiko o unang tulo ka Ebanghelyo naghisgot ilabina sa ministeryo ni Jesus sa Galilea, sayop ang giisip sa uban nga ang Anak sa Diyos wala magtagad sa Judea. Angayng matikdan nga napukaw ang unang interes sa mga Galileanhon kang Jesus tungod kay ilang nakita ang iyang gibuhat didto sa Jerusalem. (Ju 4:45) Apan lagmit nga dakong bahin sa buluhaton ni Jesus ang gideboto didto sa Galilea tungod kay ang mga Galileanhon mas daling misanong kay sa mga Judeanhon. Gipamatud-an kini sa kamatuoran nga ang unang mga tinun-an nga nakadawat sa balaang espiritu sa Diyos maoy mga Galileanhon, nga miabot ug mga 120 ang gidaghanon. (Buh 1:15; 2:1-7) Ang pagkontrolar ug impluwensiya sa Hudiyong relihiyosong mga pangulo dili ingon ka dako taliwala sa mga Galileanhon kay sa taliwala sa mga Judeanhon. (Itandi ang Luc 11:52; Ju 7:47-52; 12:​42, 43.) Ang uban nag-ingon nga ang dakong bahin sa panon sa katawhan nga naninggit sa pagpatay kang Jesus maoy mga Judeanhon (Mat 27:20-23), samtang ang dakong bahin niadtong sa miagi miabiba kang Jesus ingong hari lagmit maoy mga Galileanhon. (Mat 21:6-11) Ang presensiya sa daghang Galileanhon ug sa ubang dili mga Judeanhon sa panahon sa Paskuwa nakaamot usab sa kahadlok sa mga lider sa Jerusalem nga dakpon si Jesus sa adlawng dako basin ‘mahitabo ang kaguliyang.’​—Mat 26:3-5.

Ministeryo ni Jesus Niini nga Dapit. Kini nga katubigan gihisgotan kanunay diha sa yutan-ong ministeryo ni Jesus. Sa daghang higayon, ang Anak sa Diyos, nga nagsakay sa usa ka sakayan, namulong ngadto sa dakong panon sa katawhan nga nagkatigom diha sa halapad, daghag gagmayng bato nga baybayon niini. (Mar 3:9; 4:1; Luc 5:1-3) Sa usa niini nga mga okasyon iyang milagrosong gipahinabo nga makakuha ug daghang isda ang iyang mga tinun-an ug giawhag si Pedro, Andres, Santiago, ug Juan nga mahimong “mga mangingisda ug mga tawo.” (Mat 4:18-22; Luc 5:4-11) Diha sa kasikbit nga mga dapit sa Dagat sa Galilea, gihimo ni Jesus ang daghang gamhanang mga buhat. Iyang giayo ang mga masakiton, gihinginlan ang mga demonyo (Mar 3:7-12), gipakalma ang hangin ug ang dagat (Mar 4:35-41), ug milakaw ibabaw sa katubigan (Ju 6:​16-21); kas-a, iyang milagrosong gipakaon ang kapin sa 5,000 ka tawo, ug sa lain nga higayon iyang gipakaon ang kapin sa 4,000 ka tawo, nga sa matag higayon pinaagi lamang sa pipila ka tinapay ug pipila ka isda. (Mat 14:14-21; 15:​29, 34-38) Makataronganon gayod nga gihukman ni Jesus ang tulo ka siyudad nianang dapita, ang Corasin, Betsaida, ug Capernaum, tungod sa pagpabiling dili masanongon bisan pa sa daghang gamhanang mga buhat nga nasaksihan sa mga molupyo niini.​—Mat 11:20-24.

Human sa iyang pagkabanhaw, si Jesus nagpakita ngadto sa pipila sa iyang mga tinun-an sa daplin sa Dagat sa Galilea ug iyang gipahinabo nga sila, sa ikaduhang higayon, milagrosong makakuha ug daghang isda. Unya iyang gipasiugda ang kahinungdanon sa pagpakaon sa iyang mga karnero.​—Ju 21:​1, 4-19.