KAALAM

Ang Biblikanhong kahulogan sa kaalam nagpasiugda sa maayong panghukom, nga gipasukad sa kahibalo ug pagsabot; ang katakos sa paggamit sa kahibalo ug pagsabot sa malamposong paagi aron sa pagsulbad sa mga suliran, sa paglikay o pagpahilayo gikan sa mga kapeligrohan, sa pagkab-ot sa tinong mga tumong, o sa pagtambag sa uban sa pagbuhat niana.

Ang kaalam nagpasabot sa gilapdon sa kahibalo ug sa giladmon sa pagsabot, ug kini makahatag ug maayo ug tin-aw nga paghukom nga maoy kinaiyahan sa kaalam. Ang tawong maalamon “nagatipig ug kahibalo,” nga nagpondo niini aron siya adunay makuha. (Pr 10:14)

Ang Proverbio 21:11 nag-ingon nga “pinaagi sa paghatag ug hait nga salabotan ngadto sa tawong maalamon siya makabaton ug kahibalo.” Ang tawong maalamon malipay sa pagkuhag bisan unsang impormasyon nga mohatag kaniyag mas tin-aw nga panglantaw maylabot sa nagpahiping mga sirkumstansiya, mga kahimtang, ug mga hinungdan sa mga suliran. Sa ingon siya ‘nakabaton ug kahibalo’ kon unsay buhaton mahitungod sa maong butang ug nasayod kon unsang mga konklusyon ang himoon, kon unsay gikinahanglan aron masulbad ang mitungha nga suliran.​—Itandi ang Pr 9:9; Ecc 7:25; 8:1; Eze 28:3; tan-awa ang HAIT NGA SALABOTAN.

Ang kahibalo mao ang pagkaila o pagkasinati sa kamatuoran, ug sanglit si Jehova mao ang Maglalalang, kinsa maoy “gikan sa panahong walay tino hangtod sa panahong walay tino” (Sal 90:​1, 2), siya nahibalo sa tanan nga kinahanglang mahibaloan bahin sa uniberso, sa mga butang nga anaa niini, ug sa kasaysayan niini hangtod karon. Siya ang naghimo sa tanang pisikal nga mga balaod, mga siklo, ug mga sukdanan nga niana gipasukad sa mga tawo ang ilang panukiduki ug imbensiyon, ug kon wala kana sila walay mahimo ug walay malig-on nga pasukaranan sa paghimo niini. (Job 38:34-38; Sal 104:24; Pr 3:19; Jer 10:​12, 13) Nan dayag nga ang iyang moral nga mga sukdanan mas hinungdanon pa alang sa kalig-on, maayong panghukom, ug malamposong pagkinabuhi sa tawo. (Deu 32:4-6; tan-awa ang JEHOVA [Usa ka Diyos sa moral nga mga sukdanan].)