MASKIL

Kini nga pulong makita diha sa superskripsiyon sa 13 ka salmo (32, 42, 44, 45, 52, 53, 54, 55, 74, 78, 88, 89, 142) ug lagmit nagkahulogang “makapahinuklog nga balak.” Apan tungod kay dili tino ang kahulogan sa Hebreohanong pulong, kini wala na hubara diha sa daghang bersiyon. Ang usa ka tabang sa pagsabot sa kahulogan niini makita diha sa usa ka pulong nga susamag porma nga gihubad sa ubang mga teksto ingong “paglihok nga manggialamon,” “milihok uban ang pagkamaalamon,” “nagabuhat uban ang pagkamahunahunaon,” “may hait nga salabotan,” ug uban pa.​—1Sa 18:​14, 15; 2Cr 30:22; Sal 41:1; 53:2.