Usa ka siyudad nga may usa ka maayong dunggoanan, diha sa HS nga baybayon sa pulo sa Sicilia nga gitawag karong adlawa nga Siracusa (Italyano). Sumala kang Thucydides, may usa ka Gregong kolonya ang gitukod didto sa Siracusa niadtong ikawalong siglo W.K.P.

Si apostol Pablo miestar sa Siracusa ug tulo ka adlaw sa naghinapos na ang iyang panaw ngadto sa Roma niadtong mga 59 K.P. Lagmit gikinahanglan ang paghunong didto tungod kay ang barko kinahanglang maghulat nga pabor na ang hangin aron makapadayon sa paglayag. (Buh 28:12) Gikan sa Siracusa, ang barko nga gisakyan ni Pablo “milibot” ug nakaabot sa Regio, sa habagatang tumoy sa Italya. Ang tukmang kahulogan niining ekspresyong “milibot” wala mahibaloi. Lagmit ang sakayan milawig sa kurbadong ruta gikan sa baybayon aron makakuhag igong hangin alang sa layag niini. O, lagmit nga kini “milibot​—ubay sa baybayon​—” aron makaabot sa Regio.​—Buh 28:​13, AB.

[gikan sa lintunganayng pulong nga nagkahulogang “guyod”].

Kini ang Gregong ngalan sa duha ka gulpo nga nahimutang sulod sa usa ka dakong luok diha sa baybayon sa amihanang Aprika. Ang kasadpang gulpo (taliwala sa Tunis ug Tripoli) gitawag ug Sirtis Minor (gitawag ug Gulpo sa Gabès karong adlawa). Sa S mismo niini mao ang Sirtis Mayor, ang modernong Gulpo sa Sidra. Gikahadlokan sa karaang mga tripulante ang duha ka gulpo tungod sa delikadong mga bungdo sa mga balas niini, nga kanunayng mabalhinbalhin tungod sa mga balod. Mahitungod sa mga sakayan nga masangad sa maong magbawng mga dapit, si Strabo, usa ka geograpo sa unang siglo K.P., nagtaho, “Panagsa rang makalingkawas ang usa ka sakayan.”​—Geography, 17, III, 20.

Sa dihang si apostol Pablo gidala ngadto sa Roma ingong binilanggo, ang barko nga iyang gisakyan gikusokuso sa unos nga dumagsa sa H sa Creta. Busa, ang mga tripulante nahadlok nga basig masangad ang barko didto sa “Sirtis,” nga lagmit mao ang mga huyonghuyong o mga bungdo sa mga balas sa Gulpo sa Sidra.​—Buh 27:14-17.