Kon walay mga sukdanan walay paagi sa pagtino o sa paghukom sa maayo ug sa daotan o sa pagsukod ug sa pag-ila sa pagkatukma ug pagkaekselente. Niining bahina, ang mosunod nga mga obserbasyon gikan sa Encyclopædia Britannica (1959, Tomo 21, pp. 306, 307) mohatag ug katin-awan:

“Ang mga nahimo sa tawo [sa pag-establisar ug mga sukdanan] . . . balewala ra kon itandi sa mga sukdanan sa kinaiyahan. Ang mga konstelasyon, ang mga agianan o orbito sa mga planeta, ang pagkawalay kausaban sa normal nga mga kinaiyahan sa pagdala sa elektrisidad, pagkamalubayon, pagkamaunaton, pagkatig-a, pagkadaling-matuhopan, pagbanda sa kahayag, kalig-on, o pagkalapot sa mga materyales sa kinaiyahan, . . . o sa pagkagama sa mga selula, maoy pipila sa mga pananglitan sa kahibulongang pagkapopareho sa mga kahulmahan diha sa kinaiyahan.”

Nagpakita sa kahinungdanon sa pagkapopareho sa mga kahulmahan sa materyal nga kalalangan, ang samang reperensiya miingon: “Pinaagi lamang sa pagkapopareho sa mga kahulmahan nga makita diha sa kinaiyahan nga posible ang pag-ila ug pagklasipikar . . . sa daghang matang sa mga tanom, isda, langgam o mga hayop. Taliwala niini nga mga matang, ang matag usa halos kaamgid sa usag usa diha sa kinagamyang detalye sa pagkagama, pag-obra ug mga kinaiya nga iya lamang gayod sa matag usa. [Itandi ang Gen 1:​11, 12, 21, 24, 25.] Kon dili pa tungod niining pagkapopareho sa mga kahulmahan diha sa tawhanong lawas, ang mga doktor dili mahibalo kon ang usa ka tawo nagbaton bag tinong mga sangkap sa lawas, kon asa kini pangitaon . . . Ngani, kon walay mga sukdanan sa kinaiyahan, wala poy organisadong katilingban, walay edukasyon ug walay mga doktor; ang matag usa mag-agad lamang sa paninugdan, ikatandi nga mga kaamgiran.”

Nakita ni Adan ang kawalay kausaban sa mga kalalangan ni Jehova, ang regular nga siklo sa adlaw ug sa gabii, ang kanunay nga pag-agos sa tubig sa suba sa Eden tungod sa puwersa sa grabidad, ug ang dili maihap nga uban pang mga butang nga nagpamatuod nga ang Maglalalang sa Yuta dili usa ka Diyos sa kasamok kondili sa kahusay. (Gen 1:16-18; 2:10; Ecc 1:5-7; Jer 31:​35, 36; 1Co 14:33) Tinong nakatabang kini sa tawo sa pagtuman sa iyang tinudlong buluhaton ug mga kalihokan (Gen 1:28; 2:15), ug siya makahimo sa pagplano ug sa pagbuhat nga masaligon, nga dili mabalaka sa pagkawalay katinoan.

Kini nga pagkahapsay ug ang gilatid nga mga sukdanan dili makapakunhod sa kalipay sa tawo sa iyang kinabuhi kondili makaamot pa alang niini. Sama sa giingon sa artikulo sa ensiklopedia bahin sa mga sukdanan, nga gihisgotan dili pa dugay, labot sa materyal nga kalalangan: “Bisan pa niining nagbuntaog nga ebidensiya sa mga sukdanan walay tawong makaingon nga sum-ol ang kinaiyahan. Bisan tuod ang nigpis nga mga balod sa kahayag mao ang pundasyon, ang mga panagkadaiya ug mga kombinasyon sa bulok nga makapahimuot sa mata sa tumatan-aw wala gayoy limitasyon. Sa susama, ang tanang maanindot nga pagkatagik nga musika madunggan sa igdulungog pinaagi sa laing gamay nga grupo sa mga balod sa tingog.” (Tomo 21, p. 307)

Busa, pinaagi sa iya mismong Persona, sa iyang mga dalan, ug sa iyang mga pulong, si Jehova nga Diyos kanhi ug karon mao ang Kinalabwang Sukdanan sa tibuok uniberso, ang kahubitan ug ang kabug-osan sa tanang pagkamaayo. Tungod niana ang iyang Anak sa dinhi pa sa yuta nakaingon ngadto sa usa ka tawo: “Nganong gitawag mo ako nga maayo? Walay bisan kinsa nga maayo, gawas sa usa, ang Diyos.”​—Mar 10:​17, 18; usab ang Mat 19:17; 5:48.