Ubos sa Moisesnong Balaod. Sa pakigsaad sa Balaod nga gihimo ni Jehova uban sa nasod sa Israel, iyang gilakip ang balaod nga gihatag kang Noe. Iyang gitin-aw nga ang “pagkasad-an sa dugo” maanaa kang bisan kinsa nga dili mosunod sa paagi nga gilatid sa balaod sa Diyos bisan sa pag-ihaw ug hayop. (Lev 17:​3, 4) Ang dugo sa usa ka hayop nga giihaw aron kan-on kinahanglang iyabo sa yuta ug tabonan niini. (Lev 17:​13, 14) Si bisan kinsa nga mokaon ug dugo sa bisan unsang matang sa unod ‘pagaputlon gikan sa taliwala sa iyang katawhan.’ Ang tinuyong mosupak niini nga balaod bahin sa pagkasagrado sa dugo “pagaputlon,” buot ingnon, pagapatyon.​—Lev 17:10; 7:​26, 27; Num 15:​30, 31.

Sa pagkomento sa Levitico 17:​11, 12, ang Cyclopædia ni M’Clintock ug Strong (1882, Tomo I, p. 834) nag-ingon: “Kining higpit nga sugo dili lamang kay alang sa mga Israelinhon, kondili alang usab sa mga langyaw nga nagpuyo sa ilang taliwala. Ang silot nga ipahamtang sa mosupak niini mao ang ‘pagputol gikan sa taliwala sa katawhan,’ nga mopatim-awng nagtumong sa silot nga kamatayon (itandi ang Heb. x, 28), bisan tuod lisod ang pagtino kon kini ipahamtang ba pinaagi sa espada o pinaagi sa pagbato.”

Sa Deuteronomio 14:21 ang hayop nga namatay rag iya o gilapa sa mabangis nga hayop gitugotang ibaligya ngadto sa langyaw nga pumoluyo o sa usa ka langyaw. Busa gipakita nga adunay kalainan ang dugo sa maong mga hayop ug ang dugo sa mga hayop nga giihaw sa usa ka tawo aron kan-on. (Itandi ang Lev 17:​14-16.) Ang mga Israelinhon, ingon man ang langyawng mga pumoluyo nga midawat sa matuod nga pagsimba ug nailalom sa pakigsaad sa Balaod, obligado sa pagtuman sa hataas nga mga kinahanglanon sa maong Balaod. Ang katawhan sa tanang kanasoran nailalom sa sugo diha sa Genesis 9:​3, 4, apan kadtong nailalom sa Balaod gituboy sa Diyos ngadto sa mas hataas nga sukdanan sa pagtuman sa maong sugo kay sa mga langyaw ug sa langyaw nga mga pumoluyo nga dili mga magsisimba ni Jehova.

Bisan ang usa ka tawo nga nagdumot sa iyang igsoon ug sa ingon nangandoy nga siya mamatay, o nagbutangbutang kaniya o bakak nga nanghimatuod batok kaniya ug busa nagpameligro sa iyang kinabuhi, mahimong sad-an labot sa dugo sa iyang isigkatawo.​—Lev 19:16; Deu 19:18-21; 1Ju 3:15.

Tungod sa panglantaw sa Diyos bahin sa kabililhon sa kinabuhi, ang dugo sa gibuno nga tawo giingon nga naghugaw sa yuta, ug ang maong kahugawan mahinloan lamang pinaagi sa pag-ula sa dugo sa mamumuno. Pinasukad niini, ang Bibliya nagtugot sa silot nga kamatayon alang sa mamumuno pinaagi sa tinudlong awtoridad. (Num 35:33; Gen 9:​5, 6) Sa karaang Israel, walay lukat nga dawaton aron ipahigawas ang tinuyong mamumuno gikan sa silot nga kamatayon.​—Num 35:19-21, 31.

Bisan sa mga kaso diin wala masayri sa pag-usisa kon kinsa ang mamumuno, ang siyudad nga kinadul-an sa dapit diin nakaplagan ang patayng lawas giisip nga sad-an sa dugo. Aron mawala ang pagkasad-an sa dugo, angayng himoon sa responsableng mga ansiyano ang pamaagi nga gilatid sa Diyos, ipangulipas ang bisan unsang pagkasad-an o kahibalo bahin sa pagbuno, ug kinahanglang mag-ampo alang sa kaluoy sa Diyos. (Deu 21:1-9) Kon ang dili-tinuyong mamumuno wala kaayo mabalaka sa nahitabong pagpatay ug wala sunda ang kahikayan sa Diyos aron siya mapanalipdan pinaagi sa pagkalagiw ngadto sa siyudad nga dalangpanan ug magpabilin didto, ang kinadul-ang paryente sa tawong namatay mao ang gitugotang manimalos ug obligado sa pagpatay kaniya aron mawala ang pagkasad-an sa dugo gikan sa yuta.​—Num 35:​26, 27; tan-awa ang TIGPANIMALOS SA DUGO.

Hustong Paggamit sa Dugo. Adunay usa lamang ka paggamit sa dugo nga gitugotan sa Diyos, kini mao ang paggamit sa dugo alang sa paghalad. Iyang gisugo nga kadtong nailalom sa Moisesnong Balaod maghalad ug mga hayop alang sa pagtabon-sa-sala. (Lev 17:​10, 11)

Ang pakigsaad sa Balaod, nga may tipikal nga kinaiyahan sa pagkuha sa sala, gibalido pinaagi sa dugo sa mga hayop. (Ex 24:5-8) Ang nagkalainlaing halad nga dugo, ilabina kadtong gitanyag sa Adlaw sa Pagtabon-sa-Sala, maoy alang sa pagtabon-sa-sala, nga naglandong sa tinuod nga pagwagtang sa sala pinaagi sa halad ni Kristo.​—Lev 16:​11, 15-18.

Ang legal nga gahom nga nabatonan sa dugo nga dalawaton sa panan-aw sa Diyos alang sa pagtabon-sa-sala giilustrar pinaagi sa pagyabo sa dugo diha sa tiilan sa halaran ug sa pagbutang niini diha sa mga sungay sa halaran. Ang pasikaranan sa kahikayan sa pagtabon-sa-sala anaa sa dugo, ug ang gahom (gihawasan sa mga sungay) sa kahikayan sa paghalad anaa sa dugo.​—Lev 9:9; Heb 9:22; 1Co 1:18.