Ang pagbaton ug puyopuyo naglungtad na sa wala pa ang pakigsaad sa Balaod ug kini giila ug gikontrolar sa Balaod, nga nagpanalipod sa mga katungod sa mga asawa ug sa mga puyopuyo. (Ex 21:7-11; Deu 21:14-17) Ang mga puyopuyo wala makabaton sa tanang mga katungod diha sa panimalay kay sa nabatonan sa tinuod nga asawa, ug ang usa ka lalaki tingali adunay daghang asawa lakip sa mga puyopuyo. (1Ha 11:3; 2Cr 11:21) Sa mga kahimtang nga apuli ang asawa, siya usahay maghatag sa iyang sulugoong babaye sa iyang bana ingong puyopuyo, ug ang bata nga ipakatawo sa puyopuyo pagailhon nga anak sa gawasnong asawa, sa iyang agalong babaye. (Gen 16:2; 30:3) Ang mga anak nga lalaki sa mga puyopuyo maoy mga lehitimo ug sila makapanunod.​—Gen 49:16-21; itandi ang Gen 30:3-12.

Nakita sa Diyos nga dili haom ang pagpasig-uli sa orihinal nga sukdanan sa monogamiya ingon sa iyang gipundar didto sa tanaman sa Eden hangtod sa pag-abot ni Jesu-Kristo, apan iya gayong gipanalipdan ang mga puyopuyo pinaagi sa balaod. Ang pagbaton ug puyopuyo nakaamot sa mas kusog nga pagdaghan sa populasyon sa Israel.​—Mat 19:​5, 6; 1Co 7:2; 1Ti 3:2; tan-awa ang KAMINYOON (Poligamiya).