[Desyertong Kapatagan].

Kini nga bahin sa talagsaon nga hulpa o rift valley nga miabot sa H gikan sa kabakiliran sa Bukid sa Hermon, maoy nahimutangan sa Dagat sa Galilea ug sa Suba sa Jordan, ug midulhog pa ubos sa lebel sa dagat nga sa ingon naporma ang dal-as sa Patayng Dagat, ug dayon mipaingon sa habagatan ngadto sa Gulpo sa ʽAqaba didto sa Pulang Dagat.​—Deu 3:17; Jos 3:16; 11:16; Jer 52:7.

Kining taas, hiktin, A-H nga walog, sagad nga mala, ug may pipila lamang ka siyudad, adunay mga utlanang taas nga lumbay sa kabukiran sa matag kiliran niini. Ang gilapdon niini dili managsama, gikan sa wala pay 1 km ngadto sa 16 km (0.5 ngadto sa 10 mi) ug maoy 435 km (270 mi) ang gitas-on, nga namugna tungod sa taas nga liki diha sa taklap sa yuta. Ang Jordan naglikoliko agi sa amihanang bahin niining tul-id nga walog, ug ang kanunayng pag-agos niini nagtaganag tubig sa usa ka lunhawng luna diha sa kinatung-ang bahin sa salog sa walog. Apan, sa habagatan sa Patayng Dagat, ang Araba natubigan lamang pinaagig popanahon nga pagbul-og sa mga sapa nga dili igo aron may mabuhi nga mga tanom niining mala nga yuta.

Ang pipila ka komentarista nagtumong lamang sa pulong nga “Araba” ngadto sa walog sa dakong rift valley nga anaa sa H nga bahin sa Patayng Dagat, apan kini nagtumong usab sa rehiyon hangtod sa A sa Dagat sa Galilea, o Kineret. (Jos 12:3; 2Sa 2:29) Ang bahin niini nga walog sa A sa Patayng Dagat gitawag karon nga Ghor, nga nagkahulogang “Hulpa,” samtang ang pulong nga “Araba” sagad nga gigamit alang sa halayong mala nga rehiyon dapit sa H.

Ang Patayng Dagat gitawag nga “dagat sa Araba.” (Deu 3:17; 4:49; 2Ha 14:25) Kon walay tinong artikulo, ang pulong nga ʽara·vahʹ gigamit usab sa katibuk-ang diwa ug tukmang mahubad nga “desyertong kapatagan.” Ang plural (ʽara·vohthʹ) sagad nga gigamit alang sa desyertong kapatagan sa Jerico ug Moab, ang bahin sa Walog sa Jordan nga A lamang sa Patayng Dagat.​—Num 22:1; 26:​3, 63; 31:12; Jos 4:13; 5:10; Jer 39:5.

Sa Amos 6:14 gipasidan-an sa manalagna ang mga gingharian sa Juda ug Israel nga kining mga yutaa pagalupigan sa usa ka langyawng gahom gikan sa “Hamat hangtod sa bul-oganang walog sa Araba [Desyertong Kapatagan].” (Itandi ang 2Ha 14:25.) Bisan tuod nga ang terminong “Araba” gigamit sa pagtumong sa tibuok rehiyon sa Rift Valley gikan sa Dagat sa Galilea hangtod sa Pulang Dagat, dinhi kini adunay linaing kapadapatan nga nagtumong sa dapit gikan sa H sa Patayng Dagat hangtod sa Gulpo sa ʽAqaba. Busa, bisan tuod nga ang ekspresyong “bul-oganang walog sa Araba” tingali nagtumong sa usa ka lugot sama sa bul-oganang walog sa Zered, nga moagos ngadto sa H nga tumoy sa Patayng Dagat (ang “dagat sa Araba,” Deu 3:17), angayng matikdan nga ang ekspresyong gigamit ni Amos mao ang tukmang katumbas sa Arabiko nga ngalan nga nagtumong sa rehiyon nga nagsukad sa H nga tumoy sa Patayng Dagat hangtod sa Gulpo sa ʽAqaba, nga mao ang “Wadi el-ʽArabah.” Ang tagna ni Amos nagpakita sa bug-os nga pagsakop nianang tibuok yuta nga gigamhan kanhi sa Juda ug Israel, gikan sa A ngadto sa H. Sa misunod nga siglo kining tagnaa natuman sa mga pagsulong sa Asiryanhong mga hari, nga naglakip kang Tiglat-pileser III, Salmaneser V, Sargon II, ug Senakerib.