• Pakigsaad
    Pagtugkad sa Kasulatan, Tomo 2

    • Pakigsaad Uban Kang Noe. Gihimo ni Jehova nga Diyos ang usa ka pakigsaad uban kang Noe, kinsa naghawas sa iyang pamilya, maylabot sa Iyang katuyoan sa pagpreserbar sa kinabuhi sa tawo ug sa hayop apan iyang gilaglag ang daotang kalibotan sa maong adlaw. (Gen 6:17-21; 2Pe 3:6) Si Noe nakabaton ug mga anak human nga siya nag-edad ug 500. (Gen 5:32) Sa panahon nga gibutyag sa Diyos kini nga katuyoan ngadto kang Noe, ang iyang mga anak nga lalaki dagko na ug minyo na. Si Noe, sa iyang bahin, kinahanglang magtukod sa arka ug pasudlon ang iyang asawa, ang iyang mga anak, ug ang mga asawa sa iyang mga anak, ingon man ang mga hayop ug kinahanglang magdala usab siya sa sulod ug pagkaon; si Jehova magapreserbar ug unod nga anaa sa ibabaw sa yuta, nianang sa tawo ug sa mga hayop. Tungod sa pagkamatinumanon ni Noe sa mga kondisyon sa maong pakigsaad gipreserbar ni Jehova ang kinabuhi sa tawo ug sa hayop. Ang pakigsaad bug-os nga natuman niadtong 2369 W.K.P., human sa Lunop, sa dihang ang mga tawo ug mga hayop nagkinabuhi pag-usab sa ibabaw sa yuta ug nagpatunghag liwat sumala sa ilang matang.​—Gen 8:15-17.

      Pakigsaad Pinaagi sa Balangaw. Ang pakigsaad pinaagi sa balangaw gihimo tali ni Jehova nga Diyos ug sa tanang unod (sa tawo ug sa hayop), nga gihawasan ni Noe ug sa iyang pamilya, niadtong 2369 W.K.P., sa kabukiran sa Ararat. Gipahayag ni Jehova nga dili na niya laglagon pag-usab ang tanang unod pinaagi sa lunop. Dayon ang balangaw gipakita ingong usa ka ilhanan sa pakigsaad, nga magpadayon hangtod nga ang tawo anaa sa ibabaw sa yuta, sa ato pa, sa walay kataposan.​—Gen 9:8-17; Sal 37:29.

      Pakigsaad Uban Kang Abraham. Ang pakigsaad uban kang Abraham dayag nga miepekto sa dihang si Abram (Abraham) mitabok sa Euprates sa iyang pagpaingon sa Canaan. Ang pakigsaad sa Balaod gihimo 430 ka tuig sa ulahi. (Gal 3:17) Si Jehova namulong kang Abraham sa dihang siya nagpuyo didto sa Mesopotamia, sa Ur sa mga Caldeanhon, ug nagsugo kaniya sa pagpanaw ngadto sa usa ka yuta nga ipakita sa Diyos kaniya. (Buh 7:​2, 3; Gen 11:31; 12:1-3) Ang Exodo 12:​40, 41 (LXX) nagsugilon kanato nga sa kataposan sa 430 ka tuig nga pagpuyo sa Ehipto ug sa yuta sa Canaan, “niini mismong adlawa” ang Israel, nga naulipon sa Ehipto, migula. Ang adlaw nga sila giluwas gikan sa Ehipto maoy Nisan 14, 1513 W.K.P., ang petsa sa Paskuwa. (Ex 12:​2, 6, 7) Kini mopatim-awng nagpaila nga si Abraham mitabok sa Suba sa Euprates sa iyang pagpaingon sa Canaan niadtong Nisan 14, 1943 W.K.P., ug dayag nga mao kini ang panahon nga miepekto ang Abrahamikong pakigsaad. Ang Diyos nagpakita pag-usab kang Abraham human nga siya mipanaw ngadto sa Canaan hangtod sa Sekem ug nagpatin-aw pa gayod sa saad, nga nag-ingon, “Sa imong binhi akong ihatag kining yutaa,” sa ingon nagpakitag usa ka timaan sa kalangkitan niini nga pakigsaad sa saad didto sa Eden, ug nagbutyag nga ang “binhi” magkinabuhi ingon nga tawo, sa ato pa, magasubay diha sa usa ka tawhanong kaliwat. (Gen 12:​4-7) Ang ubang dugang pa nga mga pagpatin-aw ni Jehova gipamulong sa ulahi, sumala sa girekord sa Genesis 13:14-17; 15:18; 17:2-8, 19; 22:15-18.

      Ang mga saad sa pakigsaad gipasa ngadto sa mga kaliwat ni Abraham pinaagi kang Isaac (Gen 26:2-4) ug Jacob. (Gen 28:13-15; 35:​11, 12) Si apostol Pablo nag-ingon nga si Kristo (ingong pangunang binhi) ug kadtong nahiusa kauban ni Kristo mao ang tinuod nga “binhi.”​—Gal 3:​16, 28, 29.

      Gibutyag sa Diyos ang katuyoan ug ang mga kalamposan sa Abrahamikong pakigsaad, nga nag-ingong pinaagi kang Abraham ang binhi sa saad moabot; kini nga binhi magapanag-iya sa ganghaan sa iyang mga kaaway; ang binhi ni Abraham pinaagi kang Isaac modaghan, nga dili maihap sa tawo niadtong panahona; ang ngalan ni Abraham mahimong bantogan; ang binhi magapanag-iya sa Yutang Saad; ang tanang kabanayan sa yuta magapanalangin sa ilang kaugalingon pinaagi sa maong binhi. (Tan-awa ang mga teksto gikan sa Genesis nga gisitar sa nag-unang mga parapo.) Dihay literal nga katumanan niining mga butanga, nga naglandong sa mas dakong katumanan pinaagi ni Kristo. Si Pablo naghatag ug dugang impormasyon bahin sa pagkasimboliko ug pagkamatagnaon sa mga kondisyon niini nga pakigsaad sa dihang siya miingon nga si Abraham, Sara, Isaac, Agar, ug Ismael nagdula ug usa ka simbolikong drama.​—Gal 4:21-31.

      Ang Abrahamikong pakigsaad maoy “usa ka pakigsaad hangtod sa panahong walay tino.” Gilatid sa mga kondisyon niini nga kini magpadayon hangtod nga malaglag na ang mga kaaway sa Diyos ug mapanalanginan ang mga kabanayan sa yuta.​—Gen 17:7; 1Co 15:23-26.

      Sa paghisgot bahin sa Abrahamikong pakigsaad ug sa pakigsaad sa Balaod, gipahayag ni Pablo ang prinsipyo nga “walay tigpataliwala diin ang nalambigit usa lamang ka tawo,” ug dayon siya midugang nga “ang Diyos usa lamang.” (Gal 3:20; tan-awa ang TIGPATALIWALA.) Si Jehova nakigsaad kang Abraham sa unilateral nga paagi. Sa pagkatinuod kadto maoy usa ka saad, ug si Jehova wala maglatid ug mga kondisyon nga kinahanglang buhaton ni Abraham aron matuman ang saad. (Gal 3:18) Busa, wala kinahanglana ang tigpataliwala. Sa laing bahin, ang pakigsaad sa Balaod maoy bilateral. Kadto gihimo tali kang Jehova ug sa nasod sa Israel, nga si Moises maoy tigpataliwala. Ang mga Israelinhon miuyon sa mga kondisyon sa maong pakigsaad ug mihimog sagradong saad sa pagsunod sa Balaod. (Ex 24:3-8) Kining ulahing pakigsaad wala magpaimbalido sa Abrahamikong pakigsaad.​—Gal 3:​17, 19.

      Pakigsaad sa Pagtuli. Ang pakigsaad sa pagtuli gihimo niadtong 1919 W.K.P., sa dihang si Abraham nag-edad ug 99. Gihimo ni Jehova ang pakigsaad uban kang Abraham ug sa iyang kinaiyanhong binhi; ang tanang lalaki sa panimalay, lakip ang mga ulipon, pagatulion; ang bisan kinsa nga magdumili pagaputlon gikan sa iyang katawhan. (Gen 17:9-14) Sa ulahi, gipahayag sa Diyos nga ang langyawng pumoluyo nga nagtinguha sa pagkaon sa paskuwa (usa nga nagtinguha nga mahimong magsisimba ni Jehova uban sa Israel) kinahanglang magtuli sa mga lalaki sa iyang panimalay. (Ex 12:​48, 49) Ang pagtuli nagsilbing usa ka timbre sa pagkamatarong nga nabatonan ni Abraham pinaagi sa pagtuo samtang anaa sa dili-tinuli nga kahimtang, ug kadto maoy usa ka pisikal nga ilhanan sa pagpakigsaad sa mga kaliwat ni Abraham uban kang Jehova pinaagi kang Jacob. (Rom 4:​11, 12) Giila sa Diyos ang pagtuli hangtod sa pagkatapos sa pakigsaad sa Balaod, niadtong 33 K.P. (Rom 2:25-28; 1Co 7:19; Buh 15) Bisan tuod ang pisikal nga pagtuli gituman ubos sa Balaod, si Jehova sublisubling nagpakita nga siya mas naghatag ug pagtagad sa simbolikong kahulogan niini, nga nagtambag sa Israel sa ‘pagpatuli sa yamis sa ilang mga kasingkasing.’​—Deu 10:16; Lev 26:41; Jer 9:26; Buh 7:51.