Ang Hinungdan sa Kamatayon sa mga Tawo. Ang unang paghisgot sa kamatayon diha sa Kasulatan makita sa Genesis 2:​16, 17 bahin sa sugo sa Diyos ngadto sa unang lalaki maylabot sa pagkaon gikan sa kahoy sa kahibalo sa maayo ug sa daotan, diin ang paglapas sa maong sugo mosangpot sa kamatayon. (Tan-awa ang ftn sa Rbi8.) Apan, una pa niini dayag nga ang mga hayop mamatay na ingong bahin sa kinaiyanhong proseso, sanglit sila wala ilakip sa paghisgot sa Bibliya bahin sa pagsulod sa kamatayon nganha sa tawhanong banay. (Itandi ang 2Pe 2:12.) Busa ang pagkaseryoso sa pasidaan sa Diyos bahin sa silot nga kamatayon tungod sa pagkadili-masinugtanon masabtan gayod sa iyang tawhanong anak, si Adan. Ang pagkadili-masinugtanon ni Adan ngadto sa iyang Maglalalang nagpahinabo ug kamatayon kaniya. (Gen 3:19; San 1:​14, 15) Human niadto, ang sala ni Adan ug ang mga sangpotanan niini, ang kamatayon, mikaylap sa tanang tawo.​—Rom 5:12; 6:23.

Usahay, ang pipila ka teksto gigamit ingong ebidensiya kunohay nga ang pisikal nga kamatayon gituyo ingong kinaiyanhong dulnganan sa mga tawo, sama usab sa mga hayop; pananglitan, ang mga paghisgot sa gitas-on sa kinabuhi sa tawo ingong ‘kapitoan o kawaloan ka tuig’ (Sal 90:10) ug ang gipahayag sa apostol nga “gigahin ang mga tawo aron mamatay makausa alang sa tanang panahon, apan human niini ang usa ka paghukom.” (Heb 9:27) Bisan pa niana, kining tanang teksto gisulat human makasulod ang kamatayon diha sa katawhan, ug gipadapat ngadto sa dili-hingpit, makasasalang mga tawo. Ang talagsaong gitas-on sa kinabuhi sa mga tawo nga nagkinabuhi sa wala pa ang Lunop lagmit kinahanglang tagdon gayod ingong nagpabanaag sa talagsaong kapasidad sa tawhanong lawas, nga molabaw pa gayod nianang makaplagan diha sa bisan unsang hayop bisan ilalom sa labing maayong mga kahimtang. (Gen 5:1-31) Ang Bibliya tatawng nag-asoy sa pagsulod sa kamatayon nganha sa tawhanong banay tungod sa sala ni Adan, ingon sa gipakita na.

Nahimulag sa Diyos tungod sa sala, ang katawhan sa katibuk-an giingong anaa sa “pagkaulipon sa pagkadunot.” (Rom 8:21) Kini nga pagkaulipon maoy tungod sa mga epekto sa sala diha sa ilang mga lawas, nga nagpatungha ug makadaot nga bunga niini, ug ang tanang tawo nga dili masinugtanon sa Diyos nailalom sa pagmando sa sala ingong mga ulipon niini “nga mosangpot sa kamatayon.” (Rom 6:​12, 16, 19-21) Si Satanas gikaingong “may gahom sa pagpahinabog kamatayon.” (Heb 2:​14, 15) Gitawag siya nga “usa ka mamumuno” (Ju 8:44), dili tungod kay direkta siyang mopatay kondili tungod kay siya naglimbong ug naghaylo sa mga tawo sa pagpakasala, nagtental o nag-aghat kanila sa pagbuhat ug daotan nga motultol sa pagkadunot ug kamatayon (2Co 11:3), ug usab nagtisok diha sa mga hunahuna ug mga kasingkasing sa mga tawo sa mga tinamdan nga magtukmod kanila sa pagpatay. (Ju 8:40-44, 59; 13:2; itandi ang San 3:14-16; 4:​1, 2.) Busa ang kamatayon gihubit, dili ingong higala sa tawo, kondili ingong “kaaway” sa tawo. (1Co 15:26) Kasagaran kadtong anaa sa hilabihan o dili na maagwanta nga kasakitan mao ang gipakitang nangandoy sa kamatayon.​—Job 3:​21, 22; 7:15; Pin 9:6.

Gipahinabo Tungod sa Paglapas sa Balaod sa Diyos. Ang nasod sa Israel gipasidan-an nga ang dili pagtuman sa pakigsaad sa Diyos kanila mosangpot sa iyang ‘pagpadala ug kamatay sa ilang taliwala.’ (Lev 26:14-16, 23-25; Deu 28:​15, 21, 22) Sa tibuok Kasulatan, ang pisikal o espirituwal nga kahimsog nalangkit sa panalangin sa Diyos (Deu 7:​12, 15; Sal 103:1-3; Pr 3:​1, 2, 7, 8; 4:​21, 22; Pin 21:1-4), samtang ang sakit o balatian nalangkit sa sala ug pagkadili-hingpit. (Ex 15:26; Deu 28:58-61; Isa 53:​4, 5; Mat 9:2-6, 12; Ju 5:14) Busa, bisan tinuod nga sa pipila ka kahimtang si Jehova nga Diyos ang direkta ug dihadihang nagpahamtang ug sakit nganha sa mga tawo, sama sa sanla ni Miriam, Uzzias, ug Gehazi (Num 12:10; 2Cr 26:16-21; 2Ha 5:25-27), mopatim-aw nga sa daghang kahimtang ang mga sakit ug kamatay nga nahitabo maoy kinaiyanhon ug dili-mapugngang mga resulta sa makasasalang dalan nga gisubay sa katawhan o sa kanasoran. Giani lamang nila ang ilang gipugas; giantos sa ilang unodnong mga lawas ang mga epekto sa ilang sayop nga mga binuhatan. (Gal 6:​7, 8) Labot niadtong miliso sa malaw-ayng seksuwal nga imoralidad, ang apostol nag-ingon nga ang Diyos “nagtugyan kanila sa kahugawan, aron ang ilang mga lawas mapakaulawan sa ilang taliwala . . . nagadawat diha sa ilang kaugalingon sa bug-os nga bayad, nga angay sa ilang sayop.”​—Rom 1:24-27.

Ang Israel naapektohan. Busa, ang pasidaan sa Diyos ngadto sa Israel sa ingon nagpina kanila nga modangat gayod ang daghang kasakitan tungod sa ilang pagkamasinupakon sa iyang kabubut-on. Ang iyang Balaod nga gihatag kanila nagsilbing usa ka pugong ug panalipod batok sa mga sakit, tungod sa hataas nga mga sukdanan niini sa moral ug sa kahinlo (tan-awa ang SAKIT UG PAGTAMBAL [Pagkatukma sa mga Ideya sa Kasulatan]), ug tungod usab sa makapahimsog nga mga epekto niini diha sa ilang mga hunahuna ug emosyon. (Sal 19:7-11; 119:102, 103, 111, 112, 165) Ang gihubit sa Levitico 26:14-16 dili ang panalagsang paglapas sa maong Balaod kondili ang pagbiya ug pagsalikway sa mga sukdanan niini, ug kini maghimo gayod sa nasod nga daling mataptan sa tanang matang sa balatian ug mga sakit nga mananakod. Ang kasaysayan, kaniadto ug karong adlawa, nagpamatuod sa pagkatinuod niini.