SILOAM

[gikan sa Heb., nga nagkahulogang “Gipadala; Pinadala”].

Usa ka linaw sa Jerusalem diin gisugo ni Jesu-Kristo ang usa ka tawong buta sa paghilam-os didto aron siya makakita na. (Ju 9:​6, 7, 11; HULAGWAY, Tomo. 2, p. 950) Ang mga arkeologo nagtuo nga kini mao ang linaw sa unang siglo nga nakubkoban di pa dugay, nga ang tubig naggikan sa tubod sa Gihon. Ang maong linaw nahimutang mga 100 m (330 p) HS sa Birket Silwan (gitawag sab nga Linaw sa Siloam). Trapezoid ang porma niini, ug kini may mga ang-ang sa labing menos tulo ka kiliran niini. Ang usa ka kiliran may gitas-ong 70 m (225 p), pero wala pa mahumag kubkob ang tibuok linaw.

Bahin sa inskripsiyon sa Siloam, tan-awa ang EZEQUIAS; usab ang HULAGWAY, Tomo 1, p. 960.

Sa mga adlaw sa yutan-ong ministeryo ni Jesus, dayag nga nahibalo ang kadaghanan nga ang “torre sa Siloam” nahugno, diin namatay ang 18 ka tawo. Gituohan nga kini nga torre nahimutang sa Tagaytay sa Opel, apan ang tukmang nahimutangan niini sa Jerusalem wala mahibaloi.​—Luc 13:4.