Lagmit ang paraiso nga pamilyar kaayo alang sa Hudiyong kriminal nga gipakigsultihan ni Jesus mao ang yutan-ong Paraiso nga gihubit sa unang basahon sa Hebreohanong Kasulatan, ang Paraiso sa Eden. Tungod niana, ang saad ni Jesus makataronganong nagpunting sa usa ka pagpasig-uli sa maong yutan-ong paraisonhong kahimtang. Busa ang iyang saad sa mamumuhat ug daotan nagpasalig sa usa ka pagkabanhaw sa maong tawo nga dili-matarong alang sa kahigayonan sa kinabuhi nianang napasig-uling Paraiso.​—Itandi ang Buh 24:15; Pin 20:​12, 13; 21:1-5; Mat 6:10.

Apan, dayag nga ang mga tagna bahin sa pagpasig-uli nga girekord sa Hebreohanong mga manalagna naglakip sa mga butang nga adunay pisikal nga kapadapatan usab diha sa napasig-uling yutan-ong Paraiso. Pananglitan, ang pipila ka bahin sa tagna diha sa Isaias 35:​1-7, sama sa pag-ayo sa mga buta ug bakol, wala makabaton ug literal nga katumanan sa dihang napasig-uli ang Israel gikan sa karaang Babilonya, ni kini natuman sa samang paagi diha sa Kristohanong espirituwal nga paraiso. Daw dili makataronganon alang sa Diyos nga mag-inspirar sa maong mga tagna sama nianang sa Isaias 11:​6-9, Ezequiel 34:​25, ug Oseas 2:​18, nga aduna lamay mahulagwayon o espirituwal nga kahulogan, ug walay literal nga katumanan nga masinatian sa mga alagad sa Diyos sa pisikal nga paagi. Ang paraiso nga gihisgotan ni Pablo sa 2 Corinto 12:4 mahimong nagtumong sab sa umaabot nga paraiso, pisikal ug espirituwal, nga gihisgotan niini nga mga tagna sa Hebreohanong Kasulatan, ug posible nga usa ni ka panan-awon sa “paraiso sa Diyos,” ang bulahang kahimtang sa langit.—Pin 2:7.