Kagikan. Mopatim-aw nga ang pamilya ni Juan maayog kahimtang. Dakodako ang negosyo sa pagpangisda nga ilang gipanag-iya sanglit sila adunay mga kasosyo ug mga tawong sinuholan. (Mar 1:​19, 20; Luc 5:​9, 10) Ang asawa ni Zebedeo nga si Salome maoy lakip sa mga babayeng miuban ug mialagad kang Jesus sa dihang siya didto sa Galilea (itandi ang Mat 27:​55, 56; Mar 15:​40, 41), ug siya maoy usa sa nagdala ug yerbang-paalimyon aron andamon ang lawas ni Jesus sa paglubong. (Mar 16:1)

Si Zebedeo ug Salome maoy matinumanong mga Hebreohanon, ug ang ebidensiya nagpakita nga ilang gipadako si Juan sumala sa pagtulon-an sa Kasulatan.

Bisag wala hisgoti nga si Zebedeo nahimong tinun-an ni Juan nga Tigbawtismo o kaha ni Kristo, mopatim-aw nga siya wala motutol sa iyang duha ka anak nga lalaki nga mahimong bug-os-panahong mga magsasangyaw kauban ni Jesus.