BARZILAI

[Sa Puthaw].

1. Usa ka Meholahanon kansang anak nga lalaki nga si Adriel nakigminyo kang Merab nga anak nga babaye ni Saul.​—1Sa 18:19; 2Sa 21:8.

2. Usa ka datong Gileadnon, “siya bantogan kaayong tawo,” sa lungsod sa Rogelim. Si Barzilai maoy usa sa tulo ka tawo nga mitabang kang David ug sa iyang kasundalohan sa pagtaganag mga pagkaon ug mga higdaanan panahon sa pagrebelde ni Absalom. (2Sa 17:27-29) Sa dihang mibalik si David sa Jerusalem, si Barzilai miuban paghatod sa panon ngadto sa Jordan, apan tungod sa iyang pangedaron (“Ako kawaloan na ka tuig ang panuigon niining adlawa”), siya mibalibad sa tanyag ni David nga mahimong membro sa iyang palasyo, ug nagpadala hinuon kang Kimham puli kaniya. Sa pagpanamilit, si David mihalok ug nagpanalangin kaniya. (2Sa 19:31-40) Sa hapit nang mamatay, si David nahinumdom kang Barzilai ug naghangyo kang Solomon nga pakitaan ug kalulot ang iyang mga anak nga lalaki ug mohimog kahikayan nga sila ‘mahiuban niadtong managpangaon diha sa iyang lamesa.’​—1Ha 2:7.

3. Usa ka saserdote nga nagminyo sa usa ka anak nga babaye ni Barzilai nga Gileadnon (lagmit gayod ang Num. 2) ug nagsagop sa ngalan sa iyang ugangang lalaki. Ang iyang mga kaliwat, sa ilang paghibalik gikan sa pagkadestiyero sa Babilonya, wala makakaplag sa ilang mga ngalan diha sa rehistro sa talaan sa mga kagikan ug busa sila wala mahimong kuwalipikado sa pagkasaserdote.​—Esd 2:​61, 62; Neh 7:​63, 64.