Ang linaing panaghigalaay ni Jonatan ug David nagsugod human mapatay ni David si Goliat. Ang maong maisogong buhat sa paglaban sa katawhan ni Jehova ilabinang nakapatandog kang Jonatan. Nakadungog sa asoy ni David bahin niini, “ang kalag ni Jonatan nalanggikit sa kalag ni David, ug si Jonatan nahigugma kaniya ingon sa iyang kaugalingong kalag.” (1Sa 18:1) Ang duha ka maisogong manggugubat ug debotadong mga alagad sa Diyos “naghimog usa ka pakigsaad” sa panaghigalaay. Nakita ni Jonatan nga diha kang David ang espiritu sa Diyos. (1Sa 18:3) Wala niya lantawa nga may pangabugho si David ingong iyang karibal, sama sa gibuhat ni Saul. Hinunoa, ang iyang pagtahod sa paagi sa Diyos sa pagdumala sa mga butang maoy usa ka maayong panig-ingnan alang sa iyang mas batan-ong higala. Wala siya molihok uyon sa tinguha ni Saul sa pagpatay kang David apan, hinunoa, nagpasidaan kang David ug misulay sa pagpataliwala alang kaniya. Sa dihang napugos si David sa pagkalagiw, nakigkita si Jonatan kaniya ug mihimog pakigsaad aron si David magpanalipod kaniya ug sa iyang panimalay.​—1Sa 19:1–​20:17.

Nakigsulti pag-usab si Jonatan kang Saul bahin kang David, apan hapit siyang mapatay tungod niini, kay tungod sa pagsilaob sa kasuko gibangkaw ni Saul ang iyang kaugalingong anak. Sumala sa gikasabotan, nagkita si Jonatan ug David sa kapatagan diin didto sa dayag nagbansay sa pagpana ang anak sa hari. (1Sa 20:24-40) Gipalig-on pag-usab sa duha ka managhigala ang ilang bugkos sa pagmahal ug “naghinagkanay sila sa usag usa ug naghinilakay,” ingon sa gibuhat sa ubang mga tawo ug ingon usab sa gibuhat karon diha sa pipila ka kayutaan. (1Sa 20:41; Gen 29:13; 45:15; Buh 20:37) Sa ulahi nakita ni Jonatan si David sa kataposang higayon didto sa Hores ug iyang gipalig-on ang “iyang kamot labot sa Diyos”; ilang gipalig-on pag-usab ang ilang pakigsaad.​—1Sa 23:16-18.

Naguol pag-ayo si David sa kamatayon sa iyang suod nga higalang si Jonatan, nga miawit pa gani ug awit sa pagbangotan nga nag-ulohang “Ang Pana” tungod kang Saul ug Jonatan. (2Sa 1:17-27) Gipakita ni Haring David ang linaing kalulot sa bakol nga anak nga lalaki ni Jonatan nga si Mepiboset, kinsa singko anyos pa lamang sa dihang namatay ang iyang amahan. Sa kataposan siya nakabaton ug permanenteng dapit sa kan-anan sa hari. (2Sa 4:4; 9:10-13)