HILKIAS

[Akong Bahin (Pahat) Mao si Jehova].

1. Usa ka Levihanon sa banay ni Merari; anak nga lalaki ni Amzi ug katigulangan ni Etan nga gitudlo ni David ingong usa ka mag-aawit sa sangtuwaryo.​—1Cr 6:​31, 32, 44-46.

2. Usa ka Levihanong magbalantay-sa-ganghaan sa banay ni Merari nga nakadawat niini nga asaynment sa panahon ni David; usa ka anak nga lalaki ni Hosa.​—1Cr 26:10-12.

3. Amahan ni Eliakim nga usa ka opisyal sa palasyo ni Haring Ezequias.​—2Ha 18:37.

4. Ang hataas nga saserdote sa mga adlaw ni Haring Josias; anak nga lalaki ni Salum ug amahan ni Azarias; dayag nga usa ka katigulangan ni Esdras nga magkokopya. (2Ha 22:​3, 4; 1Cr 6:13; Esd 7:​1, 2, 6) Si Hilkias, ingong hataas nga saserdote, pangunang nalangkit sa pagpasig-uli sa matuod nga pagsimba nga gihimo ni Josias. Samtang giayo ang templo, nakaplagan ni Hilkias ang mismong “basahon sa balaod ni Jehova nga gihatag pinaagi sa kamot ni Moises.” Talagsaon kadto nga kaplag tungod kay ang maong manuskrito lagmit mao gayod ang orihinal nga basahon nga gisulat ni Moises. Gihatag kini ni Hilkias ngadto kang Sapan nga sekretaryo, kinsa maoy nagdala sa manuskrito ngadto sa hari. Sa pagkadungog ni Haring Josias sa pagbasa ni Sapan sa basahon, iyang gipadala ngadto kang Hulda nga manalagna ang usa ka grupo nga gipangulohan sa Hataas nga Saserdoteng si Hilkias aron magpakisayod kang Jehova alang sa hari ug sa katawhan.​—2Ha 22:3-14; 2Cr 34:14.

5. Amahan ni Jeremias nga manalagna; usa ka saserdote didto sa Anatot sa yuta sa Benjamin.​—Jer 1:1.

6. Amahan ni Gemarias nga gipadala ni Haring Zedekias uban kang Elasa ngadto kang Haring Nabucodonosor sa Babilonya.​—Jer 29:3.

7. Usa ka Levihanong saserdote nga mipauli gikan sa Babilonya uban kang Zorobabel.​—Neh 12:​1, 7.

8. Usa niadtong mga nagtindog dapit sa tuong kamot ni Esdras sa dihang iyang gibasa ang Balaod ngadto sa katawhan.​—Neh 8:2-4.

9. Ang ngalan sa usa ka saserdotehanong balay sa amahan sa mga adlaw ni Nehemias nga gobernador.​—Neh 12:​12, 21, 26.