PELEG

[Pagkabahin].

Anak nga lalaki ni Eber ug amahan ni Reu sa linya gikan kang Sem ngadto kang Abraham, ug busa sayong katigulangan ni Jesus. Si Peleg nabuhi sulod sa 239 ka tuig (2269-2030 W.K.P.) ug nagpundar ug usa sa 70 ka banay human sa Lunop.​—Gen 11:16-19; 1Cr 1:24-27; Luc 3:35.

Ginganlan siya ug Peleg “tungod kay sa iyang mga adlaw ang yuta nabahin.” (Gen 10:25; 1Cr 1:19) Ang mga pulong niining mga tekstoha wala mag-ingon nga kining talagsaong pagkabahin nahitabo sa pagkatawo ni Peleg gatosan ka tuig human sa Lunop, apan nag-ingon lamang “sa iyang mga adlaw.” Kon ang ngalan gihatag kaniya sa iyang pagkatawo, ang paghatag niini maoy lagmit matagnaon labot sa pagkatibulaag sa katawhan tungod sa paglahugay sa mga pinulongan sa Torre sa Babel.​—Gen 11:1-9; itandi ang ngalang Noe (nga lagmit nagkahulogang “Pahulay; Paghupay”), nga maoy matagnaon usab, Gen 5:29.