RIPAT

Usa ka anak nga lalaki ni Gomer ug apo ni Japet. (Gen 10:​2, 3; 1Cr 1:6) Sa 1 Cronicas 1:6 diha sa Hebreohanon nga Masoretikong teksto kini mabasa nga “Dipat”; apan diha sa Gregong Septuagint, sa Latin nga Vulgate, ug sa mga 30 ka Hebreohanong manuskrito kini mabasa nga “Ripat.” Ang kalainan sa espeling lagmit maoy tungod sa pagsulat sa magkokopya sa Hebreohanong daʹleth (ד) inay sa Hebreohanong rehsh (ר), mga letra nga magkaamgid kaayo.

Si Ripat gitala lakip niadtong gigikanan sa nagkalainlaing mga nasod ug katawhan nga mikaylap sa yuta human sa tibuok-yutang Lunop. (Gen 10:32) Ang bugtong makasaysayanhong reperensiya mahitungod sa iyang mga kaliwat mao ang sinulat ni Josephus sa unang siglo K.P., kinsa miingon nga ang unang mga molupyo sa Paphlagonia (ubay sa H nga bahin sa Itom nga Dagat sa amihanan-kasadpang Asia Minor) gitawag sa karaan ingong mga Ripeanhon. Ang pipila ka eskolar naglangkit usab sa maong ngalan ngadto sa ngalan sa suba nga gitawag ug Rhebas nianang katibuk-an nga dapit, samtang ang uban mopabor sa paglangkit niini sa distrito sa Rhebantia sa rehiyon sa Bosporus, unahan pa dapit sa K. Tungod kay wala kaayo hisgoti ang Ripat diha sa rekord sa Bibliya ug kulang ang mabatonang reperensiya sa maong ngalan diha sa karaang sekular nga kasaysayan, ang nahimutangan niini dili matino.