Kon Nganong Angay Mong Mahibaloan ang Kamatuoran Mahitungod Kang Abraham
SI Abraham—usa ka tumotumong bayani o usa ka tinuod nga propeta? Unsa ka hinungdanon ang tubag sa maong pangutana? Sumala sa kronolohiya sa Bibliya, si Abraham nagkinabuhi sa 4,000 ka tuig kanhi. Ang pipila seguro mangatarongan, ‘Unsay kalainan kon kaha siya milungtad o wala?’
Buweno, katunga sa populasyon sa kalibotan maoy sakop sa mga relihiyong nag-angkon nga nagtuo kang Abraham. Ang 1988 Britannica Book of the Year nagalista nga 32.9 porsiento sa kalibotan maoy Kristohanon, 17.2 porsiento Muslim, ug 0.4 porsiento Hudiyo, ug si Abraham usa ka iladong tawo niining tulo ka relihiyon. Tino, ang sinserong mga magtutuo nga gikan nianang mga relihiyona angay makaseguro nga ang gitudlo kanila mahitungod kang Abraham maoy kamatuoran. Bisan kadtong mga sakop sa ubang mga relihiyon o bisan kadtong nangangkong walay relihiyon angayng maikag. Ngano?
Tungod kay ang Bibliya nagaingon nga si Abraham usa ka propeta. (Genesis 20:7) Kana maoy usa ka Biblikanhong pulong nga gigamit sa paghubit sa usa ka tigpamaba sa Diyos uban sa usa ka mensahe alang sa laing mga tawo. Kon si Abraham tinuod nga usa ka propeta, ang tanan makabatog kaayohan. Ngano? Kay ang mensahe nga iyang nadawat naundan sa maayong balita alang sa tanang tawo. (Galacia 3:8) Sumala sa Bibliya, ang Diyos nagsaad kang Abraham: “Ang tanang kabanayan sa yuta tinong pagapanalanginan sa ilang kaugalingon tungod kanimo.”—Genesis 12:3.
Kana usa ka makapahinganghang saad, ug nadunggan ni Abraham nga gisulti kini sa di mokubos duha ka okasyon. (Genesis 18:18; 22:18) Aron matuman kana, ang Diyos magbanhaw gani gikan sa mga patay sa mga hawas sa kabanayan nga nangapuo na. Ang kinabuhi sa maong mga binanhaw mahimong tinuod nga panalangin, sanglit ang kadaghanan nila mahibalik nganha sa usa ka yutan-ong kahimtang nga kaamgid sa Paraisong naglungtad niadto nga giwala sa tawo. Human niana, sila pagatudloan kon sa unsang paagi sila makabaton sa panalangin sa kinabuhing walay kataposan.—Genesis 2:8, 9, 15-17; 3:17-23.
Kon, sa laing bahin, si Abraham maoy usa lamang ka tumotumong karakter, walay pasikaranan sa pagtuo sa kahibulongang saad nga iyang nadawat. Dugang pa, kon dili kasaligan ang mga saad sa Bibliya, ang pipila basin makig-ergo nga ideboto ang ilang kaugalingon sa bug-os diha sa mga kalingawan sa presenteng kinabuhi. Sama sa gisulat sa unang mga Kristohanon: “Kon ang mga patay dili pagabanhawon, ‘kita mangaon ug manginom na lamang, kay ugma kita mangamatay.’”—1 Corinto 15:32.
Busa, aduna kay katarongan nga motuki sa pangutana, Si Abraham ba usa ka tumotumong bayani o usa ka tinuod nga propeta? Basin makugang ka nga mahibalo sa gisulti sa bantog nga mga klero sa ika-19ng siglo bahin niini. Kasamtangan, ang mga arkeologo nakahimog mga makapahinganghang diskobre nga nagahagit sa mga punto de vista sa maong mga klero.