ANER
1. Usa ka Canaanhon. Siya ug ang iyang duha ka igsoong lalaki, si Mamre nga Amorihanon ug si Escol, maoy “mga kaabin” (“mga kaalyado,” AT; RS) ni Abraham. (Gen 14:13) Ang mga pulong nga “mga kaabin” gihubad dinhi gikan sa Hebreohanon nga ba·ʽalehʹ verithʹ, nga sa literal nagkahulogang “mga tag-iya (mga agalon) sa usa ka pakigsaad.” Labot sa mga kondisyon niini nga kasabotan tali niining tulo ka magsoon ug kang Abraham, wala kaayoy gipakita sa rekord kon kini ba maoy pagpanalipdanay sa usag usa batok sa ilang makigubatong mga silingan o mao lamay madaitong pagpakig-ubanay. Sa dihang ang pag-umangkon ni Abraham nga si Lot gibihag sa magkaalyado nga mga hari, kini nga panag-abin milihok, sa dihang si Aner kauban sa iyang mga igsoon mikuyog kang Abraham ug sa iyang 318 ka binansay nga mga sulugoon gikan sa dagkong kakahoyan sa Mamre (diin si Abraham nagtolda) hangtod sa Dan, mga 200 km (120 mi) paingon sa AAS, ug unya mipadayon saylo sa Damasco. Human sa kadaogan, si Abraham midumili sa bisan unsang bahin sa inagaw apan gitino nga ang iyang tulo ka kaabin mahatagan ug bahin tungod sa pagtamod niini nga “panag-abin.”—Gen 14:24; tan-awa ang ALYANSA.
2. Usa ka lungsod sa teritoryo sa Manases nga gihatag ngadto sa kabanayan sa mga anak nga lalaki ni Kohat. (1Cr 6:70; Jos 21:26) Ang pipila ka eskolar nagtuo nga kini mao usab ang Taanak sa Josue 21:25.—Tan-awa ang TAANAK.