ELIEZER

[Ang Akong Diyos Maoy Magtatabang].

1. Usa ka tawong taga-Damasco ug mopatim-awng manununod unta sa walay-anak nga si Abraham. Gitawag siya ni Abraham nga “usa ka anak nga lalaki sa akong panimalay.” (Gen 15:​2, 3) Ang arkeolohikanhong mga kaplag, sama sa mga papan gikan sa Nuzi, nagpatin-aw nganong giisip ni Abraham si Eliezer nga iyang manununod. Kasagaran ang walay-anak nga mga magtiayon mosagop ug anak nga lalaki nga moatiman kanila sa pagkatigulang ug magpalubong kanila inigkamatay, ug human niana makapanunod sa katigayonan. Apan, gilatid usab nga kon manganak silag usa ka anak nga lalaki human magsagop, ang tinuod nga anak mao ang mahimong pangunang manununod.

Lagmit si Eliezer mao ang gihisgotan nga kinamagulangang alagad ni Abraham ug tigdumala sa iyang panimalay, nga gisugo ni Abraham ngadto sa panimalay ni Nahor sa ibabawng Mesopotamia aron sa pagkuhag asawa alang kang Isaac. Sama sa iyang agalong si Abraham, si Eliezer midangop kang Jehova alang sa giya ug miila sa Iyang pagtultol.​—Gen 24:​2, 4, 12-14, 56.

2. Ang manghod sa duha ka anak nga lalaki ni Moises, nga ginganlag Eliezer ni Moises tungod kay ang Diyos maoy iyang magtatabang sa pagluwas kang Moises gikan sa espada ni Paraon. (Ex 18:4) Si Eliezer adunay usa lamang ka anak nga lalaki, si Rehabias, nga pinaagi kaniya naggikan ang daghang kaliwat. Sa adlaw ni David usa niini nga mga kaliwat, si Selomot, kauban sa iyang mga igsoong lalaki, gitudlo sa pagdumala sa tanang butang nga gibalaan.​—1Cr 23:17; 26:​25, 26, 28.

3. Usa ka anak nga lalaki ni Beker ug kaliwat ni Benjamin.​—1Cr 7:​6, 8.

4. Usa sa pito ka saserdote nga nagpalanog sa mga trompeta atubangan sa arka ni Jehova sa dihang gidala kini ni David ngadto sa Jerusalem gikan sa balay ni Obed-edom.​—1Cr 15:24.

5. Anak nga lalaki ni Zikri ug pangulo sa tribo ni Ruben panahon sa paghari ni David.​—1Cr 27:16.

6. Anak nga lalaki ni Dodavahu sa Maresa; usa ka manalagna nga nagtagna nga si Jehova magagun-ob sa mga buhat ni Haring Jehosapat tungod sa iyang pakigkombuya sa daotan nga si Haring Ahazias sa pagbuhat ug mga barko.​—2Cr 20:35-37; 1Ha 22:48.

7. Usa sa mga pangulo sa mga destiyero nga namalik sa Jerusalem uban kang Esdras.​—Esd 8:16.

8. Usa ka saserdote sa “mga anak nga lalaki ni Jesua” nga apil niadtong misunod sa tambag ni Esdras ug misaad sa pagpapahawa sa ilang langyawng mga asawa.​—Esd 10:​18, 19.

9. Usa ka Levihanon nga apil sa mga lalaking nagpapahawa sa ilang langyawng mga asawa, nga misunod sa tambag ni Esdras.​—Esd 10:​23, 44.

10. Usa ka kaliwat ni Harim nga apil niadtong nagpatalinghog sa pulong ni Esdras sa pagpapahawa sa ilang langyawng mga asawa.​—Esd 10:​31, 44.

11. Usa ka katigulangan sa yutan-ong inahan ni Jesus nga si Maria.​—Luc 3:29.