ASUPRE

Usa ka dalag, dili metal nga elemento nga makaplagan nga puro o nahisagol sa ubang mga elemento diha sa mga sambog nga sulfide ug sulfate. Ang temperatura nga gikinahanglan sa pagtunaw niini ubos kaayo, 113°C. (235°F.). Kini daling masunog ug pughawon-asul ang kalayo niini, ug sa samang panahon mahimong sulfur dioxide, nga halang ug baho.

Ang unang makasaysayanhong paghisgot sa asupre nag-asoy kon sa unsang paagi nahitabo ang kalaglagan sa daotang mga siyudad sa Sodoma ug Gomora pinaagi sa kalayo ug asupre. (Gen 19:24; Luc 17:29) Pinasukad sa geolohikanhong ebidensiya, ang uban nagtuo nga kining makatalagmanong paghukom gikan kang Jehova lagmit pinaagig pagbuto sa usa ka bolkan sa habagatang rehiyon sa Patayng Dagat, nga maoy hinungdan nga daghan kaayo ang asupre nianang dapita karong adlawa.

Gituohan nga ang init kaayong sunoganan ug basura sa karaang siyudad sa Jerusalem naugmad pinaagi sa pagdugang ug asupre nganha sa kanunayng nagdilaab nga kalayo sa Walog sa Hinnom (Gehenna) sa gawas lamang sa mga paril.

Sukad sa kalayonhong paghukom sa Sodoma ug Gomora niadtong 1919 W.K.P., ang daling masunog nga kinaiyahan sa asupre gihisgotan sa Kasulatan. (Isa 30:33; 34:9; Pin 9:​17, 18) Kini maoy simbolo sa bug-os nga kalaglagan. (Deu 29:​22, 23; Job 18:15) Ang “kalayo ug asupre” duyog nga gihisgotan kon ihulagway ang bug-os nga kalaglagan. (Sal 11:6; Eze 38:22; Pin 14:9-11) Gisultihan kita nga ang Yawa ‘igatambog ngadto sa linaw nga kalayo ug asupre,’ usa ka haom nga kahubitan sa bug-os nga kalaglagan, “ang ikaduhang kamatayon.”​—Pin 19:20; 20:10; 21:8.