SIDIM, UBOS NGA PATAG SA

Usa ka walog nga gilangkit sa Kasulatan ngadto sa Dagat sa Asin (Patayng Dagat). (Gen 14:3) Didto, sa adlaw ni Abraham, ang rebelyosong mga hari sa Sodoma, Gomora, Adma, Zeboiim, ug Zoar nakiggubat sa Elamihanon nga si Haring Kedorlaomer ug sa iyang tulo ka kaalyado. Kay napildi, ang mga hari sa Sodoma ug Gomora mikalagiw, apan ang pipila sa ilang kasundalohan nangahulog sa “mga kagahongan sa aspalto” nga milukop sa maong dapit.​—Gen 14:​4, 8-10.

Ang pipila nagtuo nga ang Ubos nga Patag sa Sidim mao ang samag luok nga bahin sa Patayng Dagat sa H sa Peninsula sa Lisan. Sila nagtuo nga kanhi kini maoy usa ka tabunok nga walog ug lagmit sa ulahi naunlod ilalom sa tubig, tingali tungod sa linog o tungod sa mga kausaban sa topograpiya sa yuta gumikan sa paglaglag sa Diyos sa Sodoma, Gomora, ug sa tibuok Distrito. (Gen 19:​24, 25) Sa popanahon, anaa gihapoy mga piraso sa aspalto nga molutaw sa mabaw nga katubigan didto.​—Tan-awa ang DAGAT SA ASIN.