AMMON

[Ang Katawhan].

Anak nga lalaki ni Lot pinaagi sa manghod niyang anak nga babaye; ang katigulangan sa mga Ammonhanon. (Gen 19:38) Sama sa gibuhat sa magulang nga anak nga babaye, ang manghod nga anak nga babaye ni Lot nakigsekso usab sa iyang amahan samtang sila nagpuyo sa usa ka langob sa usa ka bukirong rehiyon​—human paimna ug daghang bino si Lot sa iyang mga anak nga babaye. (Gen 19:30-36) Ang gingalan kang Ammon sa iyang inahan maoy Ben-ami, nga nagkahulogang “Anak sa Akong Katawhan [nga mao, mga paryente]” ug dili anak sa mga langyaw sama sa mga Sodomanhon. Busa dayag nga kining ngalana nalangkit sa kabalaka nga gipahayag sa magulang nga anak nga babaye nga silang duha walay nakaplagang kaminyoan gikan sa ilang katawhan o banay diha sa dapit nga ilang gipuy-an.

Ang “Ammon” gigamit usab sa Salmo 83:7 alang sa nasod sa iyang mga kaliwat. Ang ekspresyon nga “mga anak ni Ammon” magpahinumdom sa mga Israelinhon sa ilang relasyon sa mga Ammonhanon, usa ka relasyon nga gitagad mismo ni Jehova, ingon sa makita sa iyang pagbaod sa mga Israelinhon nga dili manghilabot sa Ammon o makig-away kanila, sanglit sila mga anak ni Lot nga pag-umangkon ni Abraham.​—Deu 2:19; tan-awa ang AMMONHANON.