Abraham—Gilubong Dinhi, Apan Buhi?

Sa daghang siglo ang mga Hudiyo, mga Muslim, ug mga Kristohanon nakabiyahe ngadto niining dapita.

Makaduaw ka niini diha sa karaang siyudad sa Hebron, habagatan sa Jerusalem. Kini nga tinukod gitawag ug Haram el-Khalil ug ang Lubnganan sa mga Patriarka. Oo, kaylap kaayong gidawat kini ingon nga mao ang lubnganan sa mga patriarka nga si Abraham, Isaac, ug Jacob, maingon man sa ilang masigka-asawa nga si Sarah, Rebecca, ug Leah.

Hinumdomi gikan sa Bibliya nga sa dihang namatay ang iyang minahal nga asawa, si Sarah, gipalit ni Abraham ingong lubnganan ang usa ka langob ug pila ka yuta sa Macpela, duol sa Hebron. (Genesis 23:2-20) Sa ulahi, si Abraham gilubong usab dinhi, ingon man ang ubang mga membro sa pamilya. Sa milabay ang daghang siglo, duol sa tradisyonal nga lubnganan, si Herodes nga Bantogan nagtukod ug usa ka dako nga edipisyo nga sa ulahi giusab ug gipadako sa mga mananaog, nga nagpakita sa ilang kaugalingong relihiyosong mga pagtuo.

Inigsulod, imong makita ang unom ka cenotaphs (mga monumento o walay sulod nga mga lubnganan.) Ang hulagway nga gisal-ot nagpakita sa lubnganan ni Isaac, nga anak ni Abraham. Duol niana mao ang mga lungag diha sa salog, nga gigamit nga agianan aron makita kon unsay anaa sa ilalom. Ang mga tigdukiduki nakakitag mga lawak nga hayan nasudlag daghang karaang mga bukog.

Unsay ikasulti bahin kang Abraham? Kon siya gilubong diha sa usa ka langob nga karon anaa sa ilalom niining dapita, dugay na kaayo siyang patay, dili ba? Ang kadaghanang bisita mouyon. Apan usa ka manalagna nga mas dako kang Abraham nag-ingon nga sa usa ka diwa si Abraham buhi gihapon. Sa unsang paagi? Ug unsay kalabotan niini sa imong pagtuo?

Palihog basaha ang artikulong “Namatay Ninyong mga Minahal​—Hain Sila?” (Panid 3) Gipadayag niini kon unsay giingon sa dakong manalagna bahin sa pagkahimong buhi ni Abraham, diin ang maong impormasyon mahimong makahuloganon kaayo alang kanimo ug sa imong pamilya.