Gituman Nila ang Kabubut-on ni Jehova

Pagpangita ug Asawa Alang Kang Isaac

ANG lalaking tigulang nga naglingkod daplin sa atabay gikapoy na. Siya ug ang iyang mga alagad uban ang ilang napulo ka kamelyo mingpanaw sa tibuok dalan gikan sa kasikbit sa Beer-sheba paingon sa amihanang Mesopotamia​—usa ka distansiyang kapig 800 ka kilometros.a Sa maong panahon nga nakaabot na sila sa ilang dulnganan, ang maong gikapoy nga magpapanaw mihunong sa pagpalandong sa iyang lisod nga misyon. Kinsa ba ang maong tawo, ug nganong iyang gihimo ang maong hago nga panaw?

Ang tawo mao ang sulugoon ni Abraham, “ang kinatigulangan sa iyang panimalay.” (Genesis 24:2) Bisan pag wala nganli diha sa asoy, dayag nga siya mao si Eliezer, kinsa sa usa ka panahon gitawag ni Abraham ug ‘usa ka anak sa iyang panimalay’ ug kinsa gihisgotan niya nga nahalinya sa ‘pagpanunod kaniya ingong usa ka manununod.’ (Genesis 15:​2, 3) Siyempre, kadto maoy sa panahong si Abraham ug Sara wala pay anak. Sa maong panahon ang ilang anak lalaki, si Isaac, maoy 40 anyos na, ug bisan pag si Eliezer dili na ang pangunang manununod ni Abraham, siya iya gihapong sulugoon. Busa misugot siya sa dihang si Abraham mihimog usa ka lisod nga hangyo. Unsa ba kadto?

Usa ka Lisod nga Misyon

Sa adlaw ni Abraham ang usa ka kaminyoon nag-apektar dili lamang sa banay kondili sa enterong tribo usab, o patriarkanhong komunidad. Busa naandan nga ang mga ginikanan maoy magpilig kapikas alang sa ilang mga anak. Ugaling lang, sa pagpangitag usa ka asawa alang sa iyang anak lalaki nga si Isaac, naatubang ni Abraham ang usa ka suliran. Tungod sa di-diyosnong mga paagi sa mga Canaanhon, imposible ang pagpakigminyo sa usa kanila. (Deuteronomio 18:​9-12) Ug bisan pag naandan nga ang usa ka lalaki magminyo sulod sa iyang kaugalingong tribo, ang mga paryente ni Abraham nagpuyo gatosgatos ka kilometros ang kalayo sa amihanang Mesopotamia. Dili mahimong si Isaac iyang pabalhinon pagpuyo didto, kay si Jehova nakasaad kang Abraham: “Sa imong binhi akong ihatag kining yutaa,” ang yuta sa Canaan. (Genesis 24:7) Busa, si Abraham miingon kang Eliezer: “Lakaw ngadto sa akong yuta ug sa akong mga kabanay, ug magkuha kag usa ka asawa alang sa akong anak lalaki, alang kang Isaac.”​—Genesis 24:4.

Sa pagkompleto sa taas nga panaw, si Eliezer nagpahulay sa daplin sa atabay samtang iyang gipalandong ang iyang misyon. Naamgohan niyang sa taudtaod ang mga babaye mangabot sa atabay aron mokalos ug taganang tubig alang sa kagabhion. Busa gihangyo niya si Jehova: “Ang dalaga nga akong pagaingnon, ‘Ipaubos palihog ang imong banga sa tubig, aron ako makainom,’ ug moingon gayod, ‘Inom, ug paimnon ko usab ang imong mga kamelyo,’ kini siya ang imong igatudlo alang sa imong sulugoon, kang Isaac; ug pinaagi niini ipaila kanako nga ikaw nagpadayag ug maunongong gugma sa akong agalon.”​—Genesis 24:14.

Samtang siya nag-ampo pa, usa ka makabibihag nga dalaga nga ginganlag Rebeka ang miduol. “Hatagi ako, palihog, ug diyutayng mainom nga tubig gikan sa imong banga,” miingon si Eliezer kaniya. Gihatagan siya ni Rebeka, ug unya miingon siya: “Alang sa imong mga kamelyo ako usab magkalos ug tubig hangtod nga sila matapos sa pag-inom.” Kadto maoy dakong tanyag, sanglit ang usa ka giuhawng kamelyo mahimong moinom ug abot sa 95 ka litrong tubig sa napulo ra ka minuto! Kon kaha ang kauhaw sa mga kamelyo ni Eliezer ingon niana o dili, si Rebeka nasayod gayod nga ang pag-alagad nga iyang gitanyag nga buhaton maoy hago. Sa tinuoray, siya “nagbubo dayon sa iyang banga ngadto sa pasungan sa tubig ug nagbalikbalik nga nagdagan sa atabay aron mokalos ug tubig, ug nagpadayon sa pagkalos alang sa tanan niyang mga kamelyo.”​—Genesis 24:​15-20.

Sa pagkamatikod sa pagtultol ni Jehova, si Eliezer mihatag kang Rebeka ug usa ka bulawang singsing sa ilong ug duha ka bulawang pulseras, nga mobilig mga $1,400 sa balor karong adlawa. Sa gisultihan siya ni Rebeka nga siya maoy apong babaye ni Nahor, ang igsoong lalaki ni Abraham, si Eliezer miampo nga nagpasalamat sa Diyos. “Si Jehova nag-agak kanako ngadto sa balay sa mga igsoon sa akong agalon,” matod niya. (Genesis 24:​22-27) Si Eliezer gidala ngadto sa banay ni Rebeka. Sa wala madugay, si Rebeka nahimong asawa ni Isaac, ug siya nakapribilehiyo sa pagkahimong usa ka katigulangan sa Mesiyas, si Jesus.

Mga Pagtulon-an Alang Kanato

Gipanalanginan ni Jehova ang mainampoong paningkamot ni Eliezer sa pagpangitag mahadlokon-sa-Diyos nga kapikas alang kang Isaac. Apan, hinumdomi nga ang kaminyoon ni Isaac laktod nga nalangkit sa katuyoan sa Diyos nga magpatunghag usa ka binhi pinaagi ni Abraham. Busa kining asoya dili angay nga mag-agak kanato sa paghinapos nga ang tanan nga nag-ampo alang sa usa ka kapikas milagrosong hatagan. Bisan pa, kon mosunod kita sa mga prinsipyo ni Jehova, hatagan niya kitag kusog sa pag-antos sa mga hagit nga duyog sa bisan haing kahimtang sa kinabuhi​—pagkaminyo o pagkatagsaanon.​—1 Corinto 7:​8, 9, 28; itandi ang Filipos 4:​11-13.

Si Eliezer nanlimbasog pag-ayo sa pagbuhat sa mga butang sumala sa paagi ni Jehova. Kita usab mahimong makadiskobreng ang pagsunod sa mga sukdanan ni Jehova dili kanunayng sayon. Pananglitan, tingali lisod ang pagkaplag ug trabaho nga dili magpiot sa teokratikanhong kalihokan, usa ka kapikas nga mahadlokon sa Diyos, mga kauban nga makapalig-on, kalingawan nga dili modaldal sa kadaotan. (Mateo 6:​33; 1 Corinto 7:​39; 15:​33; Efeso 4:​17-19) Bisan pa niana, si Jehova makasuportar niadtong modumili sa pagkompromiso sa mga prinsipyo sa Bibliya. Ang Bibliya nagsaad: “Salig kang Jehova uban sa bug-os mong kasingkasing ug ayaw pagsalig sa imong kaugalingong salabotan. Sa tanan mong mga dalan matikdi siya, ug siya mismo magatul-id sa imong mga alagianan.”​—Proverbio 3:​5, 6.

[Footnote]