MANDRAGORA

[Heb., du·dha·ʼimʹ, plural].

Usa ka hilba nga mabuhig dugay nga kapamilya sa patatas, nga may dagko, pormag-itlog, lubos-berde nga mga dahon. Ang mga dahon sa mandragora (Mandragora officinarum) motubo gikan sa lintunganayng gamot mismo, nga moporma ug pinabukad nga sirkulo, ug mosangyad sa yuta. Sa kinatung-an niini nga sirkulo, ang pungango sa bulak motubo, ug ang matag pungango mopatunghag usa lang ka puti, asulon, o bayolet nga bulak. Ang dalagong-pula nga bunga, nga susama ka dako sa sirwelo, mahinog nga halos dungandungan sa pagpangani sa trigo didto sa Palestina. (Gen 30:14) Gihubit kini nga sama ka humot ug ka presko sa mansanas. (Tan-awa ang Aw 7:13.) Ang baga, sagad nagsangasanga nga lintunganayng gamot sa mandragora amgid-amgid sa mga bitiis sa tawo. Kini nakapatunghag daghang patuotuo ug naglangkit niini nga tanom sa mga gahom sa madyik.​—HULAGWAY, Tomo 1, p. 544.

Sa karaang kapanahonan ang mga bunga sa mandragora gigamit sa medisina ingong narkotiko ug ingong pang-alibyo sa pagpangurog sa kaunoran. Labot pa, kaniadto ug sa pagkakaron sa pipila ka bahin sa Tungang Sidlakan, kini giisip nga makapapukaw sa gana sa sekso ug makadugang sa pertilidad o makatabang aron momabdos. Ang talaan sa Genesis nagtaho nga si Raquel miuyon nga ang iyang igsoong babaye nga si Lea makigdulog sa iyang banang si Jacob baylo sa pipila ka mandragora. (Gen 30:​14, 15) Bisan tuod wala ibutyag sa Bibliya kon unsa ang iyang motibo, lagmit gibati ni Raquel nga kini makatabang kaniya aron momabdos, sa ingon matapos ang kaulawan sa iyang pagkaapuli. Hinuon, ayha pa siya nagmabdos paglabay sa pipila ka tuig human niini nga panghitabo.​—Gen 30:22-24.