UGAT

Usa nga samag lanot sa lawas. Giingon nga ang tawo gitagik sa mga bukog ug mga ugat.​—Job 10:11; tan-awa usab ang Job 40:15-18.

Sa dihang nakiglayog si Jacob sa usa ka manulonda, ang manulonda nagtandog sa piyakpiyak sa lutahan sa paa ni Jacob, maong kini nalisa. Ang asoy nga gisulat ni Moises sa ulahi nag-ingon: “Mao nga ang mga anak sa Israel wala maanad sa pagkaon sa ugat sa paa, nga anaa sa piyakpiyak sa lutahan sa paa, hangtod niining adlawa [ni Moises], tungod kay siya nagtandog sa piyakpiyak sa lutahan sa paa ni Jacob pinaagi sa ugat sa paa.” (Gen 32:32) Daghang Hudiyo ang nagsunod pa gihapon niini nga kostumbre, nga magkuha sa ugat nga sciatic lakip sa mga arteriya ug mga kaugatan sa dili pa kan-on ang hayop. Kini nga tulumanon giisip sa Hudiyong mga komentarista nga usa ka pahinumdom bahin sa pag-atiman nga gihimo sa Diyos ngadto sa Israel ingon sa gipakita sa kasinatian sa patriarkang si Jacob, ang amahan sa 12 ka tribo.

Mahulagwayong Paggamit. Sa mahulagwayong diwa ang mga Israelinhon gikaingon nga may liog nga sama sa “usa ka ugat nga puthaw,” nga nagkahulogan nga sila tig-a, gahian, tikig ug liog. (Isa 48:4; itandi ang Ex 32:9.) Ang pagpasig-uli sa Diyos sa iyang katawhan sa espirituwal nga paagi gihulagway pinaagi sa pagtapo pag-usab sa mga bukog ug sa pagbutang ug unod ug mga ugat nganha niini.​—Eze 37:6-8.