HADAD

1. Usa sa 12 ka anak nga lalaki ni Ismael nga anak ni Abraham ug sa iyang puyopuyo nga si Agar.​—Gen 25:12-15; 1Cr 1:28-30.

2. Ang manununod sa pagkahari sa Edom human mamatay si Husam. “Si Hadad nga anak nga lalaki ni Bedad, nga nagpildi sa mga Midianhon sa kapatagan sa Moab,” lagmit nagmando gikan sa siyudad sa Avit.​—Gen 36:​31, 35, 36; 1Cr 1:​46, 47.

3. Laing hari sa Edom; bana ni Mehetabel. Si Hadad mipuli kang Baal-hanan sa pagkahari, ug “ang ngalan sa iyang siyudad mao ang Pau.” (1Cr 1:​43, 50, 51) Gitawag siya nga Hadar sa Genesis 36:​39, tingali tungod sa sayop sa magkokopya, sanglit ang Hebreohanong mga letra nga katumbas sa “r” (ר) ug “d” (ד) amgid man kaayo.

4. Usa ka Edomhanon nga harianon ug kaliwat ug usa ka tigmugnag kasamok sa Israel sa panahon sa paghari ni Solomon. Samtang bata pa, si Hadad, uban sa pipila ka alagad sa iyang amahan, mikalagiw ngadto sa Ehipto agi sa Paran aron makaikyas gikan sa pagpatay ni Joab sa tanang lalaki sa Edom. Didto sa Ehipto, si Hadad ug ang iyang mga kauban gidawat nga maluloton, sanglit si Hadad gihatagan ni Paraon ug balay ingon man pagkaon ug yuta, ug sa ulahi gihatag pa gani kaniya ingong asawa ang bayaw nga babaye ni Paraon. Pinaagi niini nga babaye, si Hadad nakabaton ug anak nga lalaki nga ginganlan ug Genubat, kinsa mipuyo mismo sa balay ni Paraon uban sa mga anak nga lalaki ni Paraon. Sa dihang nasayran niyang si Haring David ug si Joab patay na, si Hadad mibalik sa Edom ug nahimong usa ka magsusukol ni Solomon.​—1Ha 11:14-22, 25.

5. Si Hadad (Adad sa Akadianhon) giisip nga mao ang pangulong bathala sa karaang Sirya ug gituohan sa kadaghanan nga mao si Rimon. Ang ngalang Hadad makita ingong bahin sa mga ngalan sa pipila ka haring Siryanhon, sama kang Ben-hadad (1Ha 15:18) ug Hadadezer (1Ha 11:23), ug usab makaplagan diha sa ngalang Hadadrimon.​—Zac 12:11; tan-awa ang HADADRIMON.