PAGPUNGGOT SA ULO

Usa ka paagi sa pagpahamtang sa silot nga kamatayon nga wala ilatid sa Moisesnong Balaod. Kini maoy usa ka paagi sa pagpatay nga gibuhat sa kadaghanang nasod. Sa Israel, kon himoon ang pagpunggot sa ulo, kasagarang himoon kini human patya ang indibiduwal ug kini sagad himoon aron masayod ang publiko nga ang kamatayon sa maong tawo maoy usa ka kaulawan o usa ka pahibalo sa paghukom o pasidaan sa publiko.

Si Paraon ‘nag-isa sa ulo’ sa iyang pangulong panadero, dayag nga nagpunggot sa iyang ulo. (Gen 40:19) Human pukana si Goliat pinaagi sa usa ka bato gikan sa iyang lambuyog, giibot ni David ang espada ni Goliat ug “gipatay gayod siya” pinaagi sa pagpunggot sa iyang ulo atubangan sa kasundalohan sa Israel ug sa mga Filistehanon. Kini nagpalisang pag-ayo sa kasundalohan sa mga Filistehanon ug misangpot sa ilang pagkaparot. (1Sa 17:​51, 52) Ang mga Filistehanon nagpunggot sa ulo ni Saul human siya mamatay, dayon nagbitay sa iyang patayng lawas uban sa mga lawas sa iyang mga anak nga lalaki didto sa paril sa siyudad sa Bet-san. (1Sa 31:​9, 12) Si Rekab ug Baana, nga daotang mga tawo, nagpatay sa anak nga lalaki ni Saul nga si Is-boset ug nagpunggot sa iyang ulo aron dad-on kini ngadto kang David, nga naghunahunang mahimuot si David kanila. Tungod niini gipapatay sila ni David. (2Sa 4:5-12) Aron sa pagluwas sa ilang siyudad, gisunod sa katawhan sa siyudad sa Abel sa Bet-maaca ang tambag sa usa ka maalamong babaye ug gipunggot ang ulo ni Sheba nga anak nga lalaki ni Bikri, ug ilang gitugpo kini ibabaw sa paril ngadto kang Joab. Wala hisgoti kon si Sheba gipatay ba sa wala pa punggoti ug ulo. (2Sa 20:​15, 21, 22) Ang mga ansiyano ug inilang mga tawo sa Samaria nagpatay sa 70 ka anak nga lalaki ni Ahab ug nagpadala sa ilang mga ulo sulod sa mga bukag ngadto kang Jehu nga didto sa Jezreel, diin gipundok kini didto sa ganghaan sa siyudad ingong pamatuod sa katumanan sa paghukom ni Jehova nga gipahayag pinaagi kang Elias.​—2Ha 10:6-10; 1Ha 21:20-22.

Ang Bibliya nagrekord nga si Herodes Antipas ang nagpapunggot sa ulo ni Juan nga Tigbawtismo didto sa bilanggoan tungod sa hangyo sa anak nga babaye ni Herodias. (Mat 14:8-11; Mar 6:24-28; Luc 9:9) Si Juan, diha sa usa ka panan-awon, ‘nakakita sa mga kalag niadtong gipamatay pinaagi sa atsa tungod sa ilang pagpamatuod bahin kang Jesus ug tungod sa pagsulti bahin sa Diyos.’​—Pin 20:4; tan-awa ang KRIMEN UG SILOT.