LEVI

[Pag-unong; Miipon].

1. Ikatulong anak nga lalaki ni Jacob pinaagi sa iyang asawa nga si Lea, nga natawo sa Padan-aram. (Gen 35:​23, 26) Sa iyang pagkatawo si Lea miingon: “Karon niining higayona ang akong bana moipon na kanako, tungod kay ako nanganak kaniya ug tulo ka anak nga lalaki.” Busa ang bata gitawag nga Levi, nga ang kahulogan niining ngalana dayag nga gilangkit sa paglaom ni Lea sa usa ka bag-ong bugkos sa pagminahalay tali kaniya ug kang Jacob. (Gen 29:34) Si Levi nanganak kang Gerson (Gersom), Kohat, ug Merari, ang mga gigikanan sa tulo ka pangunang dibisyon sa mga Levihanon.​—Gen 46:11; 1Cr 6:​1, 16.

Si Levi, kauban sa iyang igsoon nga si Simeon, mihimog mabangis nga aksiyon batok sa mga nag-among-among sa ilang igsoon nga si Dina. (Gen 34:​25, 26, 31) Kini nga kapahayagan sa mabangis nga kasuko gitunglo ni Jacob, kinsa mitagna nga ang mga kaliwat ni Levi mangatibulaag sa Israel, usa ka tagna nga natuman sa dihang ang mga Levihanon natibulaag gayod lukop sa 48 ka Levihanong mga siyudad sa mga teritoryo sa lainlaing mga tribo sa Israel sa yuta sa Canaan. (Gen 49:7; Jos 21:41) Si Levi mikuyog kang Jacob ngadto sa Ehipto ug namatay didto sa edad nga 137 anyos.​—Ex 1:​1, 2; 6:16; tan-awa ang LEVIHANON.

2. Usa ka katigulangan ni Jesu-Kristo nga gipaila ingong “anak ni Simeon” sa talaan sa kagikan ni Jesus nga girekord ni Lucas. Gilista siya sa kaliwatan taliwala ni David ug Zorobabel.​—Luc 3:27-31.

3. Ang “anak ni Melqui,” nga ikaduha gikan kang Heli (amahan ni Maria) sa rekord ni Lucas sa talaan sa kagikan ni Jesus.​—Luc 3:​23, 24.

4. Usa ka maniningil ug buhis (Mar 2:14; Luc 5:​27, 29) nga nahimong apostoles ni Jesu-Kristo ug nailhan sa laing ngalan nga Mateo.​—Mat 9:9; 10:​2-4; tan-awa ang MATEO.