Ang Bibliya nagsugilon kanato kon unsay nahitabo. Gigamit ni Satanas nga Yawa ang usa ka halas ingon nga iyang tigpamaba ug miduol siya kang Eva ug miingon: “Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?” Sa dihang gisulti pag-usab ni Eva ang sugo sa Diyos, si Satanas miingon kaniya: “Dili gayod kamo mamatay. Kay nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” Human niana, ang kahoy morag tilinguhaon tan-awon para kang Eva mao nga “siya mikuha sa bunga niini ug mikaon niini.” Ang asoy nagpadayon: “Human niana siya mihatag usab ug pipila sa iyang bana sa dihang nahiuban na kaniya ug siya mikaon niini.” (Genesis 3:1-6) Busa sayop nga gigamit ni Adan ug Eva ang ilang kagawasan sa pagpili ug sila nakasala tungod sa pagsupak sa Diyos.

Nasabtan mo ba kon unsa ka seryoso ang nahitabo? Gipanghimakak sa Yawa ang gisulti sa Diyos kang Adan. Ang mga pulong ni Satanas nagpasabot nga wala magkinahanglan si Adan ug Eva kang Jehova aron motabang kanila sa pagdesisyon kon unsay maayo ug kon unsay daotan alang kanila. Mao nga ang isyu nga gipatungha ni Satanas nagkuwestiyon sa katungod ug pagkaangayan ni Jehova nga magmando sa tawo ug busa ang pagkasoberano ni Jehova mao ang labing hinungdanong isyu nga iyang gipatungha. Sa unsang paagi gitubag sa matuod nga Diyos ang maong isyu?

Mga 6,000 ka tuig na ang milabay sukad kuwestiyona ni Satanas ang katungod sa Diyos sa pagmando. Unsay gibutyag sa kasaysayan? Tagda ang duha ka akusasyon ni Satanas batok sa Diyos. Mapasaligong giingnan ni Satanas si Eva: “Dili gayod kamo mamatay.” (Genesis 3:4) Sa pag-ingon nga si Adan ug Eva dili mamatay kon mokaon sila sa gidiling bunga, si Satanas sa pagkatinuod nagtawag gayod kang Jehova nga bakakon. Usa gayod kana ka seryosong akusasyon! Kon wala magmaminatud-on ang Diyos niining butanga, masaligan pa ba siya sa ubang mga butang? Apan unsay gipakita sa paglabay sa panahon?

Si Adan ug Eva nag-antos sa balatian, kasakit, pagkatigulang ug sa kataposan kamatayon. “Ang tanang adlaw ni Adan nga iyang gikinabuhi mikabat ug siyam ka gatos ug katloan ka tuig ug siya namatay,” matod sa Bibliya. (Genesis 3:19; 5:5) Ug gikan ni Adan, napanunod sa tanang katawhan kining makapasubong kabilin. (Roma 5:12) Ang paglabay sa panahon nagpamatuod nga si Satanas “usa ka bakakon ug ang amahan sa bakak” ug nga si Jehova maoy “Diyos sa kamatuoran.”—Juan 8:44; Salmo 31:5.