9. Sumala sa Exodo 12:6, kanus-a ihawon ang nating karnero sa Paskuwa? (Tan-awa usab ang kahong “Unsa nga Yugto sa Adlaw?”)

⁹ Sumala sa The Pentateuch and Haftorahs, ang Exodo 12:6 nag-ingon nga ang nating karnero ihawon “taliwala sa duha ka gabii.” Kini usab ang pagkahubad sa ubang bersiyon sa Bibliya. Ang uban, apil ang Tanakh sa mga Hudiyo, naghubad niini nga “sa pagkilumkilom.” Duna poy naggamit ug “pagsalop sa Adlaw.” Busa ang nating karnero ihawon human sa pagsalop sa Adlaw apan samtang hayag pa, sa pagsugod sa Nisan 14.

10. Sumala sa uban, kanus-a giihaw ang nating karnero, apan unsang pangutana ang motungha?

¹⁰ Sa ulahi, ang ubang Hudiyo naghunahuna nga dangtag pipila ka oras ang pag-ihaw sa tanang nating karnero nga gidala sa templo. Busa nagtuo sila nga ang Exodo 12:6 nagtumong sa hinapos sa Nisan 14 tali sa pagsugod sa paglingay sa Adlaw (human sa udto) ug sa aktuwal nga pagsalop niini. Apan kon mao kanay kahulogan, kanus-a gikaon ang panihapon sa Paskuwa? Si Propesor Jonathan Klawans, usa ka eksperto sa karaang Judaismo, miingon: “Ang bag-ong adlaw magsugod sa pagsalop sa Adlaw, busa ang halad giihaw sa ika-14 apan ang pagsugod sa Paskuwa ug ang pagpangaon maoy sa ika-15, bisag kini nga pagkasunodsunod sa mga petsa wala espesipikong hisgoti sa Exodo.” Siya usab misulat: “Ang literatura sa mga Rabbi . . . wala gani mag-ingon kon sa unsang paagi gihimo ang Seder [panihapon sa Paskuwa] sa wala pa malaglag ang Templo” sa 70 C.E.​​—Italiko amoa.