Mga halad-nga-tinabyog. Diha sa mga halad-nga-tinabyog ang saserdote dayag nga nagbutang sa iyang mga kamot ilalom sa mga kamot sa magsisimba, nga nagkupot sa halad nga itanyag, ug itabyog kini; o ang butang nga gitanyag itabyog sa saserdote mismo. (Lev 23:11a) Mopatim-aw nga si Moises, ingong tigpataliwala sa pakigsaad sa Balaod, nagbuhat niini alang kang Aaron ug sa iyang mga anak nga lalaki sa dihang sila gikonsagrar sa pagkasaserdote. (Lev 8:​28, 29) Kini nga buhat naghawas sa pagtanyag sa mga butang nga gihalad ngadto kang Jehova. Ang pipila ka halad-nga-tinabyog mahiadto sa mga saserdote ingong ilang bahin.​—Ex 29:27.

Sagradong mga bahin (gialsa nga mga halad). Ang Hebreohanong pulong nga teru·mahʹ usahay gihubad nga “sagradong bahin” sa dihang nagpunting sa bahin sa halad nga gikuha, o gialsa, gikan sa halad ingong bahin nga iya sa mga saserdote. (Ex 29:​27, 28; Lev 7:​14, 32; 10:​14, 15) Kini nga pulong kanunayng gihubad usab nga “amot,” sa dihang nagpunting sa mga butang nga gihatag ngadto sa sangtuwaryo nga mahiadto usab sa mga saserdote ingong ilang pagkaon, gawas lamang niadtong mga butang nga gihalad diha sa halaran.​—Num 18:8-13, 19, 24, 26-29; 31:29; Deu 12:​6, 11.