ARNON, BUL-OGANANG WALOG SA
Sa tungatunga paingon sa sidlakang bahin sa Patayng Dagat, ang lawom nga lugot sa Walog sa Arnon mitadlas sa rehiyon sa habog nga patag ibabaw sa bukid. Kini nga bul-oganan, ang Wadi Mujib (Nahal Arnon), giagosan sa ubay-ubayng mga sapa (Num 21:14) ug, gawas sa Jordan, mao lamang ang hinungdanong sapa nga nagaagos ngadto sa Patayng Dagat. Ang pula ug dalag nga balasong bato nga mga pangpang titip kaayo diha sa masigkakilid sa hiktin nga walog nga may gamayng sapa nga giagosan kanunay sa tin-awng katubigan nga tugob sa mga isda. Ubay sa kiliran nanubo ang mga kahoyng sause, mga adelpa, ug ang daghang uban pang katanoman. Sa dapit diin ang sapa mopaubos gikan sa titip, habog nga mga pangpang aron mosulod sa patag nga baybayon sa Patayng Dagat, ang gilapdon niini maoy gikan sa 12 ngadto sa 30 m (40 ngadto sa 100 p), nga may agos sa tubig gikan sa 0.3 ngadto sa 1.2 m (1 ngadto sa 4 p) ang giladmon.
Ang makahahadlok nga dal-og nga sa ibabaw mosukod ug mga 3 km (2 mi) ang gilapdon ug halos 520 m (1,700 p) ang giladmon, matabok lamang sa pipila ka agianan (Isa 16:2) ug busa nahimo gayong usa ka kinaiyanhong utlanan. Sa panahon sa Israelinhong pagpanakop giulang niini ang mga Amorihanon sa A gikan sa mga Moabihanon sa H (Num 21:13), apan ang mensahe ni Jepte ngadto sa mga Ammonhanon nagpakita nga ang A nga kiliran niini gikontrolar kanhi sa mga Ammonhanon ug gisulong sa mga Amorihanon sa wala pa moabot ang mga Israelinhon. (Huk 11:12-27) Ang Israel, nga miagi sa daplin sa teritoryo sa Moab, nakaabot sa Arnon, lagmit sa ibabaw nga mga bahin niini. Sa dihang giatake ni Sihon nga hari sa mga Amorihanon, ang Israel nakadaog ug gipanag-iya ang yuta gikan sa Arnon hangtod sa Jabok. (Num 21:21-24; Deu 2:24-36; tan-awa ang JABOK, BUL-OGANANG WALOG SA.) Human niadto kining unang nasakop nga dapit nahimong teritoryo sa mga tribo ni Ruben ug Gad.—Deu 3:16; Jos 12:1, 2; 13:8, 9, 15-28.
Tungod kay si Jehu napakyas sa paglakaw nga bug-os sumala sa balaod ni Jehova, kini nga rehiyon sa ulahi nailog sa misulong nga kasundalohan ni Hazael sa Sirya. (2Ha 10:32, 33) Ang Arnon gihisgotan diha sa linya 26 sa nabantog nga Bato sa Moab, nga diha niana si Haring Mesa sa Moab nanghambog nga siya nakatukod ug dakong dalan latas sa walog. Ang arkeolohikanhong mga kaplag nagpamatuod nga daghan ang mga kuta ug mga tulay sa maong dapit nga nagpamatuod nga ang nahimutangan sa Arnon hinungdanon kaayo. Ang ngalan niini makita diha sa mga tagna nga gitumong batok sa Moab.—Isa 16:2; Jer 48:20.