PUERRO

[Heb., cha·tsirʹ].

Usa sa mga lamas nga gipangandoy sa nagkasagol nga panon sa katawhan ug sa mga Israelinhon samtang didto sa kamingawan. (Num 11:​4, 5) Ang Hebreohanong pulong nga cha·tsirʹ, nga gihubad nga “mga puerro” niini nga teksto, lagmit naggikan sa samang lintunganayng pulong sa parehong Hebreohanong pulong nga gihubad nga “lunhawng balili.” (Isa 40:​7, 8) Kining lamasa gitala lakip sa mga sibuyas ug ahos, espesipikong mga tanom nga makaon nga susama kaayo sa mga puerro, nga nagpakitang usa ka espesipikong utanon ang gitumong, inay nga nagpasabot sa usa ka balili sa kinatibuk-an. Labot pa, sukad sa karaang kapanahonan ang mga puerro popular na kaayo sa Ehipto ug ginakaon pa gihapon sa pagkakaron nianang dapita ug sa Palestina.

Ang puerro (Allium porrum) susama kaayo sa sibuyas apan ang nakalahi niini sa sibuyas kay kini dili kaayo isog, yagpison, tabudyos ug porma, ug daghag duga, samag balili ang mga dahon nga may gilapdong mga 2.5 sm (1 pul.). Ang lindog sa bulak, nga ang tumoy niini mao ang dakong pungpong sa nagpunsisok nga mga bulak, tingali moabot sa gitas-ong mga 0.6 m (2 p). Ang mga bulbo ug mga dahon niini nga tanom nga mabuhi lamang hangtod sa duha ka tuig lutoon ingong utanon ug gigamit ingong panimpla; kini gikilaw usab.